ផ្លូវការ! កីឡាករចាស់វស្សារូបនេះ ត្រូវបាន Real Madrid បញ្ចូលឈ្មោះជា Legend របស់ក្លិបហើយ

អេស្ប៉ាញ៖ ខ្សែប្រយុទ្ធ Gareth Bale ត្រូវបានបញ្ចូលឈ្មោះជាវីរបុរស (Legend) ក្លិប Real Madrid ជាផ្លូវការ នេះបើយោងគេហទំព័ររបស់ក្លិប។

ខ្សែប្រយុទ្ធសញ្ជាតិវែលស៍ខាងលើ បានមកចូលរួមជាមួយក្លិប Real Madrid ពីក្លិបមាន់ខ្នាយមាស Tottenham Hotspur ក្នុងតម្លៃ១០១លានអឺរ៉ូ តាំងពីឆ្នាំ២០១៣មកម្ល៉េះ ខណៈនាបំណាច់ខែមិថុនានេះ រូបគេ នឹងត្រូវចាកចេញពីទឹកដី Bernabeu ហើយ ដោយសារផុតកិច្ចសន្យាជាមួយក្លិប។

យ៉ាងណាមិញ រយៈពេល ជិត១០ឆ្នាំកន្លងមកនេះ Bale បានរួមចំណែកជួយក្លិបដែលមានមូលដ្ឋាននៅទីក្រុងម៉ាឌ្រីដ ប្រទេសអេស្ប៉ាញ លើកពាន Champions League ចំនួន៥សម័យ ពាន La Liga ៣សម័យ និងពានធំៗជាច្រើនទៀត ហើយសមិទ្ធផលទាំងនេះឯង ត្រូវបាន Real Madrid ចាត់ទុកគាត់ជាវីរបុរសក្លិប។ មិនត្រឹមតែប៉ុណ្ណោះ Real Madrid ក៏បានបញ្ចូលឈ្មោះ កីឡាករ ​Marcelo និង ខ្សែបម្រើ Isco ផងដែរ។

បន្ថែមពីនេះ គេហទំព័រផ្លូវការរបស់ Real Madrid ក៏បានកត់ត្រាទុកនូវគ្រាប់បាល់ដែលមិនអាចបំភ្លេចបានរបស់ Bale ផងដែរ ដែលជាគ្រាប់លោកទាត់បកចេក ក្នុងជំនួបវគ្គផ្ដាច់ព្រ័ត្រ ទល់នឹងក្រុមហង្សក្រហម Liverpool  ក្នុងឆ្នាំ២០១៨ ៕

ប្រភព៖ AF