លោក Mauricio Pochettino ត្រូវបានក្លិបយក្សមួយ បដិសេធក្នុងការយកមកដឹកនាំ

អាល្លឺម៉ង់៖ ក្លិប Bayern Munich ត្រូវបានគេរាយការណ៍មកថាបានបដិសេធក្នុងការនាំយកអតីតអ្នកចាត់ការទូទៅរបស់ Tottenham Hotspur លោក Mauricio Pochettino មកធ្វើជាអ្នកចាត់ការទូទៅថ្មីរបស់ខ្លួន។

ក្លិបជើងឯកក្របខណ្ឌ Bundesliga រដូវកាលមុនមិនទាន់មានគ្រូបង្វឹកជាក់លាក់នៅឡើយ ក្រោយបណ្ដេញលោក Niko Kovac ចេញពីតំណែងកាលពីខែមុន។ ជាមួយគ្នានេះលោក Pochettino ក៏ត្រូវបានបណ្ដេញចេញពីតំណែងជំនួសវិញដោយលោក Jose Mourinho ផងដែរ។

មានប្រភពព័ត៌មានលេចឭមកថា បុរសសញ្ជាតិអាហ្សង់ទីន Pochettino អាចនឹងបន្តការងាររបស់ខ្លួននៅលើទឹកដីអាល្លឺម៉ង់ជាមួយ Bayern Munich។ ប៉ុន្តែបើតាមការចុះផ្សាយរបស់សារព័ត៌មាន Bild គឺក្លិប Bayern Munich បានច្រានចោលចំពោះព័ត៌មាននេះ។ ប្រភពដដែលបានបន្តឲ្យដឹងទៀតថា លោក Pochettino អាចនឹងទៅចូលរួមជាមួយ Arsenal ឬ Manchester United ក្នុងរយៈពេលប៉ុន្មានសប្ដាហ៍ខាងមុខទៀត។

គួរឲ្យដឹងដែរថា ក្រៅពីលោក Pochettino មានដំណឹងមកថានៅមានបេក្ខភាពជាច្រើនរូបទៀតដែលអាចមកដឹកនាំ Bayern Munich រួមមានលោក Arsene Wenger, Thomas Tuchel, Ralf Rangnick, Erik ten Hag និងលោក Hansi Flick ដែលជាគ្រូបង្វឹកបណ្ដោះអាសន្ន៕

ប្រភព៖ SportsMole