ក្ដៅៗ!! Barcelona កោះហៅកីឡាករវ័យ ១៦ឆ្នាំម្នាក់មកជំនួស Lionel Messi

អេស្ប៉ាញ៖ លោក Ernesto Valverde បានកោះហៅយុវជនវ័យ ១៦ឆ្នាំ Ansu Fati មកចូលរួមក្នុងបញ្ជីឈ្មោះកីឡាករក្រុមធំ Barcelona ត្រៀមប្រកួតជាមួយ Real Betis នៅអាទិត្យនេះ។

Fati ទើបតែបានចូលរួមហ្វឹកហាត់ជាមួយក្រុមធំរបស់ក្លិបអ្នកមានបុណ្យប៉ុន្មានសប្ដាហ៍នោះទេ ប៉ុន្តែក្រោយបញ្ហារបួសរបស់កីឡាករសំខាន់ៗដូចជា Lionel Messi, Luis Suarez និង Ousmane Dembele បានធ្វើឲ្យអ្នកចាត់ការទូទៅលោក Valverde ផ្ដល់ឱកាសដល់យុជនដូចជា Fati និង Abel Ruiz ក្នុងការបង្ហាញសមត្ថភាពនៅលើទីលាន។

Fati កើតនៅទីក្រុង Guinea-Bissau ប្រទេសព័រហ្គីណេ នៅថ្ងៃទី៣១ ខែតុលា ឆ្នាំ២០០២។ យោងទៅតាមសារព័ត៌មាន Mundo Derportivo ខ្សែប្រយុទ្ធវ័យក្មេង Fati បានផ្លាស់មកទីកដីអេស្ប៉ាញកាលពី ៣ឆ្នាំមុនដោយទៅចូលរួមជាមួយ Sevilla មុននឹងមកចូលរួមជាមួយ Barcelona ក្នុងក្រុមយុវជន។

បើសិនជា Fati អាចចូលលេងក្នុងការប្រកួតយប់ថ្ងៃអាទិត្យនេះ គេនឹងក្លាយជាកីឡាករវ័យក្មេងទី២ ដែលបង្ហាញខ្លួនផ្លូវការឲ្យ Barcelona (១៦ឆ្នាំ និង ២៩៨ថ្ងៃ) បន្ទាប់ពីកីឡាករ Vicente Martinez  ដែលចូលលេងដំបូងឲ្យក្លិបមានមូលដ្ឋាននៅតំបន់កាតាឡាន់នៅវ័យ ១៦ឆ្នាំ និង ២៧៨ថ្ងៃ កាលពីរដូវកាល ១៩៤១-១៩៤២។

គួរបញ្ជាក់ផងដែរថា Barcelona ទើបតែបន្តកុងត្រាឲ្យខ្សែប្រយុទ្ធវ័យក្មេងមកពីទ្វីបអាហ្រិ្វករូបនេះរហូតដល់ខែមិថុនា ឆ្នាំ២០២២៕

ប្រភព៖ Marca