តោកំណាចអង់គ្លេសស្ដារមុខមាត់លត់ប៊ុលហ្ការី៦គ្រាប់ ខណៈពេលដែល Ronaldo ស៊ុតគ្រាប់ទី៧០០របស់ខ្លួនក្នុងអាជីពទល់នឹងក្រុមអ៊ុយក្រែន (មានវីដេអូ)

ប៊ុលហ្ការី៖ ក្រុមប៊ុលហ្ការីក្នុងនាមជាម្ចាស់ផ្ទះបានបើកទ្ចារកីឡដ្ឋាន Vasil Levski ទទួលស្វាគមន៍ក្រុមភ្ញៀវតោកំណាចអង់គ្លេសក្នុងព្រឹត្តិការណ៍ជម្រុះយូរ៉ូឆ្នាំ២០២០កាលពីរាត្រីថ្ងៃច័ន្ទកន្លងទៅនេះ។

យោងតាមស្ថិតិរវាងក្រុមទាំងពីរមើលឃើញថាក្រុមភ្ញៀវសម្រុកដាក់គំនាបខ្លាំងទៅលើក្រុមម្ចាស់ផ្ទះដោយមានឱកាសស៊ុតទៅលើក្រុមម្ចាស់រហូតដល់ទៅ១៧ជើងចំគោលដៅ១៣ដងសម្រេចទីបាន៦គ្រាប់ចំណែឯក្រុមម្ចាស់ផ្ទះវិញមានឱកាសស៊ុតបានតែ៤ជើងចំគោលដៅ២ដងតែមិនអាចទម្លុះសំណាញ់ទីក្រុមភ្ញៀវបាននោះទេ។

៦គ្រាប់របស់ក្រុមជម្រើសជាតិអង់គ្លេសរកបានដោយកីឡាករ៤រូបផ្សេងៗគ្នាដោយគ្រាប់ទី១ធ្វើបានដោយខ្សែប្រយុទ្ធវ័យក្មេងរបស់ Manchester United កីឡាករ Marcus Rashford នៅនាទីទី៧ គ្រាប់ទី២និងទី៣ស៊ុតបញ្ចូលទីដោយកីឡាករ Ross Barkley នៅនាទីទី២០និង៣២ គ្រាប់ទី៤និងទី៥រកបានតាមរយៈកីឡាករ Raheem Sterling នៅនាទីទី៤៥និង៦៩ និងគ្រាប់ទី៦ទម្លុះសំណាញ់ទីដោយខ្សែប្រយុទ្ធ Harry Kane នៅនាទីទី៨៥។

ដូច្នេះក្រោយបញ្ចប់ការប្រកួតក្រុមជម្រើសជាតិប៊ុលហ្ការីបានរងបរាជ័យយ៉ាងអាម៉ាសក្រោមថ្វីជើងក្រុមជម្រើសជាតិអង់គ្លេសក្នុងលទ្ធផល០-៦ ជ័យជម្នះនេះជួយអោយអង់គ្លេសទទួលបាន៣ពិន្ទុបន្ថែមបន្តឈរលេខ១ក្នុងតារាងពូល ​A មាន១៥ពិន្ទុតាមពីក្រោយក្រុមជម្រើសជាតិសាធារណរដ្ឋឆេកឈរនៅលេខ២មាន១២ពិន្ទុ។

ក្រឡេកទៅមើល១គូទៀតដែលជាការប្រកួតក្នុងពូល B រវាងក្រុមអ៊ុយក្រែនប្រកួតទល់នឹងក្រុមជម្រើសជាតិព័រទុយហ្កាល់។

ក្នុងការប្រកួតនេះគេសង្កេតឃើញថា ក្រុមម្ចាស់ផ្ទះអ៊ុយក្រែនជាអ្នកស៊ុតបញ្ចូលទីនាំមុខមុន២គ្រាប់ទៅលើក្រុមភ្ញៀវ ដោយគ្រាប់ទី១ស៊ុតបញ្ចូលទីដោយកីឡាករ Roman Yaremchuk នៅនាទីទី៦ និងគ្រាប់ទី២រកបានដោយកីឡាករ Andriy Yarmolenko នៅនាទីទី២៧។ ដូច្នេះបញ្ចប់តង់ទី១ក្រុមម្ចាស់ផ្ទះនាំមុខបណ្ដោះអាសន្ន២ទល់នឹង០។

ចូលដល់តង់ទី២នៅនាទីទី៧២ក្រុមភ្ញៀវមានឱកាសតដៃបាន១គ្រាប់ដោយកីឡាករ Cristiano Ronaldo តាមរយៈការទាត់បាល់ពិន័យ១១ម៉ែត្រ ដែលជាគ្រាប់ទី៩៥របស់ខ្លួនអោយក្រុមជម្រើសជាតិព័រទុយហ្កាល់។

គួរបញ្ជាក់ផងដែរថាបន្ទាប់ពីស៊ុតចូលអ៊ុយក្រែន១គ្រាប់កាលពីយប់មិញនេះ វាបានក្លាយជាគ្រាប់ទី៧០០របស់កីឡាករ Cristiano Ronaldo ក្នុងអាជីពបាល់ទាត់របស់ខ្លួនក្នុងការបង្ហាញខ្លួនបានចំនួន៩៧៣ប្រកួត៕

សូមទស្សនាវីដេអូ Highlights ខាងក្រោមនេះ៖