អង់គ្លេស៖ យោងតាមកាសែត Dailymail បានអោយដឹងថា ក្លិប Manchester United បានចាត់ទុកខ្សែបម្រើស្លាបសញ្ជាតិអង់គ្លេសរបស់ក្លិប Borussia Dortmund កីឡាករ Jadon Sancho និងខ្សែប្រយុទ្ធវ័យក្មេងកំពុងឡើងកូដកីឡាករ Erling-Braut Haaland ជាគោលដៅសំខាន់ក្នុងទីផ្សារដោះដូរកីឡាករខែមករាខាងមុខនេះ។

Man Utd ប្រហែលជាអាចចំណាយប្រាក់ខ្ទង់ ២០០លានផោន (ឬប្រហែល ២៥៨លានដុល្លារអាមេរិក) សម្រាប់កីឡាករឆ្នើមទាំងពីររូបនេះ ដោយកីឡាករ Sancho បច្ចុប្បន្នមានតម្លៃខ្ទង់ ១០០លានផោន (ឬប្រហែល ១២៩លានដុល្លារអាមេរិក) ចំណែកឯ ខ្សែប្រយុទ្ធសញ្ជាតិន័រវែសរបស់ក្លិប RB Salzburg កីឡាករ Haaland មានតម្លៃខ្ទង់ ៨៥លានផោន (ឬប្រហែល ១០៩លានដុល្លារអាមេរិក) ។

កីឡាករ Sancho នៅតែរក្សាទម្រង់លេងបានល្អ និងជាកម្លាំងសំខាន់១រូប សម្រាប់ក្លិប Borussia Dortmund ដោយក្នុងរដូវកាលនេះ រូបគេបង្ហាញខ្លួនបានចំនួន១៦ដង ស៊ុតបញ្ចូលទីបាន៤គ្រាប់ និង Assists អោយមិត្តរួមក្រុមបញ្ចប់ទីបានចំនួន៨ដង។

ចំណែកឯ កីឡាករ Haaland  ក៏ជាកីឡាករ១រូបដែលបង្ហាញទម្រង់លេងលេចធ្លោផងដែរក្នុងរដូវកាលនេះ ជាពិសេសក្នុងក្របខណ្ឌ Champions League ដោយក្នុងចំណោម៤ប្រកួត រូបគេស៊ុតបញ្ចូលទីបានរហូតដល់៧គ្រាប់ ហើយបើគិតរាល់កម្មវិធីទាំងអស់វិញ រូបគេបង្ហាញខ្លួន១៨ប្រកួត ស៊ុតបញ្ចូលទីបាន២៦គ្រាប់។

ក្លិបបិសាចក្រហម Manchester United បានព្យាយាមចុះកុងត្រាយកកីឡាករ Sancho អំឡុងពេលទីផ្សារដោះដូរកីឡាករខែសីហាម្ដងរួចទៅហើយ ប៉ុន្តែមិនបានជោគជ័យដោយសារក្រុម Man Utd មិនមានកៅអីលេង Champions League ដោយអតីតកីឡាកររបស់​ Man City រូបនេះសម្រេចចិត្តស្នាក់នៅបន្តជាមួយនឹងក្លិប Borussia Dortmund។

កីឡាករ Sancho

យ៉ាងណាមិញ ក្លិប​ Man Utd មានសង្ឃឹមច្រើនក្នុងការចុះកុងត្រាយកកីឡាករ Haaland ដោយខ្សែប្រយុទ្ធរួបនេះធ្លាប់ជាកូនក្រុមរបស់លោក​ Ole Gunnar Solskjaer កាលនៅក្លិប Molde Fk  ។

ទន្ទឹមនឹងនេះ លោក​ Ole ទំនងអាចប្រើប្រាស់ទំនាក់ទំនងរបស់គាត់ទៅបញ្ចុះបញ្ចូល Haaland មកចូលរួមជាមួយនឹង United នាខែមករាខាងមុខ។

កីឡាករ Haaland និង លោក Ole Gunnar Solskjaer

គួរបញ្ជាក់ផងដែរថា កីឡាករទាំងពីររូបនេះ ក៏ត្រូវបានក្លិបធំៗជាច្រើននៅអឺរ៉ុបកំពុងតាមចែចូវផងដែរ រួមមានក្លិប​ Real Madrid, Barcelona និង Paris Saint-Germain ជាដើម៕

ប្រភព៖ mirror

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 085836679 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 085836679 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]