ស្រីៗយើងប្រហែលជាធ្លាប់ឮជំងឺពកឆ្អឹងខ្នងលើទារក តែប្រហែលជាមិនបានដឹងពីមូលហេតុច្បាស់លាស់ ដែលធ្វើឲ្យទារកប្រឈមនឹងជំងឺនេះឡើយ។ ដើម្បីជាចំណេះដឹង និងបង្ការទារកមិនឲ្យកើតជំងឺពកឆ្អឹងកងខ្នង ក្រុមការងារ Hello គ្រូពេទ្យ បានធ្វើបទសម្ភាសលម្អិតជាមួយលោកស្រីវេជ្ជបណ្ឌិត ទី សុវណ្ណរដ្ឋ ជំនាញផ្នែកសម្ភព និងរោគស្ត្រី នៃមន្ទីរសម្រាកព្យាបាល និងសម្ភព មាតា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១- អ្វីទៅជាជំងឺពកឆ្អឹងខ្នងលើទារក
សំដៅទៅលើភាពខុសប្រក្រតីនៃឆ្អឹងកងខ្នងរបស់ទារកផ្នែកខាងក្រោយ អាចរបើកឆ្អឹងខ្នង ឬពកឆ្អឹងខ្នងមួយចំហៀង ឬបាត់ឆ្អឹងកងខ្នងទាំងអស់ ធ្វើឲ្យលៀនខួរឆ្អឹងខ្នងចេញមកក្រៅ ធ្វើឲ្យឆ្អឹងខ្នងមិនពេញលក្ខណៈ បណ្ដាលឲ្យទារកពិការភាព ខូចអវយវៈពីកំណើត។ ជំងឺនេះកើតឡើងនៅក្នុងត្រីមាសដំបូងនៃការពពោះ ព្រោះជាពេលដែលមានការបង្កើតខួរក្បាល និងខួរឆ្អឹងខ្នង។
២- មូលហេតុធ្វើឲ្យទារកមានជំងឺពកឆ្អឹងខ្នង
មិនមានមូលហេតុច្បាស់លាស់នោះដែលទារកកើតមកមានជំងឺពកឆ្អឹងខ្នង តែក្នុងនោះបណ្តាលមកពីប្រវត្តិគ្រួសារ ឬកង្វះជាតិអាស៊ីដហ្វូលិកមុនពេលពពោះ និងពេលពពោះ។ ម្យ៉ាងវិញទៀត ការគ្រប់គ្រងជំងឺទឹកនោមផ្អែមមិនបានល្អពេលពពោះ ក៏ជាបញ្ហាប្រឈមធ្វើឲ្យកូនកើតមកមានជំងឺពកឆ្អឹងខ្នងដែរ។
៣- ធ្វើម៉េចទើបដឹងថាទារកមានជំងឺពកឆ្អឹងខ្នង
ទារកមានជំងឺពកឆ្អឹងកងខ្នង ឬមិនមាន អាចដឹងតាមរយៈការពិនិត្យអេកូនៅសប្តាហ៍ទី១២ នៃការពពោះដោយគ្រូពេទ្យជំនាញ ដែលក្នុងករណីធ្ងន់ធ្ងរគ្រូពេទ្យនឹងឲ្យបញ្ឈប់គភ៌តែម្តង។ លោកស្រីវេជ្ជបណ្ឌិត ទី សុវណ្ណរដ្ឋ និយាយថា នៅប្រទេសជឿនលឿន គេអាចព្យាបាលទារកដែលមានជំងឺពកឆ្អឹងខ្នងតាំងពីនៅក្នុងពោះម្តាយ ដោយមិនចាំបាច់រង់ចាំឲ្យកូនកើតមកទើបវះកាត់ឆ្អឹងខ្នងបិទឲ្យជិតវិញនោះទេ។
៤- វិធីបង្ការមិនឲ្យទារកមានជំងឺពកឆ្អឹងកងខ្នង
ពេលដឹងមូលហេតុនោះ យើងអាចបង្ការបាន ដោយស្រីៗគ្នាយើងដែលមានគម្រោងយកកូន ត្រូវញ៉ាំអាស៊ីដហ្វូលិករៀងរាល់ថ្ងៃ រយៈពេល ៣ ខែមុនពេលមានកូន និងពេលពពោះនៅ ៣ ខែដំបូង ប្រសិនបើដឹងថាការទទួលរបបអាហារមិនគ្រប់គ្រាន់។ កាលណាស្ត្រីពពោះញ៉ាំអាស៊ីដហ្វូលិកមិនគ្រប់គ្រាន់ទេ គភ៌អាចប្រឈមនឹងជំងឺពកឆ្អឹង អាចលៀនខួរឆ្អឹងខ្នងចេញមកតាមឆ្អឹងខ្នង ធ្វើឲ្យខួរក្បាលលូតលាស់មិនពេញលេញ ទៅជាតូចខុសប្រក្រតី ឬទឹកដក់ក្នុងខួរក្បាល និងបញ្ហាប្រឈមជាច្រើនទៀតទាំងម្តាយទាំងកូន។
បន្ថែមពីនោះ ស្ត្រីដែលមានគម្រោងយកកូន ឬកំពុងពពោះ ត្រូវញ៉ាំអាហារមានជាតិហ្វូឡាត ដែលសម្បូរនៅក្នុងស៊ុត ថ្លើមគោ បន្លែបៃតង គ្រាប់សណ្តែក ផ្លែក្រូច ល្ហុង ប៊ើរ ជាដើម។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
Bong I.T