Chelsea សម្លឹងចង់បានខ្សែប្រយុទ្ធជម្រើសជាតិអេស្ប៉ាញរូបនេះ មកជំនួសកន្លែង Werner ប៉ុន្តែត្រូវប្រឈមមុខនឹង Arsenal

បរទេស៖ យោងតាមអ្នកសារព័តមាន Simon Phillips ដែលស្ថិតនៅស្ថាប័ន Football.London បានឲ្យដឹងថា ក្លិបតោខៀវ Chelsea និងកាំភ្លើងធំ Arsenal កំពុងប្រជែងគ្នាយកខ្សែប្រយុទ្ធ Yeremy Pino របស់ក្លិប Villareal ។

Pino វ័យ១៩ឆ្នាំ ជាកីឡាករចុងក្រោយបង្អស់ ដែលមានដំណឹងពាក់ព័ន្ធ នឹងអ្នកចាត់ការក្រុម Arsenal លោក Mikel Arteta ខណៈដែលរដូវកាលនេះ ក្រុមរហស្សនាមកាំភ្លើងធំ បាននាំចូលកីឡាករថ្មីចំនួន៥រូបមកហើយ។

យ៉ាងណាមិញ បើយោងតាមរបាយការណ៍ មិនមែនមានតែ Arsenal ដែលចង់បានខ្សែប្រយុទ្ធវ័យ១៩ឆ្នាំរូបនេះទេ ខណៈ Chelsea ក៏ចង់បានដែរ​ ដើម្បីមកបំពេញចំណុចខ្វះខាតនៅតំបន់ប្រយុទ្ធ ក៏ព្រោះតែក្រុមលោក Thomas Tuchel មួយនេះ ទើបបញ្ចេញខ្សែប្រយុទ្ធដល់ទៅ២រូប រួមមាន Timo Werner និង ​Romelu Lukaku ។

បន្ថែមពីនេះ បើតាមអ្នកកាសែត  Fabrizio Romano បានឲ្យដឹងថា Villarreal នឹងអនុញ្ញាតឲ្យ Pino ចាកចេញ លុះត្រាតែណាតែពួកគេ ទទួលបានថ្លៃផ្ទេរលើសពី ៥០លានអឺរ៉ូ ។

គួររម្លឹកដែរថា កិច្ចសន្យារបស់ Pino នៅ Villareal មានសុពលភាពដល់ខែមិថុនា ឆ្នាំ២០២៧ ដោយគេបង្ហាញខ្លួន នៅក្របខណ្ឌ La Liga ចំនួន៧៨ប្រកួត ស៊ុតបញ្ចូលទីបាន១៤គ្រាប់ និងបញ្ជូនបាល់បាន៥គ្រាប់។ មិនត្រឹមតែប៉ុណ្ណោះ គេក៏ជាចំណែកសំខាន់ ក្នុងការជួយ Villareal លើកពាន Europa League កាលពីរដូវកាល ២០២០/២១ ផងដែរ៕

ប្រភព៖ AF