ភ្នំពេញ៖ នៅថ្ងៃទី២០ ខែកក្កដា ឆ្នាំ២០២៣ យោងតាមបទបញ្ជាពីលោក ឧត្តមសេនីយ៍ ឈឿន សុចិត្ត ស្នងការនគរបាលខេត្តកណ្ដាល បានចាត់ឲ្យលោកវរសេនីយ៍ឯក ព្រុំ សំណាង អធិការនគរបាលស្រុកកៀនស្វាយ និងលោកអធិការរងបានដឹកនាំកម្លាំង អន្ដរាគមន៍ស្រុក និងកម្លាំងប៉ុស្ដិ៍នគរបាលឈើទាល កម្លាំងប៉ុស្ដិ៍នគរបាលកំពង់ស្វាយ សហការជាមួយកម្លាំងអធិការដ្ឋាននគរបាលខណ្ឌដង្កោ ក្រុងភ្នំពេញ តាមបង្ក្រាប និងចាប់បានជនសង្ស័យចំនួន ០៤នាក់ ជុំវិញករណី (ធាក់យកម៉ូតូ) ស្ថិតនៅចំណុចកើតហេតុ ​ នៅលើផ្លូវក្រវ៉ាត់ក្រុងទី៣ ភូមិស្រែអំពិល២ ឃុំឈើទាល​២ ស្រុកកៀនស្វាយ ខេត្កកណ្ដាល។

យ៉ាងណាមិញ មុនពេលកើតហេតុបានឲ្យដឹងថា ជនរងគ្រោះបានជិះម៉ូតូចេញពី ភូមិបារ៉ែនក្រោម ឃុំស្វាយប្រទាល ស្រុកស្អាង ខេត្តកណ្ដាល ដើម្បីយកសាច់គោទៅឲ្យម៉ូយនៅផ្លូវជាតិលេខ១ ដោយជិះតាមផ្លូវក្រវ៉ាត់ក្រុងទី៣ ពេលដែលមកដល់ចំណុចកើតហេតុខាងលើ ក៏មានជនសង្ស័យជិះម៉ូតូពីរគ្រឿង ម៉ាកអាសង់មានគ្នា ០៤នាក់ បានធាក់យកម៉ូតូពីជនរងគ្រោះ បានសម្រេចធ្វើឲ្យជនរងគ្រោះដួល ទៅនឹងថ្នល់បណ្ដាលឲ្យរងរបួលធ្ងន់ ត្រូវចំក្បាល។

ខណៈនោះ ជនសង្ស័យ ក៏បានលើកយកម៉ូតូរបស់ជនរងគ្រោះនោះ ជិះរត់គេចតាមផ្លូវជាតិលេខ១ សំដៅទៅក្រុងភ្នំពេញ ក៏ត្រូវបានកម្លាំងនគរបាល អន្ដរាគមន៍ស្រុកកៀនស្វាយ រួមគ្នាជាមួយកម្លាំងប៉ុស្ដិ៍ឈើទាល និងកម្លាំងប៉ុស្ដិ៍កំពង់ស្វាយ បានដេញតាមចាប់ពីក្រោយ រហូតមកដល់ផ្លូវ២៧១ ខណ្ឌមានជ័យ ក៏ឃាត់បានជនសង្ស័យ០១នាក់ផងដែរ។

ទន្ទឹមគ្នានេះដែរ ក៏នៅតែបន្ដនីតិវិធីមកសង្កាត់ដង្កោ ខណ្ឌដង្កោ ភ្នំពេញក៏ធ្វើការឃាត់បានខ្លួនជនសង្ស័យចំនួន ០៣នាក់បន្ថែមទៀត ហើយបច្ចុប្បន្នជនសង្ស័យកំពុងតែ ធ្វើការសាកសួរ ដើម្បីបន្ដនីតីវិធី។ លើសពីនេះទៅទៀត ក្រៅពីឃាត់ខ្លួនជនសង្ស័យទាំងអស់បានហើយ កម្លាំងសមត្ថកិច្ចដកហូតបានវត្ថុតាងអាវុធ ​ និងធ្វើកាតនគរបាលព្រហ្មទណ្ឌ CID ក្លែងក្លាយ ចំនួន៣ទៀតផងដែរ៕

ប្រភព៖ ព័ត៌មានអធិការដ្ឋាននគរបាលស្រុកកៀនស្វាយ

សូមទស្សនារូបភាពខាងក្រោម៖