អង់គ្លេស៖ ខ្សែប្រយុទ្ធសញ្ជាតិហ្គាបុង កីឡាករ Pierre-Emerick Aubameyang បានពន្យាពេលការពិភាក្សាបន្តកិច្ចសន្យាថ្មីជាមួយនឹងក្លិប ដោយរង់ចាំអ៊ុតមើលក្លិប Barcelona ចូលមកចែចូវយករូបគេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកីឡាករវ័យ៣០ឆ្នាំរូបនេះ បច្ចុប្បន្នកំពុងជាប់កុងត្រាជាមួយនឹងក្លិប Arsenal រហូតដល់ឆ្នាំ២០២១ឯណោះ ក្រោយដឹងថាក្រុម Barcelona ចាប់អារម្មណ៍លើរូបគេ កីឡាកររូបនេះក៏សម្រេចចិត្តពន្យាពេលចរចារជាមួយនឹងក្លិប Arsenal ជុំវិញការបន្តកុងត្រាថ្មី ដោយរង់ចាំមើលថាក្លិប Barcelona ចង់បានរូបគេដល់កម្រិតណា។
យោងតាមកាសែត The Mirror បានអោយដឹងថា ក្លិប Arsenal ចង់រក្សាទុកខ្សែប្រយុទ្ធរូបនេះ ដោយបានរៀបចំបើកកិច្ចពិភាក្សាការបន្តកុងត្រាថ្មីនៅសប្ដាហ៍នេះ ប៉ុន្តែអ្វីដែលគួរអោយភ្ញាក់ផ្អើលនោះគឺ កីឡាករ Aubameyang បានបដិសេធការអញ្ជើញ ដោយសម្រេចចិត្តពន្យាពេលចរចា។
ហើយបើយោងតាមកាសែត Don Balon បានអោយដឹងថាក្លិប Barcelona ចាប់អារម្មណ៍ចង់បានខ្សែប្រយុទ្ធរូបនេះ ទៅជំនួសកន្លែងកីឡាករ Luis Suarez។
គួររម្លឹកផងដែរថា កីឡាករ Pierre-Emerick Aubameyang បានចាកចេញពីក្លិប Borussia Dortmund មកចូលរួមជាមួយនឹង Arsenal កាលពីឆ្នាំ២០១៨ ក្នុងតម្លៃផ្ទេរ៦៣លានអឺរ៉ូ (ឬប្រហែល ៧០លានដុល្លារអាមេរិក) ដោយបង្ហាញខ្លួនសរុបបានចំនួន ៧៩ប្រកួត ស៊ុតបញ្ចូលទីបាន ៥០គ្រាប់ និងបញ្ជូនបាល់អោយមិត្តរួមក្រុមសម្រេចទីបានចំនួន១២ដង ដែលនេះជាស្ថិតិល្អមួយទាក់ទាញចំណាប់អារម្មណ៍ក្លិប Barcelona៕
ប្រភព៖ Caughtoffside