មកដល់ Spurs ភ្លាម Mourinho ដាក់គោលដៅទិញយកកំពូលខ្សែប្រយុទ្ធម្នាក់របស់ Juventus!

អង់គ្លេស៖ ក្រោយចូលមកដឹកនាំក្លិបមាន់ខ្នាយមាស Tottenham Hotspur លោក Jose Mourinho បានដាក់គោលដៅដំបូងក្នុងការនាំយកខ្សែប្រយុទ្ធរបស់ Juventus កីឡាករ Pualo Dybala នៅទីផ្សារដោះដូរកីឡាករខែមករាខាងមុខ។

ក្រោយចាញ់ Liverpool ក្នុងវគ្គផ្ដាច់ព្រ័ត្រពានរង្វាន់ Champions League រដូវកាលមុនបូករួមជាមួយការកំពុងឈរនៅចំណាត់ថ្នាក់លេខ១៤នៅរដូវកាលនេះ លោក Mauricio Pochettino ត្រូវបានបណ្ដេញចេញពីដំណែងអ្នកចាត់ការទូទៅរបស់ Spurs កាលពីម្សិលមិញ។

យោងតាមការចុះផ្សាយរបស់កាសែតក្នុងប្រទេសអង់គ្លេសសំណើជាលើកដំបូងរបស់អ្នកចាត់ការទូទៅថ្មីលោក Mourinho ដាក់ទៅកាន់ប្រធានក្លិប Spurs លោក Daniel Levy គឺការទិញ Paulo Dybala។

ចំពោះតម្លៃខ្លួនរបស់ខ្សែប្រយុទ្ធជម្រើសជាតិអាហ្សង់ទីនរូបនេះវិញ Spurs ទំនងអាចនឹងចំណាយប្រាក់ប្រមាណជា ១០០លានអឺរ៉ូសម្រាប់នាំយករូបគេមកកាន់កីឡដ្ឋាន White Hart Land ដើម្បីចាប់ដៃគូជាមួយ Harry Kane នៅតំបន់ខាងលើ។

គួរឲ្យដឹងដែរថា Dybala បានក្លាយជាកីឡាករសំខាន់មួយរូបរបស់លោក Maurizio Sarri នៅ Juventus ក្នុងរដូវកាលនេះ ក្រោយកាលពីរដូវកាលមុនគេមិនសូវជាមានឱកាសក្នុងការបង្ហាញសមត្ថភាពលើវាលស្មៅ៕

ប្រភព៖ Marca