"The Zero Project Cambodia" ដែលជាកម្មវិធីបណ្តុះបណ្តាលតារាចម្រៀងតាមបែប K-pop ទៅក្នុងទីផ្សារតន្ត្រីកម្ពុជា បានប្រកាសបញ្ជាក់ពីសមាជិកចំនួន ៩ រូប សម្រាប់ក្រុមចម្រៀងបុរសថ្មីមួយ ដែលគ្រោងនឹងបង្ហាញខ្លួនជាផ្លូវការនៅឆ្នាំ ២០២៧ ខាងមុខនេះ។

កម្មវិធីនេះបានជ្រើសរើសសមាជិកនៅក្នុងការប្រកួតជុំចុងក្រោយដែលមានឈ្មោះថា 'Final Spots' នៅលើឆាកតន្ត្រីកាលពី សប្ដាហ៍មុន នៅល្ងាចថ្ងៃទី24-25 តុលា បន្ទាប់ពីបានឆ្លងកាត់ការសាកល្បងសមត្ថភាពតាមអនឡាញ​ (online auditions) និង ការជ្រើសរើសជាដំណាក់កាលៗរួចមក។ ហើយការបង្ហាញខ្លួនរបស់ពួកគេ បានបញ្ចប់ទៅយ៉ាងរលូន បន្ទាប់ពីហ្វឹកហាត់ ការច្រៀង រ៉េប និង រាំ អស់ជាច្រើនខែមក ជាមួយនិងគ្រូបង្វិកជនជាតិខ្មែរនិងកូរ៉េ។

សមាជិកទាំង ៩ រូបនោះរួមមាន៖ Kael, Bath, JH, TongLong, Ray, Neo, Finn, Korn និង Ju Mong។ ពួកគេនឹងចាប់ផ្តើមការហ្វឹកហាត់ និងរៀបចំខ្លួនសម្រាប់ការផលិតអាល់ប៊ុមចម្រៀង ដោយមានគោលដៅបង្ហាញខ្លួនជាផ្លូវការនៅឆ្នាំ ២០២៧។

ជាមួយគ្នានេះដែរ Yi Fan និង Maro ក៏ត្រូវបានប្រកាសថាជាសមាជិកនៃក្រុម 'Trainees B' (ក្រុមអ្នកហ្វឹកហាត់ត្រៀមបង្ហាញខ្លួនជាផ្លូវការ) ដែលនឹងចូលរួមនៅក្នុងគម្រោងនេះផងដែរ។

លោក Chanty Ban នាយកគម្រោងបានមានប្រសាសន៍ថា៖ «យើងផ្តោតលើការបណ្តុះបណ្តាលតារាចម្រៀង ដែលនឹងក្លាយជាអ្នកដឹកនាំឧស្សាហកម្មតន្ត្រីកម្ពុជា ដោយផ្អែកលើស្តង់ដារ K-pop និងប្រព័ន្ធបណ្តុះបណ្តាលដែលមានលក្ខណៈជាប្រព័ន្ធ»។ លោកបានបន្ថែមថា៖ «ខ្ញុំសង្ឃឹមថា កម្មវិធីនេះនឹងក្លាយជាឱកាសមួយសម្រាប់ក្រុមចម្រៀងបុរសកម្ពុជា ក្នុងការពង្រីកវិសាលភាពទៅកាន់ទីផ្សារអន្តរជាតិ និងណែនាំប្រទេសកម្ពុជាឱ្យពិភពលោកបានស្គាល់»។

កម្មវិធីនេះគួរឱ្យកត់សម្គាល់ ត្រង់ថាវាបានយកប្រព័ន្ធជ្រើសរើស និងបណ្តុះបណ្តាលបេក្ខជនតាមបែប K-pop មកអនុវត្តនៅក្នុងឧស្សាហកម្មតន្ត្រី POP របស់កម្ពុជា។ បញ្ហាប្រឈមដ៏សំខាន់មួយនៅពេលខាងមុខ គឺថាតើគម្រោងនេះអាចពង្រីកខ្លួនទៅកាន់ទីផ្សារអន្តរជាតិបានដែរឬទេ ខណៈពេលដែលនៅតែរក្សាបាននូវលក្ខណៈពិសេសនៃតន្ត្រីក្នុងស្រុក និងអត្តសញ្ញាណផ្ទាល់ខ្លួនរបស់សិល្បករ។

Credit to: Star Daily News (https://www.stardailynews.co.kr)

Credit image to FB page: The Zero Project 

Credit image to FB page: 李小艺 - Li XiaoYi