យល់ដឹង៖ មានបញ្ហាជាច្រើនកើតឡើង នៅពេលដែលស្នេហារបស់អ្នកកំពុងពេញស្រលាញ់សុខៗ តែបែរជាត្រូវរស់នៅឆ្ងាយពីគ្នា ដោយសារការងារ ឬការសិក្សានៅស្រុកក្រៅជាដើម។ 

ជាមួយគ្នានេះ នៅពេលដែលមនុស្សដែលយើងស្រលាញ់ ត្រូវបានឃ្លាតឆ្ងាយទៅ ក្នុងចិត្តរបស់មនុស្សម្នាក់ៗតែងតែគិតច្រើន ខ្លាចថាបើគេនៅឆ្ងាយពីយើងបែបនេះ តើគេនៅស្រលាញ់យើងដូចមុនអត់? តើគេអាចលួចមានថ្មីឬអត់?

ដូច្នេះ ទោះជាយ៉ាងណាក៏ដោយ ថ្ងៃនេះ យុវវ័យ សូមលើកយក វិធីដែលអាចជួយអ្នកឲ្យស្វែងរកសុភមង្គល និងភាពសុខដុមរមនា ទោះបីជាស្នេហារបស់អ្នក នៅឆ្ងាយគ្នាក៏ដោយក៏មិនណាយចិត្ត៕

១.ការទំនាក់ទំនង

ការមានកាលវិភាគ កំណត់ពេលវេលា និងរបៀបរស់នៅខុសៗគ្នា ធ្វើឲ្យមានការពិបាកសម្រាប់មនុស្សពីរនាក់ក្នុងការសន្ទនាជាងគូស្នេហ៍ដែលនៅជិតគ្នា។ អ្នក​អាច​នឹង​មាន​អារម្មណ៍​ខក​ចិត្ត​ចំពោះ​គូស្នេហ៍​របស់​អ្នក ​ប្រសិន​បើ​អ្នក​មិន​ទទួល​បាន​ការ​ឆ្លើយតបបាន​រហ័ស​តាមរយៈសារ​ជា​អក្សរ។ សូម្បី​តែ​នៅពេល​ដែល​ភ្លេច​ដាក់​សញ្ញា​អារម្មណ៍​គួរឲ្យ​ស្រលាញ់​ក្នុង​ការ​សន្ទនា​ ក៏​អាច​ធ្វើឲ្យ​អ្នក​មាន​អារម្មណ៍​សោកសៅ និង​អន់​ចិត្ត​ដែរ។ អាក្រក់​ជាង​នេះ​ទៅ​ទៀត ការ​រស់នៅ​ឆ្ងាយ​ពី​គ្នាក្នុងបរិយាកាសផ្សេងគ្នា ធ្វើការ​ខុស​គ្នា ​ក៏​ធ្វើ​ឲ្យ​អ្នក​ទាំង​ពីរ​គ្មាន​អ្វីចង់ចែករំលែកជាមួយគ្នាដែរ។ ដូច្នេះ ឥឡូវនេះ អ្វីដែលអ្នកត្រូវធ្វើគឺ៖

• ជូនដំណឹងដល់គូស្នេហ៍របស់អ្នកជាមុន អំពីការមិនអាចឆ្លើយតបសារបាន ព្រោះអ្នករវល់។
• ប្រាប់ពីបរិយាកាសកន្លែងធ្វើការរៀងៗខ្លួន។
• បង្កើតពេលវេលាក្នុងមួយថ្ងៃ ដើម្បីចែករំលែកជាមួយគ្នានូវអ្វីដែលបានកើតឡើងនៅថ្ងៃនោះ។

២.កែប្រែទម្លាប់ស្នេហា

វាពិតជាល្អណាស់ប្រសិនបើអ្នក និងដៃគូរបស់អ្នក អាចបង្កើតពេលវេលាមានកំណត់ សម្រាប់គ្នាទៅវិញទៅមក។ទោះជាយ៉ាងណាក៏ដោយ ការផ្លាស់ប្តូរដែលមិននឹកស្មានដល់ ក៏នឹងធ្វើឲ្យស្នេហាកាន់តែគួរឲ្យចាប់អារម្មណ៍និងទាក់ទាញផងដែរ។ ដូច្នេះហើយ អ្នកគួរតែ៖

