ភ្នំពេញ៖ នាព្រឹកថ្ងៃទី២៧ ខែវិច្ឆិកា ឆ្នាំ២០១៩ នេះក្រុមហ៊ុន តូយ៉ូតា (ខេមបូឌា) ដែលជាក្រុមហ៊ុនត្រូវបានទទួលស្គាល់នូវសិទ្ធិនាំចូល និងចែកចាយផ្ដាច់មុខលើផលិតផលយានយន្ដ និងគ្រឿងបន្លាស់ម៉ាកតូយ៉ូតា បានរៀបចំនូវពិធីប្រគល់អាហារូបករណ៍បច្ចេកទេសជួសជុលរថយន្តជូនចំពោះសិស្សក្រីក្រជំនាន់ទី៨ និងពិធីអបអរសាទរការបញ្ចប់ថ្នាក់អាហារូបករណ៍ជំនាញ បច្ចេកទេសជួសជុលរថយន្តរបស់សិស្សកី្រក្រជំនាន់ទី៦ ក្រោមអធិបតីភាពលោកឧកញ៉ា គង់ នួន ប្រធានក្រុមហ៊ុន តូយ៉ូតា (ខេមបូឌា) លោក ហ៊ីរ៉ូយូគិ អ៊ីតុ អគ្គនាយកក្រុមហ៊ុន លោក ស៊ឹម សុរិន្ទ នាយកសាលា ហ្ស៊ី វ៉េ សេ (JVC) ថ្នាក់ដឹកនាំក្រុមហ៊ុន និងប្អូនៗដែលជាសិស្សអាហារូបករណ៍ទាំងអស់ផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
មានប្រសាសន៍នៅក្នុងកម្មវិធីនោះលោកឧកញ៉ា គង់ នួន ប្រធានក្រុមហ៊ុន តូយ៉ូតា (ខេមបូឌា) បានថ្លែងឲ្យដឹងថា៖
“ឆ្នាំនេះគឺជាឆ្នាំទី៨ហើយ ដែលក្រុមហ៊ុន តូយ៉ូតា (ខេមបូឌា) ធ្វើការប្រគល់នូវអាហារូបករណ៍ ជូនដល់សិស្សក្រីក្រ ដែលពុំមានលទ្ធភាពក្នុងការបង់ថ្លៃសិក្សា ដើម្បីឲ្យពួកគាត់មានឱកាស ទទួលបាននូវចំណេះដឹង ចំណេះធ្វើ និងជំនាញមួយច្បាស់លាស់ ដែលពាក់ព័ន្ធនឹងបច្ចេកទេសជួសជុលរថយន្ត ក៏ដូចជាដើម្បីចូលរួមដល់ការបណ្តុះបណ្តាលធនធានមនុស្ស ក្នុងវិស័យយានយន្ត និងរួមចំណែកកាត់បន្ថយភាពក្រីក្រនៅក្នុងប្រទេសកម្ពុជា។ ស្របពេលដែលកំណើននៃការលក់រថយន្ត និងតម្រូវការទីផ្សារការងារនៃជាងជួសជុលរថយន្តមានការកើនឡើងពីមួយឆ្នាំទៅមួយឆ្នាំ គួរឲ្យកត់សម្គាល់ផងដែរនោះលោកឧកញ៉ាបានសរបញ្ជាក់ថា កម្មវិធីអាហារូបករណ៍នេះ គឺជាការចូលរួមចំណែកមួយយ៉ាងសកម្មក្នុងការបង្កើនការបណ្តុះបណ្តាលធនធានមនុស្សក្នុងវិស័យយានយន្តនៅក្នុងសង្គម”។
ជាមួយគ្នានេះផងដែរ លោកឧកញ៉ាបានធ្វើការរំលឹកឡើងថា៖
