បរទេស៖ នាយប់រំលងអាធ្រាត្រឈានចូលថ្ងៃទី ១១ ខែ កក្កដា ឆ្នាំ ២០២៤ នេះ ក្រុមជម្រើសជាតិ អង់គ្លេស បានជួបតទល់គ្នាជាមួយក្រុមជម្រើសជាតិ ហូល្លង់ នៅកីឡដ្ឋាន Signal Iduna Park នៅក្នុងការប្រកួតវគ្គពាក់កណ្តាលផ្តាច់ព្រ័ត្រនៃពានរង្វាន់ Euro ២០២៤។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាការពិតណាស់ នៅក្នុងការប្រកួតខាងលើគឺពិតជាតឹងតែងមែនទែន ប៉ុន្តែជារួមខាងក្រុម អង់គ្លេស គឺធ្វើបានល្អជាង ដោយបញ្ចប់ការប្រកួត ៩០ នាទីពេញ ពួកគេបានទទួលជ័យជម្នះទៅលើក្រុមជម្រើសជាតិ ហូល្លង់ ក្នុងលទ្ធផល ២ ទល់នឹង ១។
មែនទែនទៅខាងក្រុម ហូល្លង់ ជាអ្នករកបានគ្រាប់បាល់នាំមុខមុន ដែលស៊ុតបញ្ចូលទីដោយកីឡាករ Xavi Simons នៅនាទីទី ៧ ប៉ុន្តែក្រោយមកខាងក្រុម អង់គ្លេស ក៏រកបានគ្រាប់បាល់ ២ គ្រាប់វាយបកមកវិញ ដែលគ្រាប់ទី ១ រកបានដោយ Harry Kane នៅនាទីទី ១៨ (P) និងគ្រាប់ទី ២ ដែលជាគ្រាប់ជ័យជម្នះ រកបានតាមរយៈការបញ្ជូនយ៉ាងល្អពី Cole Palmer ទៅឱ្យ Ollie Watkins ស៊ុតបញ្ចូលទីនៅនាទីទី ៩០។
គួរបញ្ជាក់ថា ក្រោយជ័យជម្នះយប់មិញនេះ ក្រុម អង់គ្លេស បានកក់កៅអីឡើងទៅកាន់វគ្គផ្តាច់ព្រ័ត្រនៃពានរង្វាន់ Euro ២០២៤ ហើយ ដោយពួកគេនឹងត្រូវជួបក្រុមជម្រើសជាតិ អេស្ប៉ាញ នៅថ្ងៃទី ១៥ ខែ កក្កដា ខាងមុខ៕
សូមទស្សនាវីដេអូហាយឡាយខាងក្រោម៖