គិតត្រឹមព្រឹកនេះកម្ពុជាឈ្នះមេដាយសរុប២១ ខណៈ ៩ប្រភេទកីឡាទៀតបន្តការប្រកួតថ្ងៃនេះ!

ហ្វីលីពីន៖ គិតត្រឹមម៉ោង ៨:៣០នាទី (ម៉ោងក្នុងប្រទេសកម្ពុជា) ថ្ងៃទី០៤ ខែធ្នូ ឆ្នាំ២០១៩នេះ កម្ពុជា ឈ្នះបានមេដាយសរុប ២១ហើយនៅក្នុងព្រឹត្តិការណ៍ការប្រកួតកីឡាស៊ីហ្គេមលើកទី៣០ នៅប្រទេសហ្វីលីពីន។

កំពុងឈរនៅចំណាត់ថ្នាក់លេខ៩ ក្នុងតារាងមេដាយ កម្ពុជា ឈ្នះបានមេដាយមាស១ ប្រាក់៣ និងសំរឹទ្ធ១៧។ ក្នុងនោះចំណោមមេដាយសរុបទាំង២១នេះ បានមកពីប្រភេទកីឡា Arnis (គុនល្បុកត្តោ) ចំនួន២០ និងប្រភេទកីឡាសីប៉ាក់តាក្រចំនួន១ (មេដាយប្រាក់)។

យ៉ាងណាក៏ដោយ កម្ពុជានៅមានអត្តពលិក និងកីឡាសក្ដានុពលជាច្រើនទៀត ដែលកំពុងធ្វើការប្រកួត និងមិនទាន់ធ្វើការប្រកួត ហើយស្ថិតក្នុងការរំពឹងដណ្ដើមមេដាយជូនជាតិបន្ថែមដូចជា ប្រដាល់គុនខ្មែរ, ប្រដាល់ Kickboxing, ប្រដាល់សកល, ប៉េតង់, តេក្វាន់ដូ ជីជីតស៊ូ និងប្រភេទកីឡាមួយចំនួនទៀត។

បច្ចុប្បន្នប្រទេសដែលកំពុងឈរនៅលេខ១ក្នុងតារាងមេដាយគឺម្ចាស់ផ្ទះហ្វីលីពីន ដោយឈ្នះមេដាយសរុប៩៦ មានមាស៤៨ ប្រាក់៣១ និងសំរឹទ្ធ១៧។ ខណៈដែលប្រទេសដែលឈរនៅចំណាត់ថ្នាក់ក្រោមគេបំផុតគឺទីម័រខាងកើត មិនទាន់ឈ្នះមេដាយបានមួយនៅឡើយ។

សម្រាប់នៅថ្ងៃទី០៤ ខែធ្នូនេះ កម្ពុជានឹងបន្តប្រកួតប្រជែងនៅលើប្រភេទកីឡាចំនួន៩ទៀតរួមមាន ប៉េតង់, សីដក់, បាល់ទះក្នុងសាល, វាយកូនបាល់, បាល់ទាត់, បេស្បល, ប្រដាល់សកល, ហែលទឹក និងហុកគី៕