កម្សាន្ត៖ តារា​សម្ដែង Leonardo DiCaprio បានទាក់ទាញចំណាប់អារម្មណ៍ នៅពេលដែលអង្គុយ​លើ​ទូក ​មើល​ទៅ​រូបលោក ហាក់មានភាពហត់​នឿយ ដែល​ត្រូវ​បាន​អ្នក​គាំទ្រ​ពិភាក្សា​យ៉ាង​ក្ដៅ​គគុក។

ក្នុងសប្តាហ៍នេះ Dailymail បានចុះផ្សាយរូបថត របស់តារាសម្ដែងក្នុងរឿង Titanic គឺលោក Leonardo DiCaprio ខណៈពេលទៅវិស្សមកាលនៅសមុទ្រមេឌីទែរ៉ាណេ ដោយមានចំណងជើងថា «Leonardo DiCaprio នៅវ័យ ៥០ ឆ្នាំ មើលទៅអផ្សុកនៅលើទូកជាមួយ Vittoria Ceretti វ័យ ២៧ ឆ្នាំ បន្ទាប់ពីបានបើកចំហអំពីការណាត់ជួបក្នុងវ័យកណ្តាល» ។ រូបភាពរបស់តារាប្រុសរូបនេះ អង្គុយដោយទឹកមុខស្រពោន សក់រញ៉េរញ៉ៃ ដែលរូបភាពនេះ បានសាយភាយយ៉ាងលឿនតាមអនឡាញ ទាក់ទាញការចាប់អារម្មណ៍ពីសាធារណជន ជាមួយនឹងការបញ្ចេញមតិរាប់ពាន់។

ទស្សនិកជនជាច្រើនបានស្មានថា តារាប្រុសរូបនេះ ហាក់ដូចជាកំពុងជប់លៀងពេញមួយយប់ ហើយបានស្រវឹង និងមើលទៅហត់នឿយ។ ទន្ទឹមនឹងនេះ មនុស្សជាច្រើនឆ្ងល់ថា ហេតុអ្វីបានជាលោក Leonardo DiCaprio អាចធុញទ្រាន់ នៅពេលដែលលោកកំពុងរីករាយនឹងជីវិតដែលមនុស្សរាប់លាននាក់ស្រមៃចង់បាន ជាមួយនឹងវិស្សមកាលនៅលើទូកទំនើប ទ្រព្យសម្បត្តិដ៏ធំ អាជីពជោគជ័យ ព្រមទាំងមានគូស្នេហ៍វ័យក្មេង។ ខណៈដែលមានមតិមួយចំនួន បានលើកឡើងថា រូបលោកមានលុយច្រើន និងជោគជ័យ ប៉ុន្តែមើលទៅឯកោ និងធ្លាក់ទឹកចិត្ត។ អ្នកគាំទ្រមួយចំនួនទៀត បាននិយាយថា Leonardo គួរតែហាត់ប្រាណដើម្បីឲ្យមានភាពស៊ីសង្វាក់គ្នា ឬស្វែងរកចំណូលចិត្តថ្មីៗ ផងដែរ។

គួររំឮកផងដែរថា Leonardo DiCaprio កំពុងរីករាយនឹងវិស្សមកាល នៅឯឆ្នេរសមុទ្រនៃប្រទេសអេស្ប៉ាញ ជាមួយមិត្តស្រី ដែលជាតារាម៉ូដែល Vittoria Ceretti ៕

ប្រភព៖ Ngoisao.net

សូមទស្សនារូបភាពខាងក្រោម៖