• ផ្លាស់ប្តូរទីតាំងណាត់ជួបតាមអនឡាញរបស់អ្នក ដោយច្រៀងខារ៉ាអូខេតាមអនឡាញជាមួយគ្នា ផ្លាស់ប្តូរទីតាំង Face-Time ។ល។
• ធ្វើរឿងភ្ញាក់ផ្អើលដល់មនុស្សជាទីស្រលាញ់របស់អ្នក ដោយការបង្ហាញនៅទីតាំងដែលមានបរិយាកាសស្អាតៗ។
• ធ្វើដំណើរកម្សាន្តដើម្បីពង្រឹងទំនាក់ទំនងរបស់មនុស្សពីរនាក់។
• ផ្តល់ឲ្យគ្នាទៅវិញទៅមកនូវអំណោយឬសំបុត្រ (ទាំងការសរសេរដោយដៃឬអ៊ីម៉ែលអាចធ្វើឲ្យពួកគេភ្ញាក់ផ្អើលនិងរីករាយ)។

៣.ទំនាក់ទំនងផ្នែករាងកាយ

ទោះបីជាអ្នកទាំងពីរមានបុគ្គលិកលក្ខណៈដែលត្រូវគ្នាក៏ដោយ ប៉ុន្តែចម្ងាយផ្លូវកាយនឹងធ្វើឲ្យទំនាក់ទំនងចួនកាលមានអារម្មណ៍ថា ឯកោក្នុងក្តីស្រលាញ់របស់ខ្លួន។ ភាពស្និទ្ធស្នាល ត្រូវបានបង្ហាញថា ជាគ្រឿងទេសស្នេហា ដែលជួយគូស្នេហ៍ អាចដោះស្រាយជម្លោះបានល្អប្រសើរ។ ដូច្នេះអ្នកអាចពិចារណាត្រង់ចំណុច៖

• ការប្រើប្រាស់កម្មវិធីនៅលើទូរស័ព្ទ អាចធ្វើបច្ចុប្បន្នភាពរូបភាពជាមួយគ្នាគ្រប់ពេលវេលា គ្រប់ទីកន្លែង។
• ផ្តល់ឲ្យគ្នាទៅវិញទៅមកនូវ វត្ថុដែលមានក្លិនក្រអូបប្រចាំខ្លួនឲ្យគ្នាទៅវិញទៅមក។
• កុំ​ខ្លាច​ក្នុង​ការ​បង្ហាញ​អារម្មណ៍​ស្និទ្ធស្នាល​របស់​អ្នក​តាម​ទូរស័ព្ទ ឲ្យ​តែ​អ្នក​ទាំង​ពីរ​បើក​ចំហ និង​គោរព​គ្នា​ទៅ​វិញ​ទៅ​មក។

៤.កុំលាក់អារម្មណ៍របស់អ្នក

ការ​រំសាយ​អារម្មណ៍ ឬ​បង្ហាញ​ភាព​រីករាយ​ ដើម្បី​ព្យាយាម​រក្សា​ដៃគូ​របស់​អ្នក​ពី​ការ​រំខាន​ នឹង​នាំឲ្យ​មាន​ការ​បែកបាក់​ក្នុង​ការ​ទំនាក់ទំនង។ ជំនួសមកវិញ អ្នកគួរតែ៖

• ស្មោះត្រង់ចំពោះអារម្មណ៍អវិជ្ជមានរបស់អ្នក ហើយសុខចិត្តស្តាប់គំនិតផ្សេងទៀតពីដៃគូរបស់អ្នក។
• រៀនយល់ចិត្ត និងយល់ពីភាពខុសគ្នានៃតម្រូវការ និងស្ថានភាពរបស់គ្នាទៅវិញទៅមក។

៥.ទុកចិត្តគ្នា

នៅមិនសុខ និងការប្រចណ្ឌ ​គឺ​ជា​រឿង​ធម្មតា​ក្នុង​គ្រប់​ទំនាក់ទំនង ជាពិសេស​ពេល​មាន​ទំនាក់ទំនងឆ្ងាយពីគ្នា។នៅពេលដែលដៃគូរបស់អ្នក យឺតយ៉ាវក្នុងការឆ្លើយតបសារ ហើយចំណាយពេលជាមួយអ្នកដទៃ ឬមានពេលល្អជាមួយមិត្តរួមការងារ អ្នកនឹងកើតឡើងនូវអារម្មណ៍មួម៉ៅ និងការប្រចណ្ឌកាន់តែកើនឡើង។ នៅចំណុចនេះ អ្នកត្រូវការ៖

• ជូនដំណឹងដល់បុគ្គលនោះ នៅពេលអ្នកទៅកិច្ចប្រជុំណាមួយ ដើម្បីបង្កើតអារម្មណ៍សុវត្ថិភាព។
• ប្រាប់ពួកគេពីគំនិតរបស់អ្នកតាមរបៀបដ៏ប៉ិនប្រសប់។
• បើ​អ្នក​មិន​អាច​ទប់​កំហឹង​បាន​ទេ ចូរ​នៅ​ស្ងៀម​រហូត​ដល់​អារម្មណ៍​ស្ងប់ឡើងវិញ ចាំជជែករកហេតុផល។

ប្រភព៖ lifestyle.zingnews