Son ស៊ុតច្បាស់ណាស់!! Spurs ឈ្នះ ៤-០ ជួយបន្ថយកម្ដៅកៅអីរបស់លោក Pochettino (មានវីដេអូ)

ស៊ែប៊ី៖ មាន់ខ្នាយមាស Tottenham Hotspur រកបាន ៣ពិន្ទុពីការប្រកួតជុំទីបួន វគ្គសន្សំពិន្ទុក្នុងពូល B ក្រោយប្រកួតឈ្នះក្រុមម្ចាស់ផ្ទះ Crvena Zvezda ក្នុងលទ្ធផល ០ទល់នឹង៤។

៤គ្រាប់របស់ជើងឯករងរដូវកាលមុនរកបានដោយកីឡាករ Giovani lo Celso ១គ្រាប់នៅនាទី៣៤, Heung-Min Son ២គ្រាប់នៅនាទី ៥៧ និង ៦១ និងគ្រាប់ចុងក្រោយរកបានដោយកីឡាករប្ដូរចូល Christian Eriksen នៅនាទី៨៥។

ចំណែកឯលទ្ធផលមួយគូទៀតក្នុងពូល B ជាមួយគ្នានេះគឺ Bayern Munich បានយកឈ្នះ Olympiacos ២ទល់នឹង០ កក់កៅអីឡើងទៅកាន់វគ្គ ១៦ក្រុមចុងក្រោយ។

ក្រោយជ័យជម្នះ ៤គ្រាប់ទៅលើក្លិបជើងឯករបស់ស៊ែប៊ី ហាក់បានបន្ថយកម្ដៅដំណែងរបស់អ្នកចាត់ការទូទៅ Spurs លោក Mauricio Pochettino ដែលមានព័ត៌មានលេចឭថាអាចនឹងត្រូវបណ្ដេញចេញដោយសារតែដឹកនាំក្រុមមិនសូវជាទទួលបានលទ្ធផលល្អនៅរដូវកាលនេះ។

ចំពោះតារាងចំណាត់ថ្នាក់ពូល B ក្រុមលេខ១គឺ Bayern Munich ដែលមាន ១២ពិន្ទុ ៤ប្រកួតឈ្នះទាំង៤ ធានាកៅអីឡើងទៅវគ្គបន្តរួចជាស្រេច ខណៈ​ Spurs ឈរនៅលេខ២ មាន៧ពិន្ទុ ៤ប្រកួតឈ្នះ២ ស្មើ១​ និងចាញ់១ តាមពីក្រោយដោយក្រុមលេខ៣ Crvena Zvezda មាន៣ពិន្ទុ និងក្រុមលេខ៤ Olympiacos មាន១ពិន្ទុ៕

សូមទស្សនាវីដេអូ Highlight នៅខាងក្រោម៖