ពី​មុនទាល់​តែ​វ័យ​រាង​ជ្រេបន្តិចទើប​ត្របក​ភ្នែក​មើល​ទៅ​ចាប់​ផ្តើម​លេច​ស្នាម​ជ្រីវ​ជ្រួញ ប៉ុន្តែ​បច្ចុប្បន្ន ពិសេស​ស្រី ដោយ​សារ​ពូកែ Makeup គ្រប់ពេល ទោះ​ក្មេង​ត្រឹម​ ២០ ស្តើង ក៏​ត្របក​ភ្នែកជ្រីវ​ជ្រួញ​ដែរ ស្រីៗ​ខ្លះជ្រួញ​ជាង​អាយុ ៤០​ ប្លាយ​ទៅ​ទៀត។ មើល​ទៅ​គ្នា​យើងច្បាស់​ជា​ខ្វាយ​ខ្វល់ខ្លាំង​មិនខាន តែ​កុំ​បារម្ភ​ទៀតចាំ “Hello គ្រូពេទ្យ” តិចនិក​ម៉ាស្សា​ខ្លះប្រហែល​អាច​ជួយ​បាន។

១- ម៉ាស្សាបែបអក្សរ V

ដាក់​ម្រាមដៃ​កណ្ដាល​បញ្ចូល​គ្នា​ត្រង់​ចន្លោះ​ចិញ្ចើម ​រួច​ប្រើ​ម្រាម​ចង្អុលដៃ​អូស​ថ្នម​លើ​ត្របក​ភ្នែក​ទាំង​ពីរ​ ចេញ​ទៅ​សងខាង​ភ្នែក​ ដោយ​ធ្វើ​ជា​រាង​អក្សរ​V រួច​ចាប់​ទាញ​ផ្នែក​ត្របកភ្នែក​ក្រោម​ឡើង​លើ។ ​សម្រាក​មួយ​សន្ទុះ​ រួច​ចាប់​ធ្វើ​បន្ត​សកម្មភាព​ដដែល​ឲ្យ​បាន ​៦​ដង។ ត្រូវ​ចាំ​ថាមុន​នឹង​បញ្ចប់ការ​ម៉ាស្សា ​គ្នា​យើងត្រូវ​បិទ​ភ្នែក ​រួច​សម្រាក​បន្ធូរ​អារម្មណ៍​ប្រហែល​ ១០ ​ វិនាទី។

២- ម៉ាស្សា​ចលនា

ជា​ម៉ាស្សា​ចលនា ​ជាតិចនិក​មួយ​យក​ចេញ​ពី​វិធី​ហាត់​​បែប​យ៉ូហ្កា​ ដោយ​គ្រាន់​តែ​ធ្វើ​មាត់​រាង​ជា​អក្សរ​ O​ បន្ទាប់​មក​ព្យាយាម​បើក​បបូរមាត់​ខាងលើ​​ ក្រោម​ឃ្លាត​ចេញ​ពី​គ្នា​បន្តិច​ម្ដងៗ​ រួច​ដាក់​ម្រាម​ចង្អុលដៃ​ បញ្ឈរ​លើ​ស្នាម​ជ្រួញ​ត្របក​ភ្នែក​ក្រោម​ រួច​សម្លឹង​ទៅ​លើ​ដើម្បី​បន្តឹង​ស្បែក​ត្របក​ភ្នែក​ទាំង​ពីរ និង​​បន្ត​ធ្វើ​បែប​នេះ​ ឲ្យ​​បាន ​៣០​នាទី​ រៀង​រាល់ថ្ងៃ។

៣- ម៉ាស្សា​ផ្លាស់ប្តូររហ័ស

តិចនិក​ម៉ាស្សាប្រភេទ​នេះ ​តម្រូវឲ្យ​រក្សា​លំនឹង​ក្បាល​ ក​ និង​មុខ​ បន្ទាប់មក​តម្រង់​ភ្នែក​មើល​ទៅ​ស្តាំ​ដៃ​ រួច​ងាក​ទៅ​ឆ្វេង​ ដោយ​​បន្ទាប់មក​សម្លឹង​ពិដាន​ រួច​មើល​ចុះ​មក​ក្រោម។ ចាំថា ត្រូវ​បិទ​ភ្នែក​រយៈពេល​ ៥វិនាទី​ មុន​ពេល​ចាប់ផ្ដើម​ម្ដង​ទៀត។

៤- ម៉ាស្សា​ចលនាភ្នែក

ដាក់​ម្រាម​ចង្អុល​ដៃ​នៅ​ខាងក្រៅ​ចិញ្ចើម ​ស្ទាប​ថ្នមៗ​ជុំវិញ​រង្វង់​ភ្នែក​ បន្ទាប់​មក​ធ្វើ​ចលនា​បញ្ច្រាសទៅ​បញ្ច្រាសមក​ច្រើន​ដង រួច​យក​ចង្អុលដៃ​អង្អែល​ថ្នមៗ​លើ​ស្នាម​ជ្រួញ​ក្រោម​ភ្នែក​ ៗ ចាប់​ពី​ច្រមុះ​ចេញ​ទៅក្រៅ និង​បន្ត​ធ្វើ​បែប​នេះ​ ឲ្យ​បាន​យ៉ាង​តិច ​៤ ដង។

៥- ម៉ាស្សាបាតដៃ

វិធី​នេះ គ្នា​យើង ​គ្រាន់តែ​បិទ​ភ្នែក ​រួច​ត្រដុស​ម្រាមដៃ​ដើម្បី​បង្កើត​កម្ដៅ បន្ទាប់មក​ យក​បាតដៃ​ទាំងពីរ​ សង្កត់​លើ​ភ្នែក​ថ្នមៗ​ ដើម្បី​ត្របក​ភ្នែក​ស្រូប​យក​កម្ដៅជាការ​ស្រេច។

តិចនិក​ម៉ាស្សាខាង​លើ​​នេះ​ អាច​ជួយ​ពង្រឹង​សាច់ដុំ​​ជុំវិញ​ភ្នែក ហើយ​បើ​ស្រីៗ​គ្នា​យើង​ ​អនុវត្ត​បាន​ទៀងទាត់ ស្បែក​យើងនឹង​​រំញោច ​ដើម្បី​ផលិត​សារធាតុ​ខូឡាជែន​និង​អេឡែស្ទីន​កាន់តែ​ច្រើន ​អាច​ជួយ​កាត់​បន្ថយ​ស្នាម​ជ្រីវជ្រួញ។

ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

អត្ថបទផ្ដល់សិទ្ធិដោយ Hello Krupet

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 085836679 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 085836679 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សម្រស់ & សុខភាព និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]