រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ប្រធានប្រជាការពារសង្កាត់ផ្សារដើមគរ ខណ្ឌទួលគោក ត្រូវបានសន្តិសុខផ្សារនាគមាសបើករថយន្តបុកផ្ទប់ទៅរថយន្តដឹកបន្លែមួយគ្រឿង បណ្តាលឲ្យបាត់បង់ជីវិតពេលបញ្ជូនទៅកាន់មន្ទីរពេទ្យ ខណៈរៀបចំសណ្តាប់ធ្នាប់នៅផ្សារនាគមាសដែលជាតំបន់ស្មុគស្មាញ ។ ហេតុការណ៍នេះបានកើតឡើងកាលពីវេលាម៉ោងប្រមាណ៩និង៣០នាទី ថ្ងៃទី០៥ ខែធ្នូនេះ នៅចំណុចផ្លូវលេខ២៣៩ ខាងលិច ជាប់ផ្សារនាគមាស ក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជនរងគ្រោះក្នុងគ្រោះថ្នាក់នោះឈ្នោះ សុខ ហឿន ភេទប្រុស អាយុប្រមាណ៦១ឆ្នាំ ជាប្រធានប្រជាការពារសង្កាត់ផ្សារដើមគរ មានលំនៅផ្ទះលេខ៥៦BZ ផ្លូវលេខ២៣០ សង្កាត់ផ្សារដើមគរ ខណ្ឌទួលគោក និងមានស្រុកកំណើតឃុំព្រែកតាទែន ស្រុកពញ្ញាឮ ខេត្តកណ្តាល ។ ចំណែកសន្តិសុខផ្សារនាគមាសឈ្មោះ ជា ដា ហៅ B6 អាយុ៣៨ឆ្នាំ ជាសន្តិសុខផ្សារនាគមាសស្នាក់នៅក្នុងផ្សារ និងមានស្រុកកំណើតភូមិក្រសោមអរ ឃុំក្រសោមអរ ស្រុកកំពង់ត្របែក ខេត្តព្រែវែង ត្រូវបាននគរបាលចាប់វាយខ្នោះ ។
តាមព័ត៌មាននៅមុនពេលកើតហេតុប្រធានប្រជាការពាររូបនោះបានបើកបររថយន្តគណៈបញ្ជាការឯកភាពសង្កាត់ ដឹកនាំកម្លាំងប្រជាការពារសង្កាត់ ប្រមាណ៤ទៅ៥នាក់ ចុះរៀបចំសណ្តាប់ធ្នាប់នៅតាមបណ្តាយផ្លូវលេខ ២៣៩ ខាងលិចផ្សារនាគមាស ។ ខណៈនោះក៏បានឈប់រថយន្តដើរណែនាំ និងដេញអាជីវករដែលលក់ដូរលើដងផ្លូវឲ្យចូលខាង និងបានចូលទៅបត់ជើងនៅផ្ទះប្រជាពលរដ្ឋនៅក្បែរនោះ ។
តាមព័ត៌មានឲ្យដឹងទៀតថា ខណៈនោះស្រាប់តែសន្តិសុខផ្សារនាគមាស មិនដឹងមូលហេតុអ្វីទេ មកបើករថយន្តគណៈបញ្ជាការឯកភាពនោះចេញហើយគាប់ជួនពេលនោះប្រធានប្រជាការពារចេញពីបទជើងដើរកាត់មុខក៏ត្រូវរថយន្តនោះបុកផ្ទប់ទៅនឹងរថយន្តដឹកបន្លែមួយគ្រឿង ពេញទំហឹង បណ្តាលបែកប្លោកនោមរងរបួសធ្ងន់ ។
ភ្លាមៗ ត្រូវបានក្រុមការហៅរថយន្តបញ្ជូនទៅកាន់មន្ទីរព្យេព្រះកុសុមៈ ហើយបានដាច់ខ្យល់ បាត់ទៅហើយ ។ គេមានការងឿងឆ្ងល់ហេតុអីបានជាសន្តិសុខ រូបនោះនៅសុខៗបានជាឡើង បើករថយន្តគណៈបញ្ជាការឯកភាពសង្កាត់ផ្សារដើមគរ ដែលបានទៅរៀបចំសណ្តាប់ធ្នាប់ជាមួយគ្នានោះ ។
តាមសន្តិសុខបានឲ្យដឹងថា ដោយសារតែស្ទះចរាចរណ៍ក៏បានឡើងបើករថយន្តនោះចេញហើយជាន់ហ្វ្រាំងមិនស៊ីក៏ជ្រុលទៅបុកតែម្តង ។ នគរបាលឲ្យដឹងថា សន្តិសុខរូបនោះពុំមានប័ណ្ណបើកបរនោះទេ ។ ក្រោយកើតហេតុនគរបាលបានចុះទៅវាស់វែង រួចបញ្ជូនរថយន្ត និងអ្នកបើកបរទៅកាន់ការិយាល័យចរាចរណ៍ផ្លូវគោក ដើម្បីចាត់ការតាមច្បាប់ ៕
ប្រភព៖ កោះសន្តិភាព
Bong I.T