ក្រសួងធនធានទឹកនិងឧតុនិយមបានចេញសេចក្ដីប្រកាសអំពីស្ថានភាពអាកាសធាតុ និងកម្ពស់ទឹកសមុទ្រដែលនឹងត្រូវទទួលរងឥទ្ធិពលពីព្យុះសមុទ្រចិនខាងត្បូងដែលបានវិវត្តទៅជាព្យុះទី១៤ ឈ្មោះគូជីរ៉ា (Kujira) T2614 រួមជាមួយនឹងព្យុះសង្ឃរាទី១៣ ឈ្មោះ ដូលហ្វីន (Dolphin) T2613 មានឥទ្ធិពលខ្លាំងលើរបបខ្យល់មូសុងនិរតីដែលបក់លើឈូងសមុទ្របេងហ្គាល សមុត្រអាន់ជាម៉ាន់ សមុទ្រចិនខាងត្បូង អាងទន្លេមេគង្គ សមុទ្រកម្ពុជា និងលើព្រះរាជាណាចក្រកម្ពុជា។

ទោះបីជាកម្ពុជានឹងទទួលរងឥទ្ធិពលព្យុះនេះក៏ដោយ ប៉ុន្ដែប្រទេសកម្ពុជាមិនស្ថិតនៅក្នុងគន្លងនៃព្យុះទី១៣ និងទី១៤នេះទេ។ 

យ៉ាងណាមិញ យើងនឹងទទួលការប្រែប្រួលអាកាសធាតុដោយមាន ខ្យល់កន្ត្រាក់ ផ្គររន្ទះ និងភ្លៀងធ្លាក់គ្របដណ្ដប់៥០%ទូទាំងខេត្តក្រុង។ ចំណែកឯតំបន់សមុទ្រក៏នឹងមានរលកបោកបក់ខ្លាំងដែលមានកម្ពស់មធ្យមអប្បបរមា កន្លះម៉ែត្រ និង អតិបរមា ១ម៉ែត្រ៧៥សង់ទីម៉ែត្រ។

អាស្រ័យហេតុនេះ សូមបងប្អូនប្រជាពលរដ្ឋបង្កើតការប្រុងប្រយ័ត្នចំពោះការធ្វើដំណើរ ត្រៀមអាវភ្លៀង និងចៀសវាងការធ្វើដំណើរលើផ្លូវទឹក តាមការបរិច្ឆេទខាងលើ។ ក្រសួងធនធានទឹក និងឧតុនិយមនឹងបន្ដធ្វើការតាមដានវិភាគស្ថានភាពអាកាសធាតុដើម្បីជម្រាបជូនជាដំណឹងក្នុងករណីមានការប្រែប្រួល៕