ជួលជុលផ្ទះសុខៗ រកឃើញបន្ទប់ចាស់ក្រោមដី ស្រាប់តែបុរសរូបនេះ កែចេញជាបន្ទប់មើលកុនយ៉ាងឡូយ

អង់គ្លេស៖ បុរសម្នាក់អាយុ៣៩ឆ្នាំ និងមកពីទីប្រជុំជន Cradley Heath នៃប្រទេសអង់គ្លេស បានរកឃើញបន្ទប់ដ៏ចាស់មួយក្រោមដី ខណៈពេលកំពុងអង្កេតមើលកម្រាលឥដ្ឋដែលខូចខាត និងជួលជុលឡើងវិញ។

ជាក់ស្ដែង លោក Ben Mann ស្ទើរតែមិនចង់ជឿថាមានបន្ទប់ក្រោមដី ដោយគាត់បានផ្លាស់មករស់នៅក្នុងផ្ទះនេះជាមួយភរិយារបស់គាត់ តាំងពីមេសា ឆ្នាំ២០១៥ម៉្លេះ។ ហើយបន្ទប់ក្រោមដី ហាក់មិនមានសភាពល្អឡើយ ដែលមានទឹកជន់លិច រួមទាំងកម្ទេចថ្មផងដែរ។ ហើយដូច្នេះ គាត់ក៏សម្រេចចិត្តកែច្នៃវាទៅជាបន្ទប់មើលកុន និងបន្ទប់សម្រាប់លេងកម្សាន្តឲ្យកូនស្រីអាយុមួយឆ្នាំរបស់គាត់តែម្ដង ដែលមានទំហំប្រហែល១២ម៉ែត្រការ៉េ។

យ៉ាងណាមិញ ចំពោះកាកែច្នៃឲ្យបន្ទប់មានសភាពស្រស់ស្អាត បូករួមទាំងគ្រឿងសង្ហារឹមជជុះៗប៉ុណ្ណោះ បុរសខាងលើ បានចំណាយប្រាក់អស់ចំនួន៤,៥០០ផោន (ប្រមាណ៦,១៣០ដុល្លារអាមេរិក)។ ហើយតាមពិតទៅការចាប់ផ្ដើមជួសជុល តាំងពីខែតុលា ឆ្នាំ២០២០ ប៉ុន្ដែទើបបានបញ្ចប់កាលពីថ្មីៗនេះ៕

ប្រភព: Daily Mail

សូមទស្សនារូបភាពខាងក្រោម៖