លើកនេះ រំដួលលិចទឹក យកកន្ទេលមកច្នៃធ្វើជា សម្លៀកបំពាក់បែបនេះម្ដង

ភ្នំពេញ៖ ប្រិយមិត្តជាច្រើន ជាពិសេសអ្នកដែលនិយម ប្រើប្រាស់បណ្ដាញសង្គម ប្រាកដជាបានស្គាល់យ៉ាងច្បាស់អំពី រំដួលលិចទឹក​ ដែលជាអ្នកមានទេពកោសល្យ ខាងផ្នែកកែច្នៃម៉ូតសម្លៀកបំពាក់ប្លែកៗ តាមរបៀបខ្មែរ គួរឲ្យចាប់អារម្មណ៍។

បន្ថែមពីនេះផងដែរ រំដួលលិចទឹក​ ក៏បាននាំយកនូវ ម៉ូតសម្លៀកបំពាក់ទាំងនោះ ទៅបង្ហាញលើឆាកជាតិ និងអន្តរជាតិ ឲ្យមានការទទួលស្គាល់ជាច្រើនទៀតផង ធ្វើឲ្យអ្នកណាៗក៏ពេញចិត្ត និងគាំទ្រស្នាដៃរបស់គេដែរ។

យ៉ាងណាមិញ ស្រាប់តែ ថ្មីៗនេះ រំដួលលិចទឹក បានធ្វើឲ្យទស្សនិកជន មានការភ្ញាក់ផ្អើលជាថ្មីបន្ទាប់ពី បានច្នៃសម្លៀកបំពាក់បែបប្រពៃណីខ្មែរ ​យ៉ាងប្លែកភ្នែក ដោយយកកន្ទេល ស្លឹករំចេក កាត់ធ្វើជា សំពត់បត់ អាវក៏ជ្រុង​ ទៅបង្ហាញម៉ូត ក្នុងកម្មវិធី «អគារបេតិកភណ្ឌដែលត្រូវគេមើលរំលង» មើលទៅសមសួន និងលេចធ្លោថែមទៀតផង។

គួរបញ្ជាក់ផងដែរថា​ ក្រៅពីមួយឈុតនេះ រំដួលលិចទឹក ក៏បានកែច្នៃសម្លៀកបំពាក់ ឲ្យតារាបង្ហាញម៉ូតផ្សេងទៀត ថែមទាំងមិនមែនជាលើកទីមួយសម្រាប់​ គេនោះទេ ប៉ុន្តែ រាល់ពេលដែលលេចចេញនូវ សម្លៀកបំពាក់កែច្នៃម្ដងៗ ធានាថា តែងតែមាន អ្វីប្លែកជាប្រចាំ៕

ចង់ជ្រាបច្បាស់ ទស្សនារូបភាពខាងក្រោម៖