មនុស្ស៤ប្រភេទនេះ ជាប្រភេទមនុស្សដែលរារាំងភាពជោគជ័យអ្នក

យល់ដឹង៖ មនុស្សគ្រប់គ្នាដែលស្ថិតនៅជុំវិញខ្លួនអ្នក គឺពិតជាមានឥទ្ធិពលក្នុងការធ្វើឱ្យជីវិតរបស់អ្នកទៅជាយ៉ាងណាខ្លាំងណាស់ អ្នកខ្លះក៏នាំតែរឿងល្អៗ និងធ្វើឱ្យជីវិតអ្នកដើរទៅមុខ តែចំណែកអ្នកខ្លះទៀត ក៏ធ្វើឱ្យជីវិតអ្នកចេះដើរថយក្រោយ និងមិនអាចជោគជ័យ។

ដូច្នេះហើយ មុននឹងរាប់អាន ឬនៅក្បែរមនុស្សណាម្នាក់ អ្នកគួរតែសង្កេតមើលគេជាមុនដែរថា គេជាប្រភេទមនុស្សដែលស្ថិតនៅក្នុងប្រភេទមនុស្ស ដូចដែលបានរៀបរាប់នៅខាងក្រោមនេះឬក៏អត់ ព្រោះប្រភេទមនុស្សទាំងនេះនឹងរារាំងភាពជោគជ័យរបស់អ្នក។

មនុស្ស៤ប្រភេទនេះ ជាប្រភេទមនុស្សដែលរារាំងភាពជោគជ័យអ្នក៖

១. មនុស្សអវិជ្ជមាន

បើទោះបីជាការរាប់អាន គ្មានការរើសអើងក៏ដោយ ក៏អ្នកមិនគួរបណ្តោយឱ្យខ្លួនឯង រាប់អានមនុស្សដែលមានភាពអវិជ្ជមានដែរ ព្រោះប្រភេទមនុស្សបែបនេះ ផ្តល់នូវភាពអវិជ្ជមានដល់អ្នកជានិច្ច ធ្វើអ្វីក៏មិនសូវជាទទួលបានផលល្អ ឬតែងតែបរាជ័យជានិច្ច ដោយសារតែអ្នកទទួលបានចំហាយឥទិ្ធពលអវិជ្ជមាន ពីមនុស្សដែលនៅជុំវិញខ្លួនអ្នក។

២. មនុស្សដែលចាំតែរិះគន់ជាន់ពន្លិចអ្នក

មិនថាអ្នកធ្វើអ្វី ឬមានការប្រឹងប្រែងយ៉ាងណាទេ បើអ្នកនៅក្បែរនឹងមនុស្សដែលចូលចិត្តរិះគន់ជាន់ពន្លិចគ្រប់យ៉ាងដែលអ្នកធ្វើ អ្នកនឹងគ្មានថ្ងៃទទួលបានភាពជោគជ័យឡើយ ព្រោះថាការរិះគន់ជាន់ពន្លិចរបស់គេ មិនបានធ្វើឱ្យអ្នករីកចម្រើនទេ ផ្ទុយទៅវិញ មានតែធ្វើឱ្យអ្នកបាក់ទឹកចិត្ត និងឈប់ធ្វើនូវអ្វីដែលខ្លួនចង់ធ្វើវាឱ្យបានជោគជ័យ។

៣. មនុស្សដែលមើលងាយក្តីស្រមៃអ្នក

ការមានក្តីស្រមៃនិងគោលដៅ គឺជាអ្វីដែលសំខាន់បំផុត ក្នុងការដែលអាចនាំឱ្យអ្នកឈានទៅរកភាពជោគជ័យបាន តែបើមនុស្សដែលនៅជុំវិញខ្លួនអ្នក គេតែងតែមើលងាយក្តីស្រមៃ និងនិយាយបំបាក់ទឹកចិត្តអ្នកនោះ អ្នកនឹងមិនអាចជោគជ័យបានឡើយ ព្រោះមនុស្សនៅជុំវិញខ្លួន គឺពិតជាមានឥទ្ធិពលមកលើផ្លូវអារម្មណ៍របស់អ្នករាល់គ្នាខ្លាំងណាស់ ហេតុនេះ កុំនៅក្បែរនឹងមនុស្សណាដែលតែងមើលងាយក្តីស្រមៃអ្នកឱ្យសោះ។

៤. មនុស្សមានអំនួត

អំនួតតែងនាំមនុស្សដើរទៅរកភាពបរាជ័យជានិច្ច ហេតុនេះហើយ ការនៅក្បែរនឹងមនុស្សដែលមានអំនួត ចូលចិត្តអួតអាង វាក៏អាចធ្វើឱ្យអ្នកក្លាយទៅជាប្រភេទមនុស្សបែបនេះដោយមិនដឹងខ្លួន អញ្ចឹងហើយ នៅឱ្យឆ្ងាយពីមនុស្សដែលមានអំនួត ទើបជីវិតអ្នកអាចដើរទៅរកភាពជោគជ័យ ដោយគ្មានអ្វីអាចមករារាំងបាន៕