ភ្នំពេញ៖ នៅក្នុងប្រទេសកម្ពុជា បើទោះបីជាការស្រលាញ់ភេទដូចគ្នា មិនត្រូវបានចាត់ទុកជាអំពើខុសច្បាប់ក្តី តែក៏នៅមិនទាន់មាន ការទទួលស្គាល់និងទទួលបានការ ការពារដោយច្បាប់នៅឡើយនោះដែរ។ ដោយសារតែបែបនេះហើយ ទើបបានជាញឹកញាប់ អ្នកស្រលាញ់ភេទដូចគ្នា តែងតែទទួលរងគ្រោះ ដោយការរើសអើង ពីតាមមជ្ឈដ្ឋានទូទៅដូចជា ពីក្រុមគ្រួសារបងប្អូន មិត្តភក្តិ កន្លែងធ្វើការ រួមទាំងឱកាសការងារផ្សេងៗ និងនៅទីសាធារណៈជាដើម។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ដោយសារតែមើលឃើញ ពីបញ្ហាអស់ទាំងនេះហើយ ទើបជាក្រុមក្តីស្រលាញ់គឺចម្រុះ ត្រូវបានបង្កើតឡើង។ តើក្រុមក្តីស្រលាញ់គឺចម្រុះ ឬក៏ជាភាសាអង់គ្លេស(Love is Diversity)ជាអ្វី?
ជារួមក្រុមក្តីស្រលាញ់គឺចម្រុះ បានបង្កើតឡើងកាលពីខែមិថុនា ឆ្នាំ២០១៨។ ហើយក្រុមមួយនេះ គឺត្រូវបានបង្កើតឡើងដោយ ក្រុមអ្នកស្រលាញ់ភេទដូចគ្នា នៅក្នុងប្រទេសកម្ពុជា ក្រោមការគាំទ្រទាំងបច្ចេកទេស និងមូលនិធិដោយអង្គការUN Women ដែលក្នុងគោលបំណងធំនោះ គឺដើម្បីលើកកម្ពស់ អ្នកស្រលាញ់ភេទដូចគ្នា បង្ហាញពីជីវិតពិតរបស់ អ្នកស្រលាញ់ភេទដូចគ្នា ហើយក៏ចូលរួមក្នុង ការជម្រុញក៏ដូចជាទទួលស្គាល់ អ្នកស្រលាញ់ភេទដូចគ្នា ព្រមទាំងធ្វើឲ្យមានការផ្លាស់ប្តូរ ជាវិជ្ជមានចំពោះ អ្នកស្រលាញ់ភេទដូចគ្នា ក្នុងប្រទេសកម្ពុជាផងដែរ។
បើយោងតាមកញ្ញា គុយ ធីតា ដែលជាសហស្ថាបនិកនៃ ក្រុមអ្នកស្រលាញ់ភេទដូចគ្នាមួយនេះ បានបញ្ជាក់បន្ថែមផងដែរថា មកទល់ពេលនេះក្រុមក្តីស្រលាញ់គឺចម្រុះ មានសមាជិកស្នូលចំនួន៦នាក់។ ទៀតសោតកន្លងមក ក្រុមមួយនេះក៏បានដើរតួយ៉ាងសំខាន់ផងដែរ ក្នុងសកម្មភាពចុះធ្វើ ការផ្សព្វផ្សាយផ្សេងៗ នៅតាមសាកលវិទ្យាល័យមួយចំនួន រួចទាំងមានជា ការផលិតជាវីដេអូខ្លីៗ ក៏ដូចជាកិច្ចសម្ភាសន៍ខ្លី ដែលទាក់ទងនឹងអ្នកស្រលាញ់ភេទដូចគ្នា ដើម្បីធ្វើការផ្សព្វផ្សាយ ក្នុងបណ្តាញសង្គម។
សមាជិកម្នាក់ ក្នុងក្រុមអ្នកស្រលាញ់ភេទដូចគ្នាកញ្ញាសំ អានុត្រា បានលើកឡើងផងដែរថា មូលហេតុដែលធ្វើឲ្យកញ្ញា ចូលរូមក្នុងក្រុមនេះក៏ដោយសារតែ ទីមួយកញ្ញាចង់ពង្រឹងការយល់ដឹងនិងសមត្ថភាព បង្កើតទំនុកចិត្តសម្រាប់ខ្លួនឯង ហើយចំណុចមួយវិញទៀតគឺ កញ្ញាចង់ចូលរួមចំណែក ក្នុងការផ្លាស់ប្តូរផ្នត់គំនិតសង្គម ជាវិជ្ជមានចំពោះអ្នកស្រលាញ់ភេទដូចគ្នា នឹងចង់ឃើញសង្គមមួយនេះពោរពេញ ទៅដោយក្តីស្រលាញ់ ការគោរពគ្នាក្នុងមានជាមនុស្សដូចគ្នា។
ចំណែកសហស្ថាបនិកនៃ ក្រុមអ្នកស្រលាញ់ភេទដូចគ្នាកញ្ញាធីតា ក៏បានលើកឡើងបន្ថែមទៀតផងដែរថា បច្ចុប្បន្នសម្រាប់ផ្នត់គំនិត របស់មហាជនទូទៅមកកាន់ អ្នកស្រលាញ់ភេទដូចគ្នា ក៏មានការប្រែបួ្រលខុសពី មុនឆ្ងាយផងដែរបើធៀបនឹង កាលពីរយៈពេលប្រហែលជា៥ឆ្នាំមុន ពីព្រោះថាពេលបច្ចុប្បន្ន ប្រជាជនទូទៅមានការយល់ដឹងច្រើន ទាក់ទងនឹងរឿងទាំងអស់នេះ ហើយចំពោះមតិរិះគន់ ជេរប្រទិចក៏កាត់បន្ថយច្រើនដែរ។
ជាចុងក្រោយកញ្ញា ធីតា ដែលជាសហស្ថាបនិកនៃ ក្រុមអ្នកស្រលាញ់ភេទដូចគ្នាមួយនេះ ក៏បានថ្លែងនៅការអរគុណដល់ អ្នកស្រលាញ់ភេទដូចគ្នាទាំងអស់ ដែលបានចូលរួមក្នុង ការគាំទ្រតាមរយៈការបញ្ចេញជាមតិចែករំលែក នៅលើបណ្តាញសង្គមរបស់ក្រុមក្តីស្រលាញ់គឺចម្រុះ បើទោះបីជាពួកគេមិនបានចូលរួម ក្នុងសកម្មភាពផ្ទាល់ក៏ដោយក៏ពួកគេបានចូលរួម ក្នុងការចែករំលែកនៅព័ត៌មានទៅកាន់ មនុស្សដទៃៗផ្សេង ទៀតផងដែរ។ លើសពីនេះទៀតកញ្ញា ក៏សូមអំពាវនាវឲ្យអ្នកស្រលាញ់ភេទដូចគ្នា នៅតែបន្តនៅសកម្មភាព បែបនេះបន្តទៅទៀត។ រីឯចំណុចមួយទៀតសហស្ថាបនិករូបនេះ ក៏សូមផ្តាំផ្ញើទៅកាន់អ្នកដែលមិនទាន់គាំទ្រ រើសអើងឬប្រឆាំងចំពោះ អ្នកដែលស្រលាញ់ភេទដូចគ្នា ទាំងអស់ផងដែរថា៖
«ការស្រលាញ់គ្នារបស់ពួកយើង មិនបានបំផ្លាញទៅដល់នរណាហើយក៏មិនបានធ្វើឲ្យនរណាម្នាក់ ឈឺចាប់នោះដែរក៏ប៉ុន្តែការស្អប់របស់អ្នកទាំងអស់គ្នា គឺបានធ្វើឲ្យពួកយើងឈឺចាប់បានធ្វើឲ្យជីវិតរបស់ពួកយើង ត្រូវបានបំផ្លាញដោយផ្នែកណាមួយ ជាប្រយោល ក៏ដូចជាលទ្ធផលអស់ទាំងនោះហើយ គឺធ្វើឲ្យប៉ះពាល់ទៅដល់សង្គមជាតិ យើងទាំងមូលផងដែរ។»
ងាកត្រឡប់មកស្តាប់មតិលោកសុទ្ធ ពៅសំណាង វិញម្តង ដែលសព្វថ្ងៃលោក គឺជាសមាជិកម្នាក់ ក្នុងក្រុមក្តីស្រលាញ់គឺចម្រុះ ហើយលោកក៏ជាបុគ្គលដែល ស្រលាញ់ភេទដូចគ្នាមួយរូបផងដែរនោះ លោកបានរៀបរាប់ទាំងទឹកមុខ មិនសូវជាសប្បាយចិត្តថា ក្នុងនាមលោកជាអ្នកស្រលាញ់ភេទដូចគ្នា មួយរូបនោះគឺ កន្លងមកលោកធ្លាប់បានទទួល រងនូវមតិរិះគន់ ក៏ដូចជាការរើសអើងជាច្រើន ពីសំណាក់មជ្ឈដ្ឋានខាងក្រៅ ដូចជានៅពេលដែលលោកចូលរួម ក្នុងការបញ្ចេញមតិ ឬក៏ចូលរួមក្នុងសកម្មភាពអ្វីផ្សេងៗ គេតែងតែសើចពេបជ្រាយ ហើយពេលខ្លះគេហាក់ដូចជា មិនទទួលយកគំនិតទាំងនោះ ដោយពួកគេគិតថាលោកជា បុគ្គលមួយរូបដែលចេញមកពី ក្រុមខុសគេអីបែបនេះជាដើម។
ក៏ប៉ុន្តែដោយសារតែលោកមាន ភាពរឹងមាំស្រាប់ដូច្នេះហើយទើបបានជា លោកមិនសូវជាប្រឈមខ្លាំង ទាក់ទងនឹងសម្តីរិះគន់ ទាំងអស់នោះទេ។ មកដល់ចំណុចនេះ លោកក៏បានប្រែទឹកមុខមកជា មានក្តីសង្ឃឹមវិញបន្តិច ហើយរៀបរាប់ថា បើទោះប្បីជាពេលខ្លះ លោកត្រូវបានគេរើសអើង យ៉ាងណាក៏ដោយ តែកត្តាចម្បងមួយយ៉ាងសំខាន់បំផុត ដែលធ្វើឲ្យលោកនៅតែហ៊ាន បើកបង្ហាញនិងបញ្ចេញ ភាពជាខ្លួនឯងនោះគឺ កត្តាទទួលបានការគាំទ្រពី ក្រុមគ្រួសាររបស់លោកនេះតែម្តង។
ជាក់ស្តែងសំណាង បានទទួលការគាំទ្រយ៉ាងពេញទំហឹង ពីក្រុមគ្រួសាររបស់លោក ជាពិសេសពីសំណាក់ អ្នកម្តាយរបស់លោកតែម្តង។ ជាចុងក្រោយសំណាង ក៏មានជាសារផ្តាំផ្ញើមួយចំនួនទៅកាន់ អ្នកស្រលាញ់ភេទដូចគ្នា មិនថាស្រីស្រលាញ់ស្រី ឬប្រុសស្រលាញ់ប្រុសនោះទេថា៖
«ពួកយើងជាក្រុមមួយដែលងាយ ទទួលរងគ្រោះហើយ ដូច្នេះយើងត្រូវដឹងថាខ្លួន យើងត្រូវធ្វើអ្វី អញ្ចឹងសម្រាប់ខ្ញុំ ខ្ញុំគិតថាអ្នកទាំងអស់គ្នា គួរតែខិតខំប្រឹងប្រែងរៀនសូត្រ ហើយមួយវិញទៀតនោះគឺ ត្រូវរៀនចាប់ផ្តើមទទួលស្គាល់ខ្លួនឯង និងហ៊ានទទួលយកខ្លួនឯង ហើយត្រូវយល់ថាពួកយើងមិនមែនជា បុគ្គលដែលចម្លែកក្នុងសង្គមនោះទេ។ ហើយយើងគឺមិនឯកានោះទេ សម្រាប់ការស្រលាញ់ភេទដូចគ្នានោះ។ ម្យ៉ាងវិញទៀតត្រូវរៀនធ្វើជា មនុស្សល្អ កូនល្អ សិស្សល្អ និងជាពលរដ្ឋល្អ នៅក្នុងសហគមន៍យើង ដូច្នេះទើបធ្វើឲ្យសហគមន៍យើង ទទួលស្គាល់ថាយើងគឺជាបុគ្គលមួយរូប ដែលមិនគួរនឹងទទួលបាន នៅការរើសអើងនោះទេ។ ចំណែកសារចំពោះសាធារណៈជនទូទៅ ឬបុគ្គលដែលធ្លាប់តែរើសអើងពេបជ្រាយ មកកាន់ពួកយើងនោះគឺ ខ្ញុំសូមអំពាវនាវឲ្យពួកគាត់ជួយស្វែង យកពីពូកខ្ញុំ ពីព្រោះពួកខ្ញុំ មិនមែនចង់ធ្វើបែបនេះនោះទេ តែវាជាធម្មជាតិរបស់ពួកយើង ដែលយើងកើតមកជាបុគ្គល ដែលស្រលាញ់ភេទដូចគ្នា។ ដូច្នេះសង្ឃឹមថាពួកគាត់ ព្យាយាមស្វែងយល់ពីពួកយើងសិន មុននឹងរើសអើងពួកយើង“កាត់បន្ថយការរើសអើង បង្កើនក្តីស្រលាញ់ នាំកម្ពុជា ឆ្ពោះទៅមាគ៌ានៃការអភិវឌ្ឍន៍ ប្រកបដោយសន្តិភាព”»៕
Bong I.T