ងាយៗ! បុរសរូបនេះ ស៊ីឈ្នួលឈរតម្រង់ជួរជំនួសគេ អាចរកបានប្រាក់យ៉ាងច្រើនក្នុងមួយថ្ងៃ

ចក្រភពអង់គ្លេស៖ បុរសម្នាក់អាយុ៣១ឆ្នាំ មកពីតំបន់ Fulham នៃចក្រភពអង់គ្លេស បានឆ្លៀតពេលទំនេរធ្វើការមួយ ដែលគ្រាន់តែចំណាយពេលច្រើនម៉ោង ឈរតម្រង់ជួរពីមុខហាងទំនិញម៉ាកល្បីៗ ជំនួសឲ្យក្រុមអ្នកមានទ្រព្យស្ដុកស្ដម្ភ ខណៈពួកគេមានការរវល់ខ្លាំងពេក និងមិនអាចធ្វើវាដោយខ្លួនឯងបាន។

តួយ៉ាង អស់រយៈពេល៣ឆ្នាំចុងក្រោយនេះ លោក Freddie Beckitt ដែលជាអ្នកនិពន្ធរឿងប្រឌិតខាងប្រវត្តិសាស្ត្រ បានបន្ថែមប្រាក់ចំណូលប្រចាំខែរបស់គាត់ ដោយការឈរតម្រង់ជួរជំនួសគេ ដែលអាចរកបានប្រាក់ចំនួន២០ផោនក្នុងមួយម៉ោង (ប្រមាណ២៧ដុល្លារអាមេរិក) និងមានថ្ងៃល្អបំផុត បានរហូតដល់ទៅប្រមាណ២១៨ដុល្លារអាមេរិក។ ហើយគាត់មិនប្រកាន់លើការឈរតម្រង់ជួរយូរឡើយ ដរាបណាបានប្រាក់ថ្លៃសេវាកម្ម និងប្រាថ្នាថា គាត់អាចចំណាយពេលច្រើនម៉ោងឈរតម្រង់ជួរ ដូច្នេះគាត់អាចប្រែក្លាយសេវាកម្មទៅជាការងារពេញម៉ោងតែម្ដង។

ជាក់ស្ដែង ដំបូងឡើយ វាកើតឡើងដោយក្រុមហ៊ុន Taskrabbit ដែលអនុញ្ញាតឲ្យមនុស្សគ្រប់រូបរាយបញ្ជីពីការងារប្លែកៗផ្សេងៗគ្នា ដោយអតិថិជនគ្រាន់តែជ្រើសរើសសេវាកម្មណាមួយ និងទាក់ទងឲ្យបំពេញតួនាទីជាការស្រេច។ ដូច្នេះគាត់បាននឹកឃើញពីការងារឈរតម្រង់ជួរនេះឡើង និងគិតថាវាជាការងារងាយស្រួលបំផុតនៅក្នុងពិភពលោក។

យ៉ាងណាមិញ គាត់ក៏គិតថា គាត់មិនអាចដំឡើងថ្លៃសេវាកម្មឡើយ ព្រោះការងារនេះមិនតម្រូវឲ្យមានជំនាញ ឬលំបាកណាស់ណាទេ ប៉ុន្ដែវាបានផ្ដល់នូវភាពបត់បែនជាច្រើនក្នុងការរកប្រាក់ចំណូល ហើយគាត់អាចមានពេលបំពេញវាតាមកាលវិភាគនៃការសរសេររឿងរបស់គាត់ផងដែរ៕

ប្រភព: Odditycentral / Facetastic

សូមទស្សនារូបភាពខាងក្រោម៖