“គិតមកដល់ឆ្នាំសិក្សា ២០១៨-២០១៩ នេះ សិស្សអាហារូបករណ៍របស់ក្រុមហ៊ុន តូយ៉ូតា (ខេមបូឌា) មានចំនួនសរុប៧៩រូប ដែលក្នុងនោះសិស្សអាហារូបករណ៍ជំនាន់ទី១ មាន១៦រូប សិស្សជំនាន់ទី២មាន១០រូប សិស្សជំនាន់ទី៣មាន១០រូប សិស្សជំនាន់ទី៤មាន១០រូប សិស្សជំនាន់ទី៥ មាន៩រូប សិស្សជំនាន់ទី៦ មាន១១រូប ដែលពួកគាត់ទើបតែប្រលងបញ្ចប់ការសិក្សាកាលពីខែសីហាកន្លងទៅនេះ និងសិស្សជំនាន់ទី៧ មាន១៣រូប ដែលពួកគាត់កំពុងបន្តការសិក្សានៅសាលា។ លើសពីនេះទៅទៀត ក្រុមហ៊ុនក៏បានប្រគល់អាហារូបករណ៍ (រួមមាន៖ ថ្លៃសិក្សា ការស្នាក់នៅ និងប្រាក់ឧបត្ថម្ភប្រចាំខែ) ជូនដល់សិស្សក្រីក្រជំនាន់ទី៨ ចំនួន ៩រូប ផ្សេងទៀត ដែលមកពីបណ្តាខេត្ត៧ផ្សេងៗគ្នារួមមានៈ ខេត្តស្ទឹងត្រែង កំពត តាកែវ កណ្តាល ខេត្តកំពង់ឆ្នាំង រាជធានីភ្នំពេញ និងខេត្ដព្រះសីហនុ ឲ្យសិក្សានិងស្នាក់នៅនៅសាលាមធ្យមសិក្សាបច្ចេកទេស ហ្ស៊ី វ៉េ សេ (JVC) ផងដែរ”។
ឆ្លៀតក្នុងឱកាសនេះលោកឧកញ៉ា ក៏បានសម្តែងនូវសេចក្តីត្រេកអរដល់សិស្សជំនាន់ទី៦ ទាំង ១១រូប ដែលពួកគាត់បានតស៊ូអស់ពីកម្លាំងកាយចិត្ត ដើម្បីប្រលងបញ្ចប់ការសិក្សាជាមួយនឹងលទ្ធផលដ៏ល្អប្រសើរ ហើយពួកគាត់ទាំងអស់ទទួលបានការងារធ្វើគ្រប់ៗគ្នា នៅតាមស្ថាប័នក្នុងប្រទេស ក្រៅប្រទេស និងយានដ្ឋានផ្សេងៗជាមួយនឹងជំនាញច្បាស់លាស់ ដែលអាចទទួលបាន ប្រាក់ចំណូលសមល្មមក្នុងការផ្គត់ផ្គង់ខ្លួនឯង និងក្រុមគ្រួសារផងដែរ។
អ្វីដែលកាន់តែគួរឲ្យកោតសរសើរទៀតនោះ ក្រៅពីការផ្តល់អាហារូបករណ៍ជូនដល់និស្សិតក្រីក្រ ក្រុមហ៊ុន តូយ៉ូតា ក៏បានរួមចំណែកក្នុងកិច្ចការសង្គមជាច្រើនដូចជា៖ ការប្រគំតន្រ្តីសប្បុរសធម៌តូយ៉ូតាក្លាស៊ិកនេះ ការប្រកួតគំនូររថយន្តតូយ៉ូតាក្នុងក្តីស្រមៃ ការបរិច្ចាគមូលនិធិសម្រាប់គាំទ្រលើផ្នែកសុខភាព និងវេជ្ជសាស្រ្ត ការអប់រំលើសុវត្ថិភាពចរាចរណ៍ ការចូលរួមដាំកូនឈើ ការរួមចំណែកក្នុងសកម្មភាពបរិស្ថាន និងរើសសំរាម និងការប្រកួតកីឡាបាល់ទាត់សម្រាប់កុមារ ជាដើម៕
Bong I.T