ចុមយក្ស! R.Madrid ចង់បញ្ចេញខ្សែបម្រើរូបនេះ ហើយយកម្ចាស់ពាន Ballon d'Or Rodri មកជំនួសវិញ

បរទេស៖ ក្លិបអធិរាជស Real Madrid ត្រូវបានគេរាយការណ៍ថា កំពុងពិចារណាលក់ខ្សែបម្រើកណ្តាល Aurelien Tchouameni ចេញ ហើយគ្រោងយកខ្សែបម្រើរបស់ Manchester City កីឡាករ Rodri មកជំនួសវិញ។

ជាការពិតណាស់ Rodri មុនពេលមានបញ្ហារបួសនៅរដូវកាលនេះ រូបគេពិតជាបង្ហាញសមត្ថភាពលេចធ្លោរមែនទែន ក្នុងនាមជាខ្សែបម្រើកណ្តាលកាលពីរដូវកាលមុន រហូតធ្វើឱ្យថ្មីៗនេះ រូបគេបានយកឈ្នះ Vinicius Jr. ក្លាយជាម្ចាស់ពាន Ballon d'Or ជាលើកដំបូងនៅក្នុងអាជីពខ្លួន។

ទន្ទឹមនឹងសមត្ថភាពដ៏គួរឱ្យស្ងើចសរសើរបែបនេះ បានធ្វើឱ្យក្លិបធំៗចាប់អារម្មណ៍ទៅលើគាត់ខ្លាំងមែនទែន ខណៈ Real Madrid ក៏ជាក្លិបមួយ ដែលមានចំណាប់អារម្មណ៍ចង់បានខ្សែបម្រើសញ្ជាតិ អេស្ប៉ាញ វ័យ ២៨ ឆ្នាំរូបនេះផងដែរ។

យោងតាមការចុះផ្សាយដោយសារព័ត៌មានបរទេស Relevo បានឱ្យដឹងថា Real Madrid ហាក់ដូចជាអស់សេចក្តីទុកចិត្តលើ Aurelien Tchouameni ទៀតហើយ ហើយពួកគេគ្រោងនឹងលក់រូបគេចេញក្នុងពេលខាងមុខ។

ដោយឡែកប្រភពមួយទៀតពីសារព័ត៌មាន AS វិញបានឱ្យដឹងថា Real Madrid មានបំណងចង់នាំយក Rodri មកកាន់ទឹកដី Santiago Bernabeu ដើម្បីជំនួសខ្សែបម្រើសញ្ជាតិ បារាំង រូបនេះ៕

ប្រភព៖ Sportskeeda