ជក់ចិត្តណាស់ គូភូមិផងរបងជាមួយកម្ពុជា! វៀតណាម ទម្លុះសំណាញ់ទីឥណ្ឌូនេស៊ី ៣គ្រាប់ ឯថៃផ្ដួលជើងខ្លាំងអារ៉ាប់រួម (មានវីដេអូ)

អាស៊ីអាគ្នេយ៍៖ ប្រទេសភូមិផងរបងជាមួយកម្ពុជា វៀតណាម និងថៃ សុទ្ធតែរកបាន ៣ពិន្ទុរៀងៗខ្លួនក្នុងការប្រកួតវគ្គជម្រុះជុំទីពីរព្រឹត្តិការណ៍ FIFA World Cup Qatar 2022 ក្នុងពូល G កាលពីយប់មិញ។

វៀតណាម បានយកឈ្នះម្ចាស់ផ្ទះឥណ្ឌូនេស៊ី ក្នុងលទ្ធផល ៣ទល់នឹង១។ ៣គ្រាប់របស់វៀតណាមរកបានដោយកីឡាករ Duy Manh Do, Ngoc Hai Que និង Nguyen Tien Linh ក្នុងម្នាក់មួយគ្រាប់ ខណៈ ១គ្រាប់របស់ឥណ្ឌូនេស៊ីរកបានដោយកីឡាករ Irfan Bachdim។

ចំណែកឯថៃ បានផ្ដួលជើងខ្លាំងអារ៉ាប់រួម ដោយលទ្ធផល ២ទល់នឹង១។ នៅក្នុងការប្រកួតនោះថៃជាអ្នកបើកការនាំមុខមុននៅនាទី២៦ តាមរយៈគ្រាប់បាល់របស់ខ្សែប្រយុទ្ធជើងចាស់ Teerasil Dangda មុននឹងអារ៉ាប់រួមតាមស្មើវិញនៅចុងវគ្គទីមួយនៅនាទី៤៥ ដោយកីឡាករ Ahmed Mabkhout។ យ៉ាងណាចូលដល់វគ្គទីពីរនៅនាទី៥១ ថៃបានរកគ្រាប់បាល់មួយគ្រាប់ទៀតដោយកីឡាករ Ekanit Panya ដែលបានធ្វើឲ្យថៃ នាំមុខអារ៉ាប់រួម ២-១ ដោយលទ្ធផលនេះបានរក្សារហូតបញ្ចប់ការប្រកួត។

ក្រោយជ័យជម្នះយប់មិញដូចគ្នា ធ្វើឲ្យថៃ និងវៀតណាម បន្តមាន ៧ពិន្ទុស្មើគ្នា ដោយឈ្នះ២ និងស្មើ១ ប៉ុន្តែវៀតណាម ចាញ់គ្រាប់ស៊ុតថៃ។ ដូច្នេះក្រុមជម្រើសជាតិបាល់ទាត់ថៃ ឈរនៅលេខ១ បណ្ដោះអាសន្ន៕

សូមទស្សនាវីដេអូ Highlight ការប្រកួតទាំងពីរនៅខាងក្រោម៖