ក្រុមអ្នកស្រាវជ្រាវបុរាណវិទ្យាបានរកឃើញរចនាសម្ព័ន្ធគ្រឹះប្រាសាទឥដ្ឋបុរាណដ៏កម្រ និងប្លែកពីគេបំផុតមួយ នៅស្ថានីយ «ទួលអង្គកំណប់» ស្ថិតក្នុងខណ្ឌព្រែកព្នៅ ជាយរាជធានីភ្នំពេញ ដែលមានលក្ខណៈខុសប្លែកទាំងស្រុងពីស្ថាបត្យកម្មប្រាសាទសម័យបុរេអង្គរដទៃទៀតដែលធ្លាប់បានប្រទះឃើញកន្លងមក។

ចំណុចគួរឱ្យភ្ញាក់ផ្អើលបំផុតនៃការធ្វើកំណាយស្រាវជ្រាវនេះ គឺនៅខាងក្រោមគ្រឹះឥដ្ឋនៃតួប្រាសាទបុរាណ ដែលត្រូវបានសន្និដ្ឋានជាបឋមថាស្ថិតក្នុងរវាងសតវត្សរ៍ទី៦ ត្រូវបានបុព្វបុរសរៀបចំទ្រាប់ដោយ «ថ្មគ្រួសទន្លេរលីងរលោង» យ៉ាងផ្ចិតផ្ចង់ ជំនួសឱ្យការប្រើប្រាស់គ្រឹះថ្មភក់ ឬថ្មបាយក្រៀមដូចទម្លាប់បុរាណ។

លើសពីនេះទៅទៀត ក្រុមការងារជំនាញក៏បានរកឃើញផ្ទាំងថ្មភក់រាងកន្លះរង្វង់មួយផ្ទាំង មានក្បូរក្បាច់ចម្លាក់យ៉ាងល្អឯកពិសិដ្ឋ (ហៅថា ថ្មព្រះចន្ទ ឬ Moonstone) ដែលមានប្រវែង ៧០ សង់ទីម៉ែត្រ ធ្លាប់ដើរតួជាកាំជណ្តើរនៃច្រកចូលប្រាសាទដើមពីសម័យបុរាណផងដែរ។

ការចុះស្រាវជ្រាវនេះ ត្រូវបានធ្វើឡើងក្រោមទម្រង់ «បុរាណវិទ្យាសង្គ្រោះបន្ទាន់» ដើម្បីស្រង់ទិន្នន័យ ថែរក្សាវត្ថុតាង និងចងក្រងឯកសារប្រវត្តិសាស្ត្រឱ្យបានទាន់ពេលវេលា ស្របពេលដែលទួលបុរាណរាប់ពាន់កន្លែងនៅទូទាំងប្រទេសកំពុងប្រឈមមុខនឹងហានិភ័យនៃការបាត់បង់ជារៀងរហូត ដោយសារតែការពង្រីកផ្ទៃដីកសិកម្ម និងការអភិវឌ្ឍសំណង់ហេដ្ឋារចនាសម្ព័ន្ធនានាយ៉ាងគំហុក៕