បរទេស៖ កាលពីម្សិលមិញនេះ អង្គការសុខភាពពិភពលោក (WHO) បានព្រមានថា មេរោគបំប្លែងថ្មីអូមីក្រុង (Omicron) បង្កហានិភ័យខ្ពស់ អាចធ្វើឱ្យករណីឆ្លងកើនឡើងជុំវិញពិភពលោក ហើយវត្តមានមេរោគបំប្លែងថ្មីនេះ អាចនាំឱ្យមានផលវិបាកធ្ងន់ធ្ងរនៅក្នុងតំបន់មួយចំនួន។
ជាមួយគ្នានេះ ប្រធានអង្គការសុខភាពពិភពលោក លោកវេជ្ជបណ្ឌិត Tedros Adhanom Ghebreyesus បានបន្តធ្វើការអំពាវនាវឱ្យមានការជំរុញជាសកល ក្នុងការចែករំលែកវ៉ាក់សាំងបង្ការកូវីដ១៩ទៅដល់ប្រទេសក្រីក្រ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
មេរោគបំប្លែងថ្មីអូមីក្រុង ត្រូវបានរកឃើញនៅអាហ្រ្វិកខាងត្បូងនៅដើមខែនេះ ក្នុងនោះភស្តុតាងដំបូងបង្ហាញថា វាមានហានិភ័យខ្ពស់ អាចធ្វើឱ្យករណីឆ្លងកើនឡើងជាថ្មី។ ទន្ទឹមនឹងនោះ អាហ្រ្វិកខាងត្បូង ក៏ទទួលបានកោតសរសើរផងដែរ ចំពោះការរាយការណ៍ពីវត្តមាននៃមេរោគបម្លែងថ្មីនេះ បានទាន់ពេលវេលា។
គួរឱ្យដឹងដែរថា បច្ចុប្បន្នករណីឆ្លងមេរោគអូមីក្រុង ត្រូវបានគេរាយការណ៍ក្នុងប្រទេសមួយចំនួនរួមមាន កាណាដា អង់គ្លេស ព័រទុយហ្គាល់ បែលហ្សិក និងហូឡង់។ ហើយក្រុមអ្នកជំនាញបាននឹងកំពុងធ្វើការសិក្សា ដើម្បីកំណត់ថាតើ វាជាប់ទាក់ទងនឹងកំណើនឡើងនៃករណីឆ្លង វាមានហានិភ័យក្នុងឆ្លងឡើងវិញ និងថាតើវាមានប្រតិកម្មបែបណា ចំពោះវ៉ាក់សាំង៕
