ខេត្តសៀមរាប ៖ ករណីបាក់សំណង់បេតុងប្លង់សេសាលាឆាន់ដែលកំពុងសាងសង់នេះ គឺមូលហេតុមកពីមេការសំណង់មិនបានពិនិត្យគ្រប់ជ្រុងជ្រោយលើជន្ទល់ទ្របានន័យថា មានការធ្វេសប្រហែស ទើបធ្វើឱ្យបាក់ទាំងផ្ទាំងសង្កត់មកលើមនុស្ស បណ្តាលឱ្យមានអ្នកបាត់បង់ជីវិតមនុស្សជាបន្តបន្ទាប់រហូតដល់៣នាក់ និងរបួសធ្ងន់ស្រាល១៣នាក់ ព្រមទាំងព្រះសង្ឃ១អង្គផងដែរ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសូមរំលឹកថា យ៉ាងហោចណាស់ ជនរងគ្រោះបានកើនដល់១៦នាក់ ហើយត្រូវបានជួយសង្គ្រោះ ចេញពីក្រោមសំណង់ប្លង់សេសាលាឆាន់ដែលបាក់ក្នុងពេលកំពុងចាក់បេតុងសាងសង់នៅវត្តប្រាសាទគោកចក សង្កាត់គោកចក ក្រុងសៀមរាប ខេត្ដសៀមរាប ក្នុងនោះ៣នាក់បានស្លាប់បាត់បង់ជីវិត និង១៣នាក់ រងរបួសធ្ងន់និងស្រាល ។
សមត្ថកិច្ចនៅកន្លែងកើតហេតុដែលកំពុងជួយសង្គ្រោះបានឲ្យដឹងថា មនុស្សទាំង៣នាក់ដែលបានស្លាប់នោះ មានម្នាក់ស្លាប់នៅកន្លែងកើតហេតុ និង២នាក់ស្លាប់នៅមន្ទីរពេទ្យបង្អែកខេត្តសៀមរាប ក្រោយពេលនាំទៅធ្វើការសង្គ្រោះ ។ក្រុមជួយសង្គ្រោះ៧១១ នៃកងពលតូចលេខ៧០ ក៏កំពុងចេញទៅជួយសង្គ្រោះដោយសហការ ជាមួយគណៈកម្មាធិការជាតិគ្រប់គ្រងគ្រោះមហន្ដរាយ និងអាជ្ញាធរ សមត្ថកិច្ចពាក់ព័ន្ធជាច្រើននាក់ទៀត ក្នុងហេតុការណ៍ដ៏តក់ស្លុតនេះក៏មានវត្តមានលោក ទៀ សីហា អាភិបាលខេត្តបានទៅពិនិត្យសភាពការណ៍ជាក់ស្តែង ។
សូមជម្រាបថា នៅវេលាម៉ោងប្រមាណ៣រសៀលថ្ងៃទី២ ធ្នូ មានហេតុការណ៍បាក់ប្លង់សេសាលាឆាន់កម្ពស់៨ម៉ែត្រ ដែលមានទំហំ៣០ម៉ែត្រ គុណ២០ម៉ែត្រដែលកំពុងសាងសង់ នៅក្នុងវត្តប្រាសាទគោកចក ។លោកទេសរដ្ឋមន្ដ្រី គន់ គីម បានថ្លែងអំណរគុណដល់អាជ្ញាធរខេត្ត និងជាប្រធានគណៈកម្មការគ្រប់គ្រងគ្រោះមហន្ដរាយខេត្តសៀមរាប ដែលបានដឹកនាំបញ្ជាកងកម្លាំងប្រដាប់អាវុធ សហការជាមួយប្រជាពលរដ្ឋធ្វើការជួយសង្គ្រោះដល់ជនរងគ្រោះយ៉ាងសស្រាក់សស្រាំ តាំងពីពេលកើតហេតុដំបូងរហូតមក ។
អ្នកស្លាប់ទាំង៣នាក់ រួមមាន៖ទី១-ឈ្មោះ លី សំណាង ភេទប្រុស អាយុ២៨ឆ្នាំទី២-ឈ្មោះ យិន សំណាង ភេទប្រុស អាយុ៣៥ឆ្នាំទី៣-ឈ្មោះ ឡន ឡក់ ភេទប្រុស អាយុ៤០ឆ្នាំ ។
បើតាមសមត្ថកិច្ចនគរបាលខេត្តបានប្រាប់ថា ករណីបាក់ប្លង់សេសាលាឆាន់ របស់វត្តប្រាសាទគោកចក ដែលកំពុងសាងសង់នោះ ត្រូវបានគេមើលឃើញថាគឺជាការធ្វេសប្រហែសរបស់វិស្វករសំណង់ ។ ប្រភពបានបញ្ជាក់ថា ជនរងគ្រោះដែលស្លាប់៣នាក់ និង របួសធ្ងន់ ស្រាល១៣នាក់ ក៏រួមមានទាំងព្រះសង្ឃ១អង្គផង ដែលកំពុងជួយសង្គ្រោះបន្ទាន់នៅក្នុងមន្ទីរពេទ្យបង្អែកខេត្ត ៕
ប្រភព៖ កោះសន្តិភាព