ចិន៖ បុរសចិនអាយុ៤៦ឆ្នាំដែលមានមុខរបរជាជាងសំណង់មានអាការប្រគីវកាច់ និងថែមទាំងរកឃើញមានតេនញ៉ានៅក្នុងខួរក្បាលទៀតផង ដោយគេសង្ស័យថាគាត់បរិភោគសាច់ឆៅ។ បុរសម្នាក់ត្រកូល Zhu មកពីក្រុង Quzhou ភាគខាងកើតខេត្ត Zhejiang ហើយកាលពីខែមុនគាត់បានទិញសាច់ជ្រូកនិងសាច់ចៀមមកធ្វើស៊ុបឆ្នាំងភ្លើងហឹរមួយឆ្នាំង។​ នេះបើយោងតាមសេចក្តីរាយការណ៍របស់សារព័ត៌មាន CNN ។

រូបតំណាង

ប៉ុន្មានថ្ងៃក្រោយមកគាត់មានអាការវិលមុខ និងឈឺក្បាលពេញមួយថ្ងៃ ហើយនៅពេលយប់គាត់មានអាការប្រគីវកាច់នៅពេលគាត់កំពុងសម្រាន្ត។ អ្នកធ្វើការជាមួយលោក Zhu បានបញ្ជូនគាត់ទៅមន្ទីរពេទ្យបង្អែកនៅជិតនោះ រួចគាត់ក៏ត្រូវបានស្កេនមើលខួរក្បាល និងបានរកឃើញថាមានដំបៅ។ ប៉ុន្តែលោក Zhu បានបដិសេធនិងមិនព្រមពិនិត្យបន្ត ដោយសារលោកគ្មានលុយនិងចង់ត្រឡប់ទៅផ្ទះវិញ។ ទោះជាយ៉ាងណាអាការរបស់លោក Zhu នៅតែដដែល ហើយចុងក្រោយគាត់ត្រូវបានបញ្ជូនទៅមន្ទីរពេទ្យសាកលវិទ្យាល័យ Zhejiang និងបានពិនិត្យឃើញមានតេនញ៉ានៅក្នុងខួរក្បាលរបស់គាត់។

តេនញ៉ាបានចូលខួរក្បាលរបស់គាត់ ដោយសារបរិភោគសាច់ឆៅ

បន្ទាប់ពីដឹងថាលោក​Zhu ទើបទទួលទានស៊ុបឆ្នាំងភ្លើងកាលពីពេលថ្មីៗកន្លងទៅរួច លោកប្រធានមន្ទីរពេទ្យបានប៉ាន់ស្មានថាសាច់ជ្រូកនិងសាច់ចៀមដែលលោក Zhu បរិភោគគឺមានផ្ទុកតេនញ៉ាហើយគាត់មិនបានចម្អិនវាឲ្យឆ្អិនល្អ។ លោក Zhu បានបញ្ជាក់ថាគាត់បានកម្ដៅសាច់តែបន្តិចទេ ហើយនៅបាតឆ្នាំងសុទ្ធតែទឹកម្ទេសដែលធ្វើឲ្យលោកពិបាកមើលដឹងថាសាច់បានចម្អិនល្អហើយឬនៅ។ បន្ទាប់ពីទទួលបានការព្យាបាល និងត្រូវបានគេយកតេនញ៉ាចេញពីខួរក្បាល ទើបលោក Zhu មានអាការធូរស្បើយឡើងវិញ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 085836679 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 085836679 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សម្រស់ & សុខភាព និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]