​ដើម្បីជួយកាត់បន្ថយបញ្ហាប្លាស្ទិក ក្រុមហ៊ុនតូចមួយបានផលិតចានចេញពីស្លឹកចេក (មានវីដេអូ)

ប៉េរូ​៖ ក្រុមហ៊ុនមួយក្នុងប្រទេសប៉េរូ​បានផលិតចានដែល​កែច្នៃ​ចេញពីស្លឹកចេក​ហើយដាក់ឈ្មោះឲ្យវាថា Bio Plant ។ វាជាជម្រើសដ៏​ប្រសើរបំផុតដើម្បីជួយកាត់បន្ថយ​​កាកសំណល់ប្លាស្ទិក ដែលនាំឲ្យមានការបំពុលខ្យល់ និងមហាសមុទ្រ។

យោងតាមគេហទំព័រសារព័ត៌មាន Intelligent Living បានឲ្យដឹងថា ចានប្រភេទនេះអាចរលួយទៅវិញ​នៅក្នុងរយៈពេលពីរ​ខែ ចំណែកឯចាននិងរបស់វេចខ្ចប់ផ្សេងទៀតដែលផលិតចេញពីសារធាតុគីមី ត្រូវចំណាយពេលរហូតដល់ ៥០០ឆ្នាំឯណោះ។

Bio Plant គឺជា​គំនិតផ្តួចផ្តើមឡើងរបស់ក្រុមហ៊ុន Chuwa Plant Group ដែល​ជាផលិតផលចានស្លឹកចេកដែលអាចធន់នឹងកំដៅហើយអាចប្រើសម្រាប់អាហាររាវដូចជាស៊ុប និង​អាហារផ្សេងៗទៀត។

លោក Josué Soto ដែលជាអ្នកដឹកនាំគម្រោង Bio Plant បានប្រាប់គេហទំព័រសារព័ត៌មាន Intelligent Living ថា ពួកគេកំពុងធ្វើការយ៉ាងជិតស្និទ្ធជាមួយអ្នកផលិតតូចៗនៅក្នុងតំបន់ប៉េរូអាម៉ាហ្សូន។ ក្រៅ​ពីការផ្តល់ប្រាក់ចំណូលហើយនោះ ពួកគេបាននិងកំពុងផ្តល់ការបណ្តុះបណ្តាលបច្ចេកទេសដល់កសិករដើម្បីអាចរកប្រាក់ចំណេញបន្ថែមពីលើដំណើរការដាំដុះចេកឲ្យបានផលច្រើនទៀតផង។

​មនុស្សនៅជុំវិញពិភពលោកយើងនេះបានប្រើប្រាស់ប្លាស្ទិកច្រើនណាស់មកហើយ ដូច្នេះដើម្បីជាជម្រើសនៃការកាត់បន្ថយប្លាស្ទិក ពួកគេបានសម្រេចចិត្តប្រើប្រាស់របស់អស់ទាំងនេះ។

ដោយឡែកកន្លែងចាក់សំរាមនៅអាហ្រ្វិកខាងត្បូងត្រូវបានគេប្រកាសថា “បានកើនឡើងខ្ពស់បំផុត” ​នាយកដ្ឋានកិច្ចការបរិស្ថាន (DEA) និយាយថា សំរាម៩៨លានតោនត្រូវបានគេ​ចាក់ពេញនៅគ្រប់កន្លែងចាក់សំរាមចំនួន ៨២៦ របស់អាហ្វ្រិកខាងត្បូងជារៀងរាល់ឆ្នាំ៕