ខេត្តបាត់ដំបង ៖ សេចក្តីរាយការណ៍បានបន្តឱ្យដឹងថា គិតត្រឹមម៉ោង១២ថ្ងៃត្រង់ទី០៨ សីហា នេះ បុរសរងគ្រោះ ដោយត្រូវជាប់ក្នុងរូងភ្នំនោះ គឺមានសុខភាពបានល្អប្រសើរជាងពីថ្ងៃម្សិលមិញហើយ ប៉ុន្តែគាត់នៅឈឺផ្សាស្នាមដាច់រលាត់ដោយកៀបក្បាលនិងដងខ្លួន ហើយក្រុមគ្រូពេទ្យក៏កំពុងតាមដាន និងព្យាបាលជាបន្តបន្ទប់ដែរ ស្ថិតក្នុងមន្ទីរពេទ្យបង្អែក ខេត្តបាត់ដំបង ។ សូមរំលឹកថា ការសង្គ្រោះជនរងគ្រោះនេះ គឺបានកម្លាំងនាំចេញមកក្រៅ គឺនៅវេលាម៉ោងប្រមាណ៦ និង៥៥នាទីល្ងាចថ្ងៃទី០៧ សីហា ស្ថិតក្នុងរូងថ្មភ្នំហុងទឹក ក្នុងភូមិក្បាលហុងទឹក ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
នាព្រឹកថ្ងៃទី៨ សីហា ដដែលនេះ នៅក្នុងមន្ទីរពេទ្យខេត្តបាត់ដំបង ជនរងគ្រោះឈ្មោះបូរ៉ា បានរៀបរាប់ប្រាប់កោះសន្តិភាពឱ្យដឹងថា កាលពីវេលារសៀលក្នុងថ្ងៃទី៤ សីហា ខ្លួនបានចូលទៅរកកើបអាចម៍ប្រចៀវដូចធម្មតាតែម្នាក់ឯង ។ លុះពេលកំពុងរកកន្លែងដែលអាចចូលទៅតាមរូងផ្សេងៗទៀត ត្រូវប្រើពិលពាក់នៅលើក្បាលដោយសារកន្លែងរូងភ្នំចង្អៀត មានថ្មខ្ពស់ទាប បានប៉ះពិលនៅលើក្បាលធ្លាក់ ទៅតាមកន្លៀតជញ្ជាំងថ្មប្រហែល១ម៉ែត្រពីដៃ ។
លោកបន្តថា ដោយសារមើលអ្វីមិនឃើញ ព្រោះក្នុងរូងងងិត ក៏ខិតខំយកកន្សែងដែលមានជាប់ខ្លួនបោះធ្វើជាខ្សែ ដើម្បីទាញយកពិលមកវិញ តែកន្លៀតថ្មនោះ វាមានសណ្ឋានចុះមកខាងក្រោម ពិលនោះក៏ចេះតែធ្លាក់មកដែរ។ ហើយខ្លួនក៏ចេះតែដេញតាមបញ្ឆិតតាមកន្លៀតថ្មនោះ ខ្លួនក៏ធ្លាក់មកក្រោមប្រហែលជាង១០ម៉ែត្រ ទើបជាប់ខ្លួនរើលែងរួចនៅទីនោះទៅឮនៅម៉ោងប្រមាណ៥ល្ងាចថ្ងៃទី៤ សីហា នោះ ទៅទើបស្រែកហៅឲ្យគេជួយ (ម៉ែអើយជួយផង) រហូតខ្សោះកម្លាំងគ្មានអ្នកណាដឹងឮឡើយ ។
ជាមួយគ្នានេះ លោកទេសរដ្ឋមន្ដ្រី គន់ គីម ក៏បានថ្លែងអំណរគុណ និងកោតសរសើរដល់កម្លាំងសមត្ថកិច្ចទាំងអស់ដែលបានរួមដៃគ្នាយ៉ាងយកចិត្ដទុកដាក់លើការងារជួយសង្គ្រោះ រួមមានអង្គភាព៧១១, កម្លាំងយោធភូមិភាគទី៥, កម្លាំងនគរបាល និងកម្លាំងកងរាជអាវុធហត្ថ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ប្រភព៖ កោះសន្តិភាព
Bong I.T