ភ្នំពេញ៖ ទីបំផុតនារាត្រីថ្ងៃទី១៩ ខែវិច្ឆិកា យប់មិញនេះ ព្រះសពរបស់សម្តេចរាជបុត្រី ព្រះរៀម នរោត្តម បុប្ផាទេវី ត្រូវបានដឹកតាមយន្តហោះពីទីក្រុងបាំងកក ប្រទេសថៃ ឆ្ពោះមកកាន់ទីក្រុងភ្នំពេញ ដោយសុវត្ថិភាព និងប្រុងប្រយ័ត្នបំផុត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាក់ស្តែង ដំណើរមកដល់ទឹកដីមាតុភូមិកំណើតវិញនេះ យើងសង្កេតឃើញថា មានប្រជារាស្រ្តខ្មែរជាច្រើន បាននាំគ្នាមកឈររងចាំហែរហមទទួលដំណើរ ព្រះសពរបស់សម្តេចរាជបុត្រី ព្រះរៀម នរោត្តម បុប្ផាទេវី តាំងពីនៅអាកាសយានដ្ឋានភ្នំពេញ រហូតដល់ព្រះបរមរាជវាំង ពោរពេញទៅដោយភាពក្តុកក្តួលយ៉ាងក្រៃលែង។
ដោយឡែក មិនថាយ៉ាងណាក្នុងនោះផងដែរ ក៏ស្រាប់តែមានចំណុចមួយដែលធ្វើឲ្យមហាជន មានការកត់សម្គាល់ជាខ្លាំង នោះគឺព្រះទីនាំងដែលបានធ្វើការដឹកព្រះសពរបស់ទ្រង់ ពីព្រលានយន្តហោះ ទៅកាន់នៅវត្តបទុមវតីតែម្តង។
នេះបើយោងតាម រីដេអូក៏ដូចជារូបថតជាច្រើនសន្លឹក ដែលបានថតពីទិដ្ឋភាពនៃការទទួលព្រះសព សម្តេចរាជបុត្រី ព្រះរៀម នរោត្តម បុប្ផាទេវី ចុះពីយន្តហោះដឹកតាមព្រះទីនាំងនោះ គឺត្រូវបានគេឃើញថា ព្រះទីនាំងដែលគេប្រើប្រាស់ដើម្បីដឹកព្រះសពរបស់ទ្រង់ គឺជាប្រភេទរថយន្ត តូរីស ១២កៅអី ដឹកអ្នកដំណើរយ៉ាងសាមញ្ញបំផុត រហូតធ្វើឲ្យមហាជនផ្ទុះការខកចិត្ត និងឈឺចាប់យ៉ាងខ្លាំង ចំពោះភាពមិនសាកសមមួយនេះ។
ហើយនៅពេលនេះផងដែរ មហាជនជាច្រើន ក៏បានធ្វើការចោទជាសំណួរ ក៏ដូចជាកំពុងរង់ចាំការបកស្រាយពីថ្នាក់ដឹកនាំដែលពាក់ព័ន្ធ ទាក់ទងទៅនឹងព្រះទីនាំង ដែលដឹកព្រះសព របស់សម្តេចរាជបុត្រី ព្រះរៀម នរោត្តម បុប្ផាទេវី កាលពីយប់មិញនេះផងដែរ៕