Dortmund ចូលខ្លួនមកប្រជែងក្លិបធំ៣ ក្នុងការឆក់យកគ្រាប់ពូជម្នាក់របស់លោក Mourinho

អង់គ្លេស៖ បើតាមសេចក្ដីរាយការណ៍បានឲ្យដឹងថាក្លិប Borussia Dortmund បានចាប់អារម្មណ៍ចង់បានខ្សែប្រយុទ្ធវ័យក្មេងរបស់ក្លិបមាន់ខ្នាយមាស Tottenham Hotspur កីឡាករ Troy Parrott នៅទីផ្សារដោះដូរកីឡាកររដូវក្ដៅលើកក្រោយ។

ខ្សែប្រយុទ្ធវ័យ ១៧ឆ្នាំបានផ្លាស់មកចូលរួមជាមួយក្លិបមានមូលដ្ឋាននៅប៉ែកខាងជើងទីក្រុងឡុងដ៍កាលពីឆ្នាំ២០១៧ និងបានបង្ហាញខ្លួនជាលើកដំបូងក្នុងក្រុមធំកាលពីខែតុលាកន្លងទៅ ក្នុងជំនួបជាមួយក្រុម Colchester United ក្នុងការប្រកួតពានរង្វាន់ EFL Cup។

បន្ថែមលើសពីនេះ Parrott ក៏បានចូលលេងជាលើកដំបូងឲ្យក្រុមជម្រើសជាតិឈុតធំសាធារណរដ្ឋអៀរឡង់ផងដែរអំឡុងការប្រកួតដែលអៀរឡង់ យកឈ្នះនូវែលហ្ស៊ែឡង់ ក្នុងលទ្ធផល ៣ទល់នឹង១ កាលពីដើមខែនេះ។

បើតាមការចុះផ្សាយរបស់កាសែតក្នុងប្រទេសអង់គ្លេស Dortmund គឺក្លិបមួយចុងក្រោយហើយដែលបានដាក់ការចាប់អារម្មណ៍ចង់បានមកលើខ្សែប្រយុទ្ធវ័យក្មេង ដែលត្រូវបានគេព្យាករណ៍ថានឹងក្លាយជា Harry Kane ទីពីរ។

ឲ្យដឹងដែរថា ក្រៅពី Dortmund ខ្សែប្រយុទ្ធកម្ពស់ ១.៨៥ម៉ែត្រ Parrott នៅមានក្លិបធំ៣ចាប់អារម្មណ៍ទៀត រួមមាន Bayern Munich, Juventus និង Real Madrid៕

ប្រភព៖ SportsMole