ខេត្តមណ្ឌលគិរី ៖ ក្រុមមន្ត្រីឧទ្យានុរក្សដែនជម្រកសត្វព្រៃភ្នំព្រេច សហការជាមួយកម្លាំងបុស្តិ៍នគរបាលរដ្ឋ បាលឃុំមេម៉ង់ បានចុះឃាត់ខ្លួនជនសង្ស័យពាក់ព័ន្ធករណីបាញ់សត្វព្រៃ(សត្វខ្ទីង)ដោយខុសច្បាប់ ។ ការ ចុះឃាត់ខ្លួននេះ គឺធ្វើឡើងនៅក្នុងផ្ទះរបស់ក្រុមជនសង្ស័យ កាលពីព្រឹកថ្ងៃទី១៤ កញ្ញា ស្ថិតភូមិពូចារ ឃុំមេម៉ង់ ស្រុកកែវសីមា ខេត្តមណ្ឌលគិរី ខណៈពួកគេកំពុងចម្អិនសាច់សត្វខ្ទីងធ្វើជាម្ហូប ប៉ុន្តែពេលកម្លាំងចុះទៅដល់ បានរត់ចែកជើងគ្នាអស់ ដោយកម្លាំងឃាត់ខ្លួនបានតែម្នាក់គត់ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសេចក្តីរាយការណ៍បន្តថា ជនសង្ស័យម្នាក់ដែលត្រូវឃាត់ខ្លួន មានឈ្មោះចប់ ហាញ ជាជនជាតិព្នង (ជាឪពុកក្មេកជនដែលបាញ់សម្លាប់សត្វខ្ទីង) ។ ដោយឡែក ម្នាក់ទៀតមិនទាន់ស្គាក់ឈ្មោះ តែជាកូនប្រសារបស់ជនខាងលើនេះ ។ កម្លាំងធ្វើការដកវត្ថុតាងមាន ១-អាវុធអាកាស្វ័យបត់១ដើម និងគ្រាប់ចំនួន៩គ្រាប់ ២-សាច់សត្វខ្ទីងស្រស់ចំនួន៣០គីឡូក្រាម ។ ៣-សាច់ខ្ទីងចម្អិនឆ្អិន១ឆ្នាំង និង៤-អាវុធកែច្នៃ(កាំភ្លើងខ្យល់)២ដើម ។
បច្ចុប្បន្ន មន្ត្រីជំនាញកំពុងសាកសួរជនសង្ស័យ ដើម្បីកសាងសំណុំរឿងចាត់ការបន្តតាមនីតិវិធី និងក៏កំពុងតាមស្វែងរកបក្សពួកបន្ត ។ គួរបញ្ជាក់ថា សត្វខ្ទីងជាព្រៃមួយដ៏កម្រមាន សឹងតែផុតពូជអស់ហើយ បែរជាត្រូវក្រុមព្រានព្រៃទាំងនេះ បាញ់សម្លាប់ដោយគ្មានការសោកស្តាយទាល់តែសោះ៕
ប្រភព៖ កោះសន្តិភាព