ខ្សែបម្រើស្លាបវ័យក្មេងសញ្ជាតិអង់គ្លេសកីឡាករ Jadon Sancho ត្រូវបានក្លិបធំមួយនៅអេស្ប៉ាញចាប់អារម្មណ៍ចង់បានរូបគេ

អេស្ប៉ាញ៖ ក្លិប Real Madrid ត្រូវបានគេរាយការណ៍ថាបានចូលរួមប្រជែងជាមួយនឹងក្លិបបិសាចក្រហម Manchester United ក្នុងការដណ្ដើមយកខ្សែបម្រើស្លាបវ័យក្មេងសញ្ជាតិអង់គ្លេសរបស់ក្លិប Borussia Dortmund កីឡាករ Jadon Sancho។

កីឡាករ Jadon Sancho បានបង្ហាញទម្រង់លេងយ៉ាងលេចធ្លោចាប់តាំងពីផ្ទេរពីក្លិប Manchester City មកចូលរួមជាមួយនឹងក្លិប Borussia Dortmund កាលពីឆ្នាំ២០១៧ក្នុងតម្លៃ៨លានផោន (ឬប្រហែល១០,៣លានដុល្លារអាមេរិក) មក ដោយក្នុងរដូវកាលថ្មីនេះគេស៊ុតបញ្ចូលទីបាន៣គ្រាប់និងបញ្ជូនបាល់អោយមិត្តរួមក្រុមស៊ុតបញ្ចូលទីបានចំនួន៦ដងក្នុងការបង្ហាញខ្លួន៧ប្រកួត។

យោងតាមកាសែត El Desmarque បានអោយដឹងថា Real Madrid កំពុងសម្លឹងឃើញខ្សែបម្រើស្លាបរូបនេះក្នុងគោលបំណងចង់បានរូបគេមកពង្រឹងតំបន់ប្រយុទ្ធ។ លើសពីនេះទៅទៀតកីឡាករ Sancho មិនមែនមានតែក្លិប Real Madrid មួយនោះទេដែលចង់បានរូបគេ តាមរយៈប្រភពដដែលបានអោយដឹងថាក្លិប Manchester United កំពុងតាមប្រម៉ាញ់កីឡាកររូបនេះផងដែរ។

គួរម្លឹកផងដែរថាកីឡាករ Sancho បានផ្ទេរពីក្លិប Manchester City មកចូលរួមជាមួយនឹងក្រុម Dortmund ក្នុងឆ្នាំ២០១៧ ដោយស៊ុតបញ្ចូលទីបាន១៨គ្រាប់និងបញ្ជូនបាល់អោយមិត្តរួមក្រុមសម្រេចទីបានចំនួន៣០ដងក្នុងការបង្ហាញខ្លួនចំនួន៦៦លើក៕

ប្រភព៖ Dailymail