ក្លិបណាត្រូវថ្លៃយកចុះ! Leeds ទារ៦៥លានសម្រាប់តម្លៃខ្លួន Raphinha ខណៈក្លិបធំៗទាំង៤នេះ កំពុងប្រជែងគ្នាយករូបគេ

បរទេស៖ យោងតាមអ្នកសារព័ត៌មានកីឡាដ៏ល្បីគឺលោក ​​ Fabrizio Romano បានឲ្យដឹងថា ទាមទារតម្លៃខ្លួនខ្សែប្រយុទ្ធកំពុងឡើងកូដ Raphinha ចំនួន៦៥លានផោន (ឬប្រមាណ៧៩លានដុល្លារ)។

បើតាមប្រភពដដែលបានបន្ថែមទៀតថា មានក្លិបធំៗចំនួន៤កំពុងចាប់ចិត្តចង់បានខ្សែប្រយុទ្ធសញ្ជាតិប្រេស៊ីលខាងលើនេះ មានកាំភ្លើងធំ Arsenal ក៏ដូចជាគូប្រជែងរួមលីគចំនួន២ មាន Spurs និង​ Chelsea ជាដើម និងមួយទៀត គឺក្លិបយក្សតំបន់កាតាឡាន់ Barcelona ។

គួររម្លឹកដែរថា Raphinha ត្រូវបាន Leeds ទិញមកពីក្លិប Rennes ក្នុងតម្លៃ១៧លានផោន កាលពី ខែតុលា ឆ្នាំ២០២០ ខណៈរដូវកាលមុន ខ្សែប្រយុទ្ធវ័យ២៥ឆ្នាំ រកបាន១១គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបាន៣ដង នៅក្របខណ្ឌ​ Premier League ៕

ប្រភព៖ Fabrizio Romano