ខេត្តកណ្តាល ៖ សេចក្តីរាយការណ៍​បឋម​បាន​ឲ្យ​ដឹង​ថា យុវជន​ម្នាក់​បាន​ស្លាប់​បាត់បង់​ជីវិត​នៅ​និង​កន្លែង ខណៈ​បើក​អេ​ស្កា​វ៉ា​ទ័​រ​ឡើង​ឡាន ខ្វះ​ការ​ប្រុង​ប្រយ័ត្ន និង​ខុស​បច្ចេកទេស បណ្តាល​អោយ​ក្រឡាប់​សង្កត់​ខ្លួនឯង កាលពី​វេលា​ម៉ោង​១០​និង​១០​នាទី​ព្រឹក ថ្ងៃ​ទី​២៤ ខែសីហា​នេះ នៅ​ចំណុច​ចុង​ព្រែក​បាក់ ស្ថិត​ក្នុងភូមិ​ព្រែក​បាក់ ឃុំ​ព្រែក​ទន្លាប់ ស្រុក​លើក​ដែក ខេត្តកណ្តាល ។

បើ​តាម​លោកពូ​ឈ្មោះ លន់ កិ អាយុ​៤៩​ឆ្នាំ ជនជាតិ​ខ្មែរ មុខរបរ​កសិករ​មាន​ទីលំនៅ​ភូមិ​ព្រែក​តូច ឃុំ​ព្រែក​ទន្លាប់ ស្រុក​លើក​ដែក ខេត្តកណ្តាល ត្រូវជា​ឪពុក​បង្កើត​របស់​ជន​រង​គ្រោះ​ឈ្មោះ កិ ណា​រូ ភេទ​ប្រុស អាយុ​២១​ឆ្នាំ មុខរបរ​បើកបរ​អេ​ស្កា​វ៉ា​ទ័​រកា​យ​ដី រស់នៅ​ក្នុង​បន្ទុក បាន​រៀបរាប់​ទាំង​ទឹកមុខ​ក្រៀមក្រំ​អា​លោះ​អាល័យ​សោកស្តាយ​កូន​ជាទី​ស្រលាញ់​ថា ជន​រង​គ្រោះ គឺជា​កូន​ទី​២ បន្ទាប់​ពី​កូន​បង ក្នុង​ចំណោម​កូន​ទាំង​៥​នាក់​ក្នុង​បន្ទុក ។ លោកពូ​បន្ត​ថា កូន​គាត់​(​ជន​រង​គ្រោះ​) បាន​ស៊ីឈ្នួល​បើកបរ​អេ​ស្កា​វ៉ា​ទ័​រ​អោយ​ថៅកែ​ឈ្មោះ អ៊ុ​ក ទឹង ភេទ​ប្រុស អាយុ​ប្រហែល​៣០​ឆ្នាំ ជនជាតិ​វៀតណាម មាន​ទីលំនៅ​ភូមិ​កំពង់ចម្លង ឃុំ​ព្រែក​ទន្លាប់ ស្រុក​លើក​ដែក​រយៈពេល​យូរ​ឆ្នាំ​មក​ហើយ ។ ហើយ​នៅ​ព្រឹក​មុន​ពេល​កើតហេតុ​ថ្ងៃ​ទី​២៤ ខែសីហា ថៅកែ​បានអោយ​កូន​របស់​គាត់ (​ជន​រង​គ្រោះ​)​បើក​អេ​ស្កា​វ៉ា​ទ័​រ ឡើង​ពី​កន្លែង​ជីក​ក្រ​វ៉ា​ត់​ព្រុំ​ដី នៅ​ព្រៃ​ខាងលិច​មក​ផ្ទះ ។

លុះ​ពេល​ជន​រង​គ្រោះ​បើក​មក​ដល់​ចំណុច​ចុង​ព្រែក​បាក់​ក៏​បាន​បើក​អេ​ស្កា​វ៉ា​ទ័​រ​ឡើង​លើ​រថយន្ត​១​គ្រឿង​មិន​ស្គាល់​ម៉ាក​នៅ​ចាំ​ដឹក​បន្ត ។ ប៉ុន្តែ​ពេល​បើក​ឡើង​ដោយសារ​ខ្វះ​ការ​ប្រុង​ប្រយ័ត្ន និង​ខុស​បច្ចេកទេស (​ឈប់​ឡាន​អែប​មាត់​ព្រែក​ពេក​) ទើប​បណ្តាល​អោយ​អេ​ស្កា​វ៉ា​ទ័​រ​នោះ​ក្រឡាប់​ធ្លាក់​ពីលើ​ឡាន​ចូល​ទៅ​ក្នុង​ព្រែក មាន​ជម្រៅ​ប្រហែល​៥​ម៉ែត្រ បង្ក​អោយ​ជន​រង​គ្រោះ (​កូន​គាត់​) ជា​តៃកុង​កៀប​ជាប់​នៅ​ខាងក្រោម​កង់​អេ​ស្កា​វ៉ា​ទ័​រ​កប់​ទៅ​ក្នុង​ទឹក​ភក់​ដាច់ខ្យល់​ស្លាប់ យ៉ាង​អាណោចអាធម្ម​បំផុត ។

ចំណែកឯ​រថយន្ត​បើក​រត់គេច​ខ្លួន​បាត់ ។ ក្នុង​ករណី​នេះ​ដែរ បាន​ធ្វើ​អោយ​មហាជន​ជា​ច្រើន​នាំ​គ្នា​រិះគន់​ថា គឺ​មក​ពី​ការ​ធ្វេសប្រហែស​របស់​ថៅ កែ ឈ្មោះ អ៊ុ​ក ទឹង ជា​ជនជាតិ​វៀតណាម​នោះ ដែល​បណ្តែតបណ្តោយ​អោយ​ជន​រង​គ្រោះ​បើកបរ​អេ​ស្កា​វ៉ា​ទ័​រ​ឡើង​ឡាន​ម្នាក់ឯង ដោយ​គ្មាន​ព្រូ​ជួយ​មើល​ឆ្វេង​ស្តាំ​ទើប​បង្ក​អោយ​កើត​មាន​គ្រោះថ្នាក់​បែប​នេះ ។

សូ​ម្បី​តែ​សព​ជន​រង​គ្រោះ​កប់​នៅ​ក្រោម​អេ​ស្កា​វ៉ា​ទ័​រ​រាប់​ម៉ោង​ក៏​គ្មាន​ឃើញ​ថៅកែ​ចិត្តខ្មៅ​រូប​នោះ​ជួយ​រក​វិធី ឫ​ហៅ​ឡាន​មក​ស្ទូច​ជួយ​យក​សព​ចេញ​នោះ​ឡើយ ។ រហូត​ដល់​ម៉ោងជាង​១២​ថ្ងៃត្រង់​ប្រជាជន​នាំ​គ្នា​ចុះ​កាយ​ភក់​យក​សាកសព​បាន​ទើប​គេ​ឃើញ​ថៅ កែ​ជនជាតិ​វៀតណាម​នោះ​បើកឡាន​មក​ដឹក​សព​យក​ទៅ​ផ្ទះ​អោយ​ក្រុម​គ្រួសារ​ជន​រង​គ្រោះ​រៀបចំ​ធ្វើបុណ្យ​តាម​ប្រពៃណី ។ ពាក់ព័ន្ធ​ករណី​នេះ​ដែរ សមត្ថកិច្ច​ក៏​បាន​កសាង​សំណុំរឿង​តាម​នីតិវិធី​ផង​ដែរ ៕ កែសម្រួល​ដោយ ៖ សុ​ឃា​ក់

ប្រភព​​​៖ កោះសន្តិភាព

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 085836679 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 085836679 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]