រាជធានីភ្នំពេញ ៖ ជាថ្មីម្តងទៀតតារាសម្តែង និងជាប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា បានប្រកាសដើរចេញពីវិស័យសិល្បៈដែលខ្លួនបានប្រឡូកអស់ជាច្រើនឆ្នាំ បន្ទាប់ពីនាងបានជួបនូវរឿងរ៉ាវមិនល្អជាបន្តបន្ទាប់ នៅពេលដែលនាងបានឡើងកាន់តំណែងជាប្រធានសមាគម ដែលជិតអស់អាណត្តិនាពេលខាងមុខនេះ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកន្លងមកតារារូបនេះ ក៏ធ្លាប់បានបញ្ជាក់ម្តងរួចមកពីហើយពីការដើរចេញនេះ ជាមួយនឹងការបញ្ចប់អាណត្តិជាប្រធានសមាគមសិល្បករខ្មែរមុនអាណត្តិនេះផងដែរ ប៉ុន្តែដោយសារមានការស្នើសុំពីមិត្តក្នុងសិល្បៈនោះ នាងក៏បន្តខិតខំធ្វើកិច្ចការងារជាប្រធានរហូតមកទល់ពេលនេះ ។
ដែលទំនងជាឆ្អែតចិត្តចំពោះការរិះគន់ និងការស្តីបន្ទោសជាបន្តបន្ទាប់នោះ អ្នកនាង ចន ច័ន្ទលក្ខិណា ក៏បានប្រកាសជាថ្មីថា ខ្លួននឹងដើរចេញពីអាជីពសិល្បៈ ខណៈពេលដែលតួនាទីជាប្រធានសមាគមនាងនឹងបន្តធ្វើរហូតដល់អាណត្តិដែលត្រូវបញ្ចប់ ។
អ្នកនាង ចន ច័ន្ទលក្ខិណា បានសរសេរសារបង្ហោះបញ្ជាក់ពីរឿងខាងលើនេះថា សម្រាប់ខ្ញុំ ខ្ញុំមិនថ្លៃថ្នូរ មិនមានកេរ្តិ៍ឈ្មោះល្អ មិនមានតម្លៃ និងហ៊ាននិយាយសាងភាពថ្លៃថ្នូរឱ្យអ្នកសិល្បៈទេ ដូច្នេះខ្ញុំនឹងដើរចេញឱ្យផុតពីពិភពសិល្បៈនេះ ដើម្បីកុំឱ្យអ្នកសិល្បៈត្រូវគេមើលងាយមើលថោកដោយសារខ្ញុំ ។
នាងបញ្ជាក់ថា ខ្ញុំបានប្រកាសឈប់ពីការងារសិល្បៈរយៈពេលជាង ២ ឆ្នាំហើយ នៅសល់រូបភាពសម្តែងកាលពី 2 ឆ្នាំមុនដែលមិនទាន់បានបញ្ចាំង និងផ្សាយ ហើយរាល់ថ្ងៃនេះ ខ្ញុំនៅតែធ្វើការងារតាមតួនាទី និងមុខងាររបស់ខ្ញុំទេ ចប់តួនាទីគឺខ្ញុំនឹងលែងមានឈ្មោះជាអ្នកសិល្បៈទៀតឡើយ ។
បញ្ជាក់ ៖ ខ្ញុំមិនថ្លៃថ្នូរទេ តែក៏មិនដែលយកប្តីគេដែរ ទោះខ្ញុំមានឈ្មោះជាស្រីអាក្រក់ ថោកទាបក៏ដោយ ក៏អត់ដែលធ្វើឱ្យមនុស្សស្រីដូចគ្នាមកស្រែកយំដោយភាពឈឺចាប់ក្នុងការបាត់បង់ប្តី សូម្បីម្តង ។
ជាមួយស្នាដៃចុងក្រោយក្នុងខ្សែភាពយន្តរឿង «រាជនីភូមិគ្រឹះ» ដែលបាននិងកំពុងចាក់ផ្សាយនៅស្ថានីយ៍ទូរទស្សន៍ហង្សមាសនោះ អ្នកនាង ចន ច័ន្ទលក្ខិណា បានបញ្ជាក់ថា ជាភាពយន្តដែលជាវត្តមានចុងក្រោយរបស់ខ្ញុំលើវិថីសិល្បៈ និងវិស័យភាពយន្ត តែស្តាយដែលវិស័យនេះស្ថិតក្នុងពិភព និងសង្គម ដែលខ្ញុំមិនចង់ជួបតទៅទៀត ហើយតាំងចិត្តថា ត្រូវចៀសឱ្យផុត កុំមកពឹងពាក់ទៀត ។ សាច់រឿងនេះ គឺដូចរឿងពិតរបស់ខ្ញុំខ្លះៗ មនុស្សត្រង់ ជួយយកអាសារគេ តែត្រូវគេប្រើប្រាស់ មួលបង្កាច់ ទំលាក់កំហុស លាបពណ៌។
ជាមួយនឹងការប្រកាសដើរចេញពីអ្នកនាង ចន ច័ន្ទលក្ខិណា នាពេលនេះ ក៏ត្រូវបានគេភ្ជាប់នូវរឿងរ៉ាវផ្ទុះជម្លោះយ៉ាងរសើបក្នុងពិភពសិល្បៈជាបន្តបន្ទាប់ មានដូចជាករណីជាមួយតារាចម្រៀងអ្នកនាង ម៉េង កែវពេជ្ជតា ដែលមិនទាន់បានបញ្ចប់ និងជាមួយលោក អ៊ឹម ជីវ៉ា ដែលកំពុងតែក្តៅគគុក ជាមួយនឹងការតតាំងគ្នាក្នុងផ្លូវតុលាការដោយមានអនាគតស្វាមីរបស់នាង គឺលោក ហេង ឡុង ជាអ្នកចេញមុខ ។
គួររំលឹកថា អ្នកនាង ចន ច័ន្ទលក្ខិណា ត្រូវបានជាប់ឈ្មោះជាប្រធានសមាគមសិល្បករខ្មែរ កាលពីព្រឹកថ្ងៃទី ៧ ខេកក្កដា ឆ្នាំ២០១៧ ដោយទទួលបានសំឡេងគាំទ្រលើសលប់លើបេក្ខភាព ២រូបទៀត គឺលោក អៀង ស៊ីធុល ជាសាស្ត្រាចារ្យសិល្បៈចម្រៀង និងលោក កុយ ស៊ីឌឿន ជាម្ចាស់ផលិតកម្មឌីភី ៕
ប្រភព៖ កោះសន្តិភាព
Bong I.T