រៀបការបែបណា? គូស្នេហ៍ឥណ្ឌានេះ នឹងប្រារព្ធពិធីមង្គលការ ដែលឪពុកចែកឋានបាត់ហើយ អាចចូលរួមបានទៀត

ឥណ្ឌា៖ គូស្នេហ៍ជនជាតិឥណ្ឌាមួយគូ មកពីរដ្ឋ Tamil Nadu នៃប្រទេសឥណ្ឌា នឹងប្រារព្ធពិធីមង្គលការរបស់ពួកគេទាំងពីរ តាមរយៈបច្ចេកវិទ្យាពិភពនិម្មិត Metaverse លក្ខណៈបែបបរិយាកាសដូចក្នុងរឿងដ៏ល្បីល្បាញ “Harry Potter” នាថ្ងៃទី០៦ ខែកុម្ភៈខាងមុខនេះ ដោយសារតែមានវិធានការទប់ស្កាត់ការរីករាលដាលជំងឺកូវីដ-១៩។

លោក Dinesh Sivakumar អាយុ២៤ឆ្នាំ និងគូដណ្ដឹងអាយុ២៣ឆ្នាំ បានត្រៀមខ្លួនរួចជាស្រេច ក្នុងការទទួលស្វាគមន៍ភ្ញៀវកេត្តិយសប្រមាណរាប់ពាន់នាក់ ខណៈភ្ញៀវចំនួនជាង២,០០០នាក់បានបញ្ជាក់ពីការចូលរួម។ ហើយដំបូងឡើយ គាត់គិតថា ការរៀបការតាមកម្មវិធី Zoom មានជាច្រើនគូមកហើយ ទើបគាត់ចង់ធ្វើឲ្យកាន់តែពិសេស ដូច្នេះក៏ជ្រើសរើសយកការរៀបការតាមពិភពនិម្មិតតែម្ដង ដែលវាមានភាពងាយស្រួលជាខ្លាំង ដោយភ្ញៀវទាំងអស់អាចជ្រើសរើសតួអង្គតុក្កតា ដាក់ឈ្មោះរៀងៗខ្លួន និងតុបតែងខ្លួនតាមចំណង់ចូលចិត្ត។

យ៉ាងណាមិញ បុរសជាកូនកំលោះផ្ទាល់ ជាសហការីគម្រោងនៅវិទ្យាស្ថានបច្ចេកវិទ្យាឥណ្ឌា និងបានធ្វើការណែនាំ រួមទាំងពន្យល់ពីពិភពនិម្មិតដល់ក្រុមគ្រួសារ ដូច្នេះគ្មានការជំទាស់អ្វីឡើយ។ ណាមួយទៀត អ្វីដែលកាន់តែពិសេស គាត់នឹងជ្រើសរើសតួអង្គតុក្កតាម្នាក់ និងតុបតែងឲ្យដូចនឹងឪពុករបស់គូដណ្ដឹង ដើម្បីដាក់ឈរទទួលភ្ញៀវ ដែលឪពុកបានទទួលមរណភាពកាលពីឆ្នាំមុនម៉្លេះ។ អីចឹងហើយ អ្វីៗគ្រប់យ៉ាងនឹងមានភាពដំណើរការយ៉ាងរលូន និងពោរពេញដោយភាពកក់ក្ដៅផងដែរ៕

ប្រភព: Daily Mail

សូមទស្សនារូបភាពខាងក្រោម៖