ក្រោយសម្រាលកូនរួច បើចង់ឲ្យសុខភាពឆាប់ត្រឡប់មកសភាពដើមវិញ ស្រីៗគួរតែចេះតិចនិករក្សា។ ទាំងនេះជាវិធីមួយចំនួនណែនាំដោយអ្នកគ្រូពេទ្យឆ្មប សុំ សូរិយា បម្រើការងារនៅមន្ទីរពេទ្យបង្អែក ខ្សាច់កណ្តាល ខេត្តកណ្តាល ដែលងាយស្រួលធ្វើ និងល្អចំពោះស្រីៗទើបសម្រាលកូនរួច។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១- ញ៉ាំអាហារមានជីវជាតិ
អាហារដែលស្ត្រីសម្រាលកូនរួចត្រូវញ៉ាំ ជាអាហារមានជាតិទឹក សម្បូរជីវជាតិ ដែលមានបន្លែគ្រប់មុខ និងសាច់ដូចជា សាច់ជ្រូក ត្រី មាន់ និងសាច់គោជាដើម តែមិនមែនជាអាហារបែបក្រៀមក្រោះ។ បន្លែទាំងនេះមិនត្រឹមតែផ្ដល់ឲ្យយើងនូវសារធាតុចិញ្ចឹមខ្លួនឯងប៉ុណ្ណោះទេ តែថែមទាំងជួយឲ្យសម្បូរទឹកដោះល្អចំពោះសុខភាពកូនទៀតផង។ ជាពិសេសអាហារសម្បូរជាតិដែក ជាតិកាកសរសៃ ដូចជា ស្លឹកបាស ផ្ទី ស្លឹកអង្គាដី មិនគួរខ្វះឡើយ វាជួយម៉ាក់ៗស្រួលបន្ទោរបង់។
២- លេបថ្នាំតាមវេជ្ជបញ្ជា
ក្រោយសម្រាលកូនរួច គ្រូពេទ្យតម្រូវឲ្យម៉ាក់ៗលេបថ្នាំជាតិដែក និងវីតាមីនខ្លះៗបន្ត ៤២ ថ្ងៃទៀត ព្រោះជួយកុំឲ្យមានសភាពស្លេកស្លាំង។ ថ្នាំជាតិដែកក្រោយសម្រាលក៏មានសារៈសំខាន់ខ្លាំងណាស់ ដូចនេះម៉ាក់ៗគួរតែលេបតាមការកំណត់របស់គ្រូពេទ្យ និងទៅជួបគ្រូពេទ្យនៅពេលសម្រាលកូនបាន ៦ សប្តាហ៍។
៣- ផឹកទឹកក្ដៅ
ផឹកទឹកក្ដៅឧណ្ហៗល្អចំពោះសុខភាពស្ត្រីសម្រាលកូនរួច ព្រោះជួយឲ្យធ្លាក់ឈាមឆាប់អស់ និងជួយឲ្យសរសៃឈាមរត់ស្រួល។ មិនត្រឹមតែផឹកទឹកក្ដៅឧណ្ហៗទេ គួរតែងូតទឹកក្ដៅឧណ្ហៗដែរ ព្រោះជួយឲ្យយើងមានអារម្មណ៍ថាស្រួលខ្លួន។
៤- អនាម័យខ្លួនប្រាណ
ក្រោយសម្រាលកូនរួចអាចមានធ្លាក់ឈាមយ៉ាងហោចណាស់ ២ សប្ដាហ៍ ឬអ្នកខ្លះទៀតអាចរហូតដល់ ១ ខែឯណោះ។ ដូចនេះយើងត្រូវដោយប្រើសំឡីអនាម័យ ហើយឧស្សាហ៍ផ្លាស់ប្ដូរ ដើម្បីកុំឲ្យកកើតជាមេរោគ។ មួយវិញទៀតបើសម្លៀកបំពាក់ណាមានប្រឡាក់ មិនថាជាទឹកដោះ ឬឈាម ត្រូវដូរថ្មីជានិច្ច។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet