កំហុសមួយចំនួនដែលមនុស្សជាច្រើនបានប្រព្រឹត្តដោយមិនដឹងខ្លួននៅតំណាក់កាលដំបូងដែលគេបានក្លាយជាមនុស្សពេញវ័យ ដែលអាចនឹងធ្វើឲ្យគេមានការស្តាយក្រោយក្នុងជីវិត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. មិនខ្វល់ពីសុខភាព
មានមនុស្សវ័យក្មេងជាច្រើនដែលចូលចិត្តមិនសូវជាខ្វាយខ្វល់ពីសុខភាព។ នេះក៏ប្រហែលជាដោយសាររាងកាយរបស់ពួកគេនៅរឹងមាំនៅឡើយ។ មនុស្សវ័យក្មេងមួយចំនួនខិតខំរៀន ឬ ធ្វើការរហូតភ្លេចបាយទឹក ឬគេងឲ្យបានគ្រប់គ្រាន់ ហើយមួយចំនួនទៀតចូលចិត្តផឹកស្រាក្នុងបរិមាណមួយយ៉ាងច្រើន និងទទួលទានចំណីអាហារដែលមិនល្អសម្រាប់សុខភាព។
ទង្វើបែបនេះ អាចនឹងមិនផ្តល់ផលអាក្រក់នៅពេលនេះ តែនៅពេលវ័យរបស់អ្នកកាន់តែចាស់ទៅ សុខភាពរបស់អ្នកនឹងចាប់ផ្តើមចុះទ្រុឌទ្រោមយ៉ាងលឿនជាទីបំផុត។ អ្នកត្រូវចាំថា មនុស្សយើងមិនមែនរស់នៅត្រឹម ២០ ៣០ឆ្នាំឡើយ ដូចនេះហើយ អ្នកត្រូវថែរក្សាសុខភាពអ្នកឲ្យបានល្អ។ នៅពេលដែលជម្ងឺដង្កាត់ផ្សេងៗចូលមកញាំញីរូបរាងកាយអ្នកហើយ មិនថាអ្នកមានទ្រព្យសម្បត្តិច្រើនយ៉ាងណា ក៏មិនអាចមានសុភមង្គលបានដែរ៕
២. ការយល់ថាឲ្យតែរៀនពូកែ គឺគ្រប់គ្រាន់ហើយ
នេះគឺជាការយល់ខុសដ៏ធ្ងន់ធ្ងរមួយដែលមនុស្សជាច្រើនមាន។ ថ្វីត្បិតតែបញ្ញាវៀងវៃ ទេពកោសល្យពីធម្មជាតិ និងសញ្ញាប័ត្រពីមហាវិទ្យាល័យល្អៗពិតជាមានសារសំខាន់ របស់ទាំងនេះមិនអាចធានាបានទេថា អ្នកនឹងទទួលបានការងារដ៏ល្អប្រសើរ ឬក្លាយជាអ្នកជំនួញដ៏ប៉ិនប្រសប់។ អ្នកដែលរៀនពូកែ មិនប្រាកដថាប៉ិនប្រសព្វក្នុងការធ្វើការងារនោះទេ។ និយាយឲ្យស្រួលស្តាប់ទៅ បញ្ញា ទេពកោសល្យ និងសញ្ញាប័ត្រ មិនអាចប្រៀបផ្ទឹមបានជាមួយនឹងបទពិសោធន៍ និងសេចក្តីឧស្សាហ៍ព្យាយាមបាននោះឡើយ។
៣. ការឲ្យអ្នកដទៃជ្រើសរើសគោលដៅឲ្យ
ស្របពេលដែលអ្នកកំពុងតែឈានទៅរកការពេញវ័យ អ្នកត្រូវសម្រេចជ្រើសរើសយកគោលដៅសម្រាប់ជីវិតរបស់អ្នក។ តើអ្នកគួររៀនអ្វី? ចាប់យកមុខរបរអ្វី? រៀបការជាមួយនរណាគេ? ចម្លើយនៃសំនួរទាំងនេះមានសារសំខាន់ណាស់ក្នុងជីវិតរបស់អ្នក។ ក៏ប៉ុន្តែមានយុវវ័យមួយចំនួនបែរជាឲ្យអ្នកដទៃ មានគ្រួសារ និងឳពុកម្តាយជាដើម ឆ្លើយសំនួរទាំងនេះជំនួសពួកគេទៅវិញ។ នេះគឺជាកំហុសដ៏ធំមែនទែនក្នុងជីវិត។ មានតែខ្លួនអ្នកទេដែលដឹងថា ខ្លួនឯងស្រលាញ់អ្វី និងចង់បានអ្វី។ ប្រសិនជាអ្នកឲ្យអ្នកដទៃមកធ្វើការសម្រេចចិត្តនៅក្នុងជីវិតរបស់អ្នក វាមិនខុសពីខ្ចីខ្លួនគេមកវាស់កាត់អាវដើម្បីពាក់ខ្លួនឯងនោះឡើយ។ មិនយូរមិនឆាប់ អ្នកប្រាកដជាស្តាយក្រោយជាក់ជាមិនខាន។
៤. ការមិនមានការអត់ធ្មត់
មនុស្សវ័យក្មេងភាគច្រើនរមែងតែខ្វះសេចក្តីអត់ធ្មត់ និងមានអារម្មណ៍ឆេវឆាវ។ នេះគឺជាមូលហេតុដ៏ធំដែលធ្វើឲ្យពួកគេទទួលបរាជ័យ នៅពេលដែលគេក្លាយទៅជាមនុស្សពេញវ័យ ប្រសិនជាគេមិនបានកែប្រែវាទាន់ពេលវេលា។ គ្រប់ជោគជ័យទាំងអស់សុទ្ធតែត្រូវការពេលវេលារបស់វា ដូច្នេះអ្នកមិនអាចចេះតែបង្ខំខ្លួនពេលវេលាបានឡើយ។
៥. ការចុះញមចំពោះភាពបរាជ័យ
លោក Jack Ma ដែលជាមហាសេដ្ឋីម្នាក់ប្រចាំប្រទេសចិនធ្លាប់ប្រលងចូលមហាវិទ្យាល័យធ្លាក់បីឆ្នាំជាប់គ្នា ឯចំណេកលោក Steve Job ក៏ធ្លាប់ត្រូវបានគេបណ្តេញចេញពីក្រុមហ៊ុនដែលខ្លួនឯងបានចូលរួមបង្កើតឡើង។ បើសិនជា លោកទាំងពីរបានចុះចាញ់នៅពេលនោះ តើអ្នកគិតថាពួកគាត់អាចទទួលជោគជ័យក្នុងជីវិតដែរឬទេ? ពិតណាស់ គ្មាននរណាដែលចង់ទទួលបានភាពបរាជ័យនោះទេ ប៉ុន្តែពេលខ្លះ យើងមិនអាចគេចចេញពីវាបាន។ សំខាន់បំផុត អ្នកមិនត្រូវចុះចាញ់វាភ្លាមៗ នោះឡើយ។ ភាពបរាជ័យក្នុងវ័យក្មេង មិនជាធ្ងន់ធ្ងរណាស់ណានោះឡើយ ព្រោះអ្នកនៅមានពេលវេលាច្រើនសម្រាប់កែប្រែវា ហើយចាត់ទុកភាពបរាជ័យនោះជាបទពិសោធន៍។