ភ្នំពេញ៖ ស្ថិតក្នុងរាជធានីភ្នំពេញ ប្រសិនបើអ្នកធ្វើដំណើរតាមផ្សារទួលទំពូង អ្នកនឹងឃើញហាងខ្មែរមួយ នៅខាងស្តាំដៃដែលមានឈ្មោះថា«ដៃខ្មែរ ឬ Dai Khmer»។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបើសង្កេតមើលពីខាងក្រៅហាងយើងឃើញថា មានការតុបតែងយ៉ាងប្លែករួមជាមួយ នឹងការដាក់តាំងលក់នូវ ផលិតផលខ្មែរជាច្រើនមុខ ដែលផលិតផលទាំងអស់នោះ គឺសុទ្ធសឹងតែផលិត ដោយស្នាដៃស្រ្តីខ្មែរ ជាង៩០ភាគរយទៅហើយ។ ហើយអ្វីដែលធ្វើឲ្យអតិថិជនទូទៅមាន ការចាប់អារម្មណ៍បន្ថែមទៀតនោះគឺ នៅពេលដែល អ្នកបានចូលទៅដល់ក្នុងហាងផ្ទាល់ អ្នកនឹងបានឃើញនៅពាក្យមួយឃ្លា ដែលបានសរសេរថា «សូមកុំយក ផ្លាស្ទិចចូលមកទីនេះ»។ ជាក់ស្តែងចំណុចពិសេសមួយទៀតនៃ ហាង “Dai Khmer” នេះគឺនៅរាល់ការវេចខ្ចប់ផលិតផលផ្សេងៗ នៅក្នុងហាងគឺមិនមាន ប្រើប្រាស់នៅថង់ផ្លាស្ទិចនោះទេ។
បើយោងតាមកញ្ញា ភាព សុថុន ដែលជាអ្នកគ្រប់គ្រងទូទៅ ក្នុងហាងនេះផ្ទាល់បាន លើកឡើងឲ្យដឹងផងដែរថា គោលគំនិតសំខាន់មួយនៃហាង“Dai Khmer” នេះគឺធ្វើយ៉ាងណាដើម្បីជួយកាត់បន្ថយនៅ ការប្រើប្រាស់ថង់ផ្លាស្ទិចទៅលើ របស់ប្រើប្រាស់ប្រចាំថ្ងៃ។ ជាក់ស្តែងនៅក្នុងហាង“Dai Khmer” មានដាក់លក់នៅផលិតផលដែល ជាប្រភេទEco-friendly ដែលអាចប្រើប្រាស់ជំនួសថង់ផ្លាស្ទិចបាន ដែលមិនធ្វើឲ្យប៉ះពាល់ដល់បរិស្ថាន និងផលិតផលប្រើប្រាស់ប្រចាំថ្ងៃ មានដូចជាសាប៊ូដុសមុខ ដុសខ្លួន ថ្នាំដុសធ្មេញ ប្រេងដូង កាបូប និងស្ករជាដើម។
ហើយអ្វីដែលពិសេសបន្ថែមទៀត សម្រាប់ហាង“Dai Khmer” នេះគឺក្នុងហាងនេះគឺមានកន្លែងRefill Station ដែលសម្រាប់ឲ្យអតិថិជន ពេលដែលប្រើប្រាស់នៅផលិតផល ប្រចាំថ្ងៃមួយចំនួនអស់ហើយដូចជាសាប៊ូលាងចាន តែ សាប៊ូបោកខោអាវ ជាដើមនោះគឺ ពួកគាត់អាចយកដប ឬកំប៉ុងដែលពួកគាត់មានពីផ្ទះខ្លួនឯង យកមកដាក់ឬច្រកបាន នៅកន្លែងនេះផ្ទាល់។
កញ្ញា សុថុន ក៏បានបន្ថែមទៀតថាហាងមួយនេះ បានបើកដំណើរការបាន រយៈពេលប្រហែលជា៥ខែមកហើយ។ ចំណែកមូលហេតុដំបូង ដែលធ្វើឲ្យមាន ការចាប់ផ្តើមនូវគំនិតអាជីវកម្ម នេះឡើងក៏ព្រោះតែកញ្ញាចង់ បង្កើនមុខរបរដល់ស្ត្រីខ្មែរ ដោយជួយឲ្យពួកគាត់មានការងារធ្វើ តាមរយៈការបង្កើតនៅផលិតផល ដែលចម្រាញ់ចេញពីធម្មជាតិ ធ្វើដោយដៃដែលច្នៃចេញពីធនធាន ដែលមានស្រាប់នៅក្នុងស្រុក ហើយផលិតចេញជាផលិតផលធម្មជាតិ១០០ភាគរយ ទៅដល់អ្នកប្រើប្រាស់ ជាពិសេសសម្រាប់អ្នកដែលស្រលាញ់ ផលិតផលធ្វើចេញពី របស់ធម្មជាតិពិតៗនេះតែម្តង។
បើងាកមកមើលពីតម្លៃវិញ ក៏មានភាពគួរសមដែលអាចឲ្យ អតិថិជនទូទៅអាចទទួលយកបានផងដែរ។ ថ្វីត្បិតតែផលិតផលខ្លះមានតម្លៃ អាចជាថ្លៃជាងផលិតផល ដែលមានដាក់លក់នៅលើទីផ្សារ ក៏ពិតមែនតែកញ្ញា សុថុន ក៏បានបញ្ជាក់ផងដែរថា មូលហេតុដែលតម្លៃរបស់ផលិតផល ដែលមានដាក់លក់នៅ ក្នុងហាង“Dai Khmer”មួយចំនួន មានតម្លៃថ្លៃជាងទីផ្សារនោះ ក៏ព្រោះតែផលិតផលទាំងអស់នេះគឺ សុទ្ធសឹងតែធ្វើដោយដៃ រួមទាំងវត្ថុធាតុដើមមួយចំនួនទៀតគឺ មានការទិញចូលក្នុងតម្លៃថ្លៃ មកស្រាប់ហើយផងដែរ ដូច្នេះនៅរាល់តម្លៃដែលលក់ចេញគឺ លក់ទៅតាមតម្លៃដែលបាន ទិញចូលមកដូចគ្នាដែរនោះទេ។
សម្រាប់ជាមតិចុងក្រោយកញ្ញា ភាព សុថុន ក៏បានសំណូមពរឲ្យអតិថិជន ដែលជាជនជាតិខ្មែរទាំងអស់ សូមមកជួយគាំទ្រនៅ ផលិតផលរបស់ខ្មែរពិតៗ ដែលមិននាំឲ្យប៉ះពាល់ដល់សុខភាព របស់អ្នកប្រើប្រាស់ ហើយអាចជួយកាត់បន្ថយថង់ផ្លាស្ទិច ដែលអាចជួយចូលរួមក្នុង ការការពារដល់បរិស្ថាន និងជាពិសេសនោះគឺជួយដល់ស្រ្តី ដែលធ្វើក្នុងការងារទាំងអស់នេះឲ្យ ពួកគាត់មានចំណូលដើម្បី ជួយសម្រាលបន្ទុកគ្រួសារ របស់ពួកគាត់ផងដែរ៕