ខាងក្រោមនេះ គឺជាសំណួរដែលគួរតែឆ្លើយ និងពិចារណាឲ្យបានច្បាស់លាស់មុនពេលសម្រេចចិត្តរៀបអាពាហ៍ពិពាហ៍ ដែលជាជំហានដ៏ធំបំផុតនៅក្នុងជីវិតរបស់មនុស្សគ្រប់រូប។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតើអ្នកដឹងក្តីគ្រប់គ្រាន់សម្រាប់តួនាទីដែលនឹងទទួលថ្មីហើយឬនៅ?
ការរៀបអាពាហ៍ពិពាហ៍តំណាងឲ្យការទទួលយកតួនាទីជាប្តី ឬប្រពន្ធរបស់មនុស្សម្នាក់ៗ ដែលតួនាទីនេះមិនមានជារឿងងាយស្រួលនោះឡើយ។ ក្នុងនាមជាប្តីនិងមេគ្រួសារ អ្នកត្រូវមានស្មារតីទទួលខុសត្រូវខ្ពស់ ហើយក៏ត្រូវតែប៉ិនប្រសព្វក្នុងរិះរកដំណោះស្រាយពេលចំពោះបញ្ហាដែលនឹងកើតមាននៅក្នុងក្រុមគ្រួសារ ព្រមទាំងចេះជួយទុក្ខធុរៈប្រពន្ធ។ ចំណែកឯនារីជាប្រពន្ធក៏ត្រូវតែចេះរៀបចំទុកដាក់ការងារក្នុងផ្ទះ គ្រប់គ្រងលុយកាក់ និងមើលថែប្តីនិងកូន។ ការងារទាំងនេះសុទ្ធតែទាមទារភាពចាស់ទុំ និងម៉ឺងម៉ាត់ម៉តចត់ ដូច្នេះមុនពេលរៀបការ អ្នកត្រូវប្រាកដថា អ្នកមានគុណសម្បត្តិទាំងនេះសិន។
តើអ្នកបានត្រៀមចិត្តចែករំលែកការស្រលាញ់ហើយឬនៅ?
បន្ទាប់ពីរៀបការ មនុស្សភាគច្រើន ជាពិសេសនារី បានកាន់តែឃ្លាតចេញឆ្ងាយទៅៗពីគ្រួសារ។ ប្រាកដណាស់ អ្នកអាចនឹងចេញទៅរស់នៅផ្ទះផ្សេង ឬផ្ទះខាងណាមួយ ជាមួយប្តីឬប្រពន្ធម្នាក់ ដូច្នេះវាមានន័យថា អ្នកអាចនឹងត្រូវឃ្លាតពីគ្រួសារដែលអ្នកធ្លាប់រស់នៅជាមួយតាំងពីតូច។ ម្យ៉ាងទៀត អ្នកនឹងមិនមានពេលសម្រាប់មើលថែពួកគេច្រើនដូចមុន ដោយសារអ្នកត្រូវមើលថែ ប្តីប្រពន្ធ ឬ កូនរបស់អ្នក។ ក៏ប៉ុន្តែ ចំណុចនេះមិនសូវជាសំខាន់នោះឡើយសម្រាប់អ្នកដែលមានទម្លាប់រស់នៅបែកពីគ្រួសារ ឬ ធ្លាប់រស់នៅដោយឯករាជ្យ។
តើអ្នកមានប្រាក់គ្រប់គ្រាន់ហើយឬនៅ?
បញ្ហាថវិការ គឺជាបញ្ហាធំបំផុតសម្រាប់អ្នកដែលចង់រៀបការ និងបង្កើតជាគ្រួសារថ្មីមួយនៅក្នុងសង្គម ជាពិសេសអ្នកដែលមានជីវភាព មិនសូវជាធូរធារ។ ជាការពិតណាស់ ការរៀបចំពិធីអាពាហ៍ពិពាហ៍ទាមទារឲ្យយើងចំណាយប្រាក់ច្រើន ឧទាហរណ៍ ទៅលើខោអាវ និងរ៉ូបអាពាហ៍ពិពាហ៍ ការថតរូប និងពិធីជប់លៀងអាហារ។ ក៏ប៉ុន្តែ អ្នកគួរតែមើលឃើញឲ្យឆ្ងាយពីនេះ។ បន្ទាប់ពីរៀបការ អ្នកក៏នឹងត្រូវការប្រាក់ច្រើនសម្រាប់រៀបចំគ្រួសារនេះឡើង ដោយ អ្នកត្រូវទិញរបស់របរសម្រាប់ប្រើប្រាស់ រៀបចំបន្ទប់គេងថ្មី ហើយបន្ទាប់មកទៀត អ្នកនឹងត្រូវចំណាយទៅលើកូនរបស់អ្នកបន្ទាប់ពីមួយរយៈក្រោយមក។ ដូច្នេះ អ្នកគួរតែរៀបការនៅពេលដែលអ្នកប្រាកដថា អ្នកមានប្រាក់គ្រប់គ្រាន់សម្រាប់រឿងទាំងនេះ ក៏ប៉ុន្តែអ្នកមិនគួរទៅខ្ចី ឬចងការប្រាក់អ្នកដទៃយកមករៀបការដែរ។
តើអ្នកពិតជាចង់រៀបការដោយចេញពីបេះដូងមែនដែរឬទេ?
ចូរចង់ចាំថា ជីវិតអាពាហ៍ពិពាហ៍ដ៏ល្អប្រសើរកើតចេញបេះដូង។ អ្នកគួរតែរៀបការនៅពេលដែលអ្នកចង់បង្កើតជាគ្រួសារជាមួយនឹងមនុស្សដែលអ្នកស្រលាញ់ពិតៗ និងធានាបានក្នុងចិត្តថា អ្នកនឹងមានសុភមង្គលបន្ទាប់ពីរៀបការ។ ផ្ទុយទៅវិញ អ្នកមិនគួររៀបការដោយព្រោះតែអ្នកមានវ័យកាន់តែជ្រេទៅៗ ឬក៏ព្រោះតែចង់មានមនុស្សម្នាក់សម្រាប់បម្រើចំណងផ្លូវភេទរបស់អ្នកនោះឡើយ ហើយអ្នកក៏មិនគួរបណ្តោយឲ្យឳពុកម្តាយ ឬគ្រួសារមកបង្ខំអ្នកឲ្យរៀបការនៅពេលវេលាណាមួយ ឬជាមួយមនុស្សណាម្នាក់ដែលអ្នកមិនពេញចិត្តដែរ។ គ្មាននរណាដែលជាម្ចាស់ជីវិត និងបេះដូងរបស់អ្នក ក្រៅតែពីខ្លួនអ្នកឡើយ៕