អាល្លឺម៉ង់៖ ប្រធានផ្នែកកីឡាររបស់ក្លិប Borussia Dortmund លោក Michael Zorc បានបញ្ជាក់ថាលោកមិនមានគម្រោងក្នុងការលក់កីឡាករ Jadon Sancho នៅខែមករាខាងមុខនេះទេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកាលពីសប្ដាហ៍មុនមានរបាយការណ៍ជាច្រើនបានបញ្ជាក់ថាកីឡាករ Jadon Sancho ហាក់មិនសប្បាយចិត្តជាមួយនឹងក្លិប Dortmund បន្ទាប់ពីរូបគេត្រូវបានប្ដួរចេញត្រឹមនាទីទី៣០ ក្នុងការប្រកួតទល់នឹងក្រុម Bayern Munich ។ មិនត្រឹមតែប៉ុណ្ណោះរូបគេ ក៏ត្រូវបានដាក់ឲ្យនៅជាកីឡាករបម្រុងក្នុងការប្រកួតចាញ់ក្រុម Barcelona ៣-១ ក្នុងក្របខណ្ឌ Champions League កាលពីថ្ងៃពុធកន្លងទៅនេះផងដែរ ។
តាមរយៈរបាយការណ៍បានឲ្យដឹងថា មូលហេតុដែល Sancho មិនបានជាប់ជម្រើស១១នាក់ដំបូងគឺដោយសារតែខ្សែបម្រើស្លាបវ័យ១៩ឆ្នាំរូបនេះ ចូលរួមការប្រជុំក្រុមមុនការប្រកួតយឺត។
ក្រោយបរាជ័យក្រោមថ្វីជើងក្រុម Barcelona មានព័ត៌មានចចាមអារ៉ាមជាច្រើនចុះផ្សាយថាកីឡាករ Jadon Sancho នឹងចាកចេញពីក្លិប Dortmund ទៅចូលរួមជាមួយនឹងក្លិបធំៗផ្សេងទៀតនៅអឺរ៉ុបនាខែមករាខាងមុខ។
ឆ្លើយតបទៅនឹងព័ត៌មានខាងលើនេះ លោក Michael Zorc បានថ្លែងក្នុងសន្និសិទកាសែតថា៖
"ពួកយើងបានធ្វើការពិភាក្សាគ្នាច្បាស់លាស់ជុំវិញរឿងផ្ទៃក្នុង ក្នុងក្រុមជាមួយគាត់ផ្ទាល់។ រឿងនេះបានបញ្ចប់ហើយ ដោយពួកយើងកំពុងសម្លឹងទៅមុខជាមួយគ្នា ហើយ Jadon ជាផ្នែកមួយសំខាន់ក្នុងក្រុមរបស់យើង។"
លោក Michael Zorc បានបន្តទៀតថា៖
"ខ្ញុំគិតថា Jadon ធ្វើបានល្អពេលដែលគាត់ប្ដូរចូលលេងទល់នឹងក្រុម Barca។ រឿងនេះមិនបានធ្វើឲ្យខ្ញុំចាប់អារម្មណ៍នោះទេ ព្រោះយើងមិនមានគម្រោងលក់គាត់នារដូវរងាខាងមុខ ហើយពួកយើងក៏បាននិយាយគ្នាផ្ទាល់ជាមួយគាត់និងភ្នាក់ងាររបស់គាត់ផងដែរ៕"
ប្រភព៖ strettynews
Bong I.T