បរទេស៖ អ្នកចាត់ការរបស់ក្រុម Paris Saint-Germain លោក Christophe Galtier បានចេញមុខឆ្លើយតបទៅវិញ នៅពេលមានគេរិះគន់ថា Lionel Messi, Neymar Jr. និង Kylian Mbappe លេងជុំគ្នា គឺបានធ្វើឱ្យបាត់បង់តុល្យភាពក្នុងក្រុមទាំងមូល។
ការលើកឡើងដូចខាងលើបានកើតឡើង បន្ទាប់ពី PSG បានត្រឹមប្រកួតស្មើជាមួយនឹងក្រុម Reims នៃពានរង្វាន់ Ligue 1 ក្នុងលទ្ធផល ១-១ កាលពីថ្ងៃ អាទិត្យ ទី ២៩ ខែ មករា កន្លងទៅ ដែលពេលនោះគឺមានវត្តមានជុំគ្នារវាងតារាជួរមុខទាំង ៣ រួមមាន Messi, Neymar និង Mbappe។
ក្រោយ PSG ប្រកួតស្មើបែបនេះ, អ្នកកាសែតសញ្ជាតិបារាំងរបស់ RMC Sport លោក Daniel Launched បានមានប្រសាសន៍យ៉ាងដូច្នេះថា៖
គ្មានគ្រូបង្វឹកលើលោកណា ដែលអាចដាក់ឱ្យនាក់ទាំង ៣ (Messi, Neymar និង Mbappe) លេងជុំគ្នាបានឡើយ, វាគឺមិនអាចទៅរួចនោះទេ!
បន្ទាប់ពីមានការលើកឡើងដូច្នេះ លោក Galtier បានឆ្លើយតបទៅវិញយ៉ាងដូច្នេះថា៖
យើងមានកីឡាករ ៣ នាក់ដែលសុទ្ធតែជាខ្សែប្រយុទ្ធដ៏អស្ចារ្យ, ខ្ញុំគិតថា ពួកគេបូកបញ្ចូលគ្នាគឺរកបាន ៥៥ គ្រាប់ និង ៣៤ assists ចាប់តាំងពីដើមរដូវកាលនេះ។ តើអ្នកគួរនិយាយថា យើងត្រូវដកកីឡាករណាម្នាក់ក្នុងចំណោមពួកគេទាំងបី ដើម្បីធ្វើឲ្យក្រុមមានតុល្យភាពដែរទេ?
ប្រភព៖ Sportskeeda
