គភ៌ស្ថិតនៅទីតាំងបញ្ច្រាស មិនព្រមបង្វិលក្បាលចុះក្រោម ជាកង្វល់របស់ម៉ាក់ៗដែលមានបំណងសម្រាលកូនតាមធម្មជាតិ។ ថ្ងៃនេះ «Hello គ្រូពេទ្យ» នឹងបកស្រាយលម្អិតពីពេលវេលា ដែលកូនត្រូវបង្វិលក្បាលចុះក្រោម និងវិធីជួយបង្វិលពីខាងក្រៅរបស់គ្រូពេទ្យផ្នែកសម្ភព។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សទារកក្នុងផ្ទៃបង្វិលខ្លួនគ្រប់ពេលទាំងអស់ បង្វិលចុះបង្វិលឡើង ប៉ុន្តែទារកនឹងបង្វិលក្បាលចុះមកក្រោមរហូត ចាប់ពីសប្តាហ៍ទី ៣២-៣៣ ឡើងទៅ ដើម្បីត្រៀមលក្ខណៈក្នុងការសម្រាល។ នេះបើតាមការបញ្ជាក់របស់លោកស្រីវេជ្ជបណ្ឌិត ទី សុវណ្ណរដ្ឋ ឯកទេសសម្ភព រោគស្ត្រី នៃមន្ទីរសម្រាលព្យាបាល និងសម្ភព មាតា។
ប៉ុន្តែទោះបីជាកូនមិនបង្វិលនៅអំឡុងសប្តាហ៍ទី ៣២-៣៣ ក៏ដោយ ម៉ាក់ៗមិនបាច់បារម្ភពេកទេ យើងអាចបន្តតាមដាននៅសប្តាហ៍ទី ៣៧-៣៨ ឬដល់ពេលឈឺពោះ ដើម្បីដឹងថា កូនបង្វិល ឬអត់។
ទោះយ៉ាងណា លោកស្រីវេជ្ជបណ្ឌិតដែលមានសញ្ញាបត្រពីប្រទេស បារាំង រូបនេះថា ចាប់ពី ៣៧ សប្តាហ៍ឡើងទៅ កូនក្នុងពោះកាន់តែធំ អ៊ីចឹងទម្រង់កូនបែបម៉េច គឺនៅបែបហ្នឹងដដែល ព្រោះទីតាំងតូចចង្អៀត ភាគច្រើនពិបាកនឹងបង្វិល។
បើសិនជាម៉ាក់ៗទៅមើលអូកេឃើញថា កូននៅទីតាំងបញ្ច្រាស មិនបង្វិលក្បាលចុះក្រោមទេ គ្រូពេទ្យមានវិធីបង្វិលពោះរបស់ស្ត្រី ទៅតាមទម្រង់របស់កូន ដើម្បីឲ្យក្បាលកូនចុះមកក្រោម អាចកើតតាមធម្មជាតិបាន។ វិធីនេះធ្វើនៅពេលគភ៌អាយុ ៣៦-៣៧ សប្តាហ៍ ហើយអាចមានកត្តាជោគជ័យ មិនជោគជ័យ ឬអាចគ្រោះថ្នាក់អំឡុងពេលជួយបង្វិល។
ក្នុងករណីគ្រោះថ្នាក់ គ្រូពេទ្យនឹងវះកាត់យកកូនចេញភ្លាមពេលកំពុងតែបង្វិល។ ម្យ៉ាងវិញទៀត បើម៉ាក់ៗមានសុកនៅពាំងមាត់ស្បូន ទងសុករុំកកូន គ្រូពេទ្យមិនអាចប្រើវិធីជួយបង្វិលបានទេ ម៉ាក់ៗចាំបាច់ត្រូវសម្រាលកូនដោយវះកាត់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុតសូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet