រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ចាត់ទុកថាជាសំណាង១ក្នុងចំណោម១ពាន់គ្រោះថ្នាក់ទៅចុះ ដែលក្បាលរថយន្តសណ្ដោង១គ្រឿងបើកបរបោះពួយជ្រុលបុកចូលទៅក្នុងផ្ទះជាងក្រឡឹងមួយកន្លែងទាំងកម្រោល ហេតុនេះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី០៥ ខែវិច្ឆិកានេះ នៅតាមបណ្ដោយផ្លូវវ៉េងស្រេង ស្ថិតនៅក្នុងភូមិព្រៃជីសាក់ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ប៉ុន្តែខណៈនោះម្ចាស់ខាងលើបានរួចផុតពីគ្រោះមិនមានរងរបួស ឬស្លាប់នោះឡើយ ចំណែកឯអ្នកបើកបររថយន្តនោះវិញបានប្រាប់ថា គឺជារឿងអចេតនា កាលដែលកើតមានហេតុនេះឡើង គឺដោយសារតែរថយន្តរបស់ខ្លួនគាំងដៃចង្កូតមិនអាចបញ្ជាបាន ។ ចំណែកក្បាលរថយន្តសណ្ដោងខាងលើនោះ ពណ៌ខៀវ ពាក់ស្លាកលេខព្រះសីហនុ 3A-1221 បើកបរដោយបុរសមិនស្គាល់អត្តសញ្ញាណម្នាក់ ។
អ្នកភូមិបាននិយាយថា នៅមុនពេលកើតហេតុពួកគាត់បានឃើញរថយន្ត១គ្រឿងខាងលើមានតែក្បាលអត់មានសណ្ដោងកន្ទុយរ៉ឺម៉កទេ បើកបរក្នុងល្បឿនក្នុងទិសដៅពីកើតទៅលិច ។ លុះពេលទៅដល់ត្រង់ចំនុចកើតហេតុអត់បានបន្ថយល្បឿនទេ ហើយបានបត់ឡាកួរទៅខាងស្ដាំដៃចូលទៅកាន់ផ្លូវបេតុង១យ៉ាងព្រហើន ក៏ជ្រុលទៅបុកចូលក្នុងផ្ទះខាងលើទាំងកម្រោលតែម្ដង ។
ខណៈនោះម្ចាស់ផ្ទះខ្លះបានរត់គេចទាំងព្រលឹងចុងសក់ និងខ្លះទៀតមិននៅដោយចេញទៅទទួលយកកូនចេញពីសាលារៀនទើបមានសំណាងបានរួចខ្លួនផុតពីសេចក្ដីស្លាប់ និងរបួស ប៉ុន្តែផ្ទះរួមជាមួយ និងសម្ភារៈមួយចំនួននៅក្នុងនោះផងបានរងការខូចខាត ។ ចំណែកបុរសដែលជាអ្នកបើកបររថយន្តនោះវិញមិនបានប្រាប់ឲ្យដឹងពីឈ្មោះរបស់ខ្លួននោះទេ តែបាននិយាយថា ឧប្បត្តិហេតុនេះបានកើតឡើងព្រោះតែរថយន្តគាំងជាប់ចង្កូតបញ្ជាមិនបានទើបបុកចូលផ្ទះបែបនេះ ។
សូមបញ្ជាក់ផងដែរថា មុន និងបុកចូលដល់ផ្ទះជាងក្រឡឹងរថយន្តនេះក៏បានបុករះផ្ទះពេទ្យធ្មេញ និងផ្ទះជាងកាត់សក់បណ្ដាលឲ្យរងការខូចខាតខ្លះៗដែរ ។ ក្រោយពេលកើតហេតុរថយន្តត្រូវបានបើកថយក្រោយចេញពីក្នុងផ្ទះនោះវិញហើយ អ្នកបើកបរបានខលទាក់ទងទៅកាន់តំណាងបស់ខ្លួន ដើម្បីឲ្យមកសម្របសម្រួលគ្នាជាមួយ និងម្ចាស់ផ្ទះទាំង២នោះហើយដែរ ៕
ប្រភព៖ កោះសន្តិភាព
Bong I.T