វ័យទើបតែ២៤ឆ្នាំសោះ ក្លាយជាមហាសេដ្ឋីក្នុងមួយពព្រិចភ្នែក ក្រោយពីឪពុកម្ដាយចែកទ្រព្យសម្បត្តិឲ្យជិត៤ពាន់លានដុល្លារ

ហុងកុង៖ កាលពីថ្ងៃទី២២ ខែតុលា ឆ្នាំ២០១៩កន្លងទៅនេះ យុវជនវ័យ២៤ឆ្នាំម្នាក់ នៅឯទីក្រុងហុងកុង បានក្លាយជាមហាសេដ្ឋីទាំងវ័យក្មេងលំដាប់ពិភពលោក។

ប្រភពបានឲ្យដឹងថា យុវជនរូបនោះមានឈ្មោះថា Eric Tse គឺជាកូនប្រុសនៅក្នុងគ្រួសារអ្នកជំនួញមួយក្នុងទីក្រុងហុងកុង។ លោក Eric Tse បានបញ្ចប់ការសិក្សាផ្នែកហិរញ្ញវត្ថុនៅសកលវិទ្យាល័យ Wharton ក្នុងសហរដ្ឋអាមេរិកផងដែរ។​

ប្រភពបានបន្ដថា លោក Eric Tse បានទទួលទ្រព្យសម្បត្តិពីឪពុកម្ដាយរបស់គាត់ចំនួន ៣.៨ពាន់លានដុល្លារ។ ក្នុងចំនួនទឹកប្រាក់៣.៨ពាន់លានដុល្លារនោះ មានទឹកប្រាក់ចំនួន២.៧ពាន់លានដុល្លារបានមកពីភាគហ៊ុនក្នុងក្រុមហ៊ុន Sino Biopharmaceutical របស់គ្រួសារគាត់ផ្ទាល់។ សម្រាប់ភាគហ៊ុននោះដែរ ត្រូវបានគេរំពឹងថា គាត់នឹងអាចរកប្រាក់ចំណូលបានប្រមាណជាកន្លះលានដុល្លារក្នុង១មួយឆ្នាំទៀតផង។

លោក Eric Tse ត្រូវបានឪពុករបស់គាត់តែងតាំងដំណែងជានាយកប្រតិបត្តិក្នុងក្រុមហ៊ុន និងមកទល់បច្ចុប្បន្ននេះ គាត់ធ្វើការបានរយៈពេល១ឆ្នាំមកហើយ។

ប្រភពបានឲ្យដឹងទៀតថា លោក Eric Tse ក៏មានបងស្រីម្នាក់ឈ្មោះថា Thersa ជាប្រធាននៅក្នុងក្រុមហ៊ុន ដែលមានភាគហ៊ុនចំនួន១១ភាគរយ និងមានទ្រព្យសម្បត្តិចំនួន១.៩៦ពាន់លានដុល្លារ។

យ៉ាងណាមិញ លោក Eric Tse បានក្លាយទៅជាមហាសេដ្ឋីមានទ្រព្យសម្បត្តិច្រើនជាងគេលំដាប់ពិភពលោក​ ស្ថិតនៅលេខរៀងទី៥៤៦ និងកំពុងទទូលបានការចាប់អារម្មណ៍យ៉ាងខ្លាំងពីបណ្ដាមហាជននៅក្នុងទីក្រុងហុងកុងទៀតផង៕

សូមទស្សនារូបភាពខាងក្រោម